អន្តរជាតិ
ប្រធានាធិបតី Erdogan ជួបលោក ពូទីន ដើម្បីចាប់ផ្តើមទំព័រថ្មីនៃទំនាក់ទំនងរុស្ស៊ី-តួកគី
× ប្រធានាធិបតីតួកគី លោក Tayyip Erdogan បានអះអាងថាលោកសង្ឃឹមយ៉ាងមុតមាំថា ជំនួបរវាងលោកជាមួយប្រធានាធិបតីរុស្ស៊ី នាថ្ងៃអង្គារទី ៩ ខែសីហានេះ នឹងផ្តល់ផ្លែផ្កាច្រើន ហើយទំនាក់ទំនងការទូតប្រេះស្រាំកន្លងមកនឹងត្រូវផ្លាស់ប្តូរ។ ហើយរដ្ឋាភិបាលលោកចង់ចាប់ផ្តើមទំនាក់ទំនងនិងកិច្ចសហប្រតិបត្តិការគ្រប់យ៉ាងឡើងវិញ ដោយគ្មានកម្រិត និងប្រកបដោយភាពស្អាតស្អំផងនោះ។
វត្តមានប្រធានាធិបតីតួកគី Tayyip Erdogan នៅរុស្ស៊ី បង្ហាញពីការត្រលប់ទៅរកភាពស្និទ្ធស្នាលនៃរដ្ឋាភិបាលក្រុងអង់ការ៉ាជាមួយក្រុងម៉ូស្គូ ហើយវាក៏ជាសារសំខាន់មួយសម្រាប់លោកខាងលិចដែរ។ អ្វីដែលគួរឲ្យចាប់អារម្មណ៍ ប្រមុខរដ្ឋតួកគីខាងលើបានសង្កត់ធ្ងន់ថា លោកត្រៀមខ្លួនរួចរាល់ហើយដើម្បី ស្តារនិងប៉ះប៉ូវទំនាក់ទំនងដែលប្រេះស្រាំ និងចាប់ផ្តើមឡើងវិញនូវកិច្ចសហប្រតិបត្តិការទ្វេភាគីជាមួយរុស្ស៊ី។
ថ្លែងក្នុងបទសម្ភាសន៍ជាមួយភ្នាក់ងារសារព័ត៌មានរុស្ស៊ី TASS មុននឹងអញ្ជើញទៅជួបលោក វ្ល៉ាឌីមៀ ពូទីន នៅ St.Petersburg ប្រធានាធិបតីតួកគី អះអាងថា ជំនួបរវាងលោកជាមួយប្រធានាធិបតីរុស្ស៊ីនឹងបញ្ចប់ភាពតានតឹងនិងភាពល្អក់ករកដែលមានក្នុងទំនាក់ទំនងទ្វេភាគីទ្វេភាគី ក្រោយការបាញ់ទម្លាក់យន្តហោះរុស្ស៊ីនោះ។
លោកបន្តថា៖«ខ្ញុំជឿជាក់ថា យើងនឹងមានឱកាសក្នុងការពិភាក្សាលើបញ្ហាជាច្រើន ហើយទំព័រថ្មីនៃទំនាក់ទំនងរុស្ស៊ី-តួកគីនឹងបើកឡើងវិញ។ ការផ្លាស់ប្តូរទំនាក់ទំនងនេះនឹងរួមបញ្ចូលទាំងកិច្ចសហប្រតិបតិ្តការក្នុងផ្នែកយោធា សេដ្ឋកិច្ច និងវប្បធម៌ផងដែរ»។
ទំនាក់ទំនងរុស្ស៊ីជាមួយតួកគីដុនដាបខ្លាំង ក្រោយពេលដែលតួកគីសម្រេចបាញ់ទម្លាក់យន្តហោះចម្បាំងរុស្ស៊ីដែលហោះហើយនៅជាប់ព្រំដែនស៊ីរី។ ហើយ មកត្រឹមសប្តាហ៍នេះវាមានរយៈពេល ៨ខែហើយ ក្រោយការបាញ់ទម្លាក់យន្តហោះនេះ។ អ្វីដែលគួរឲ្យកត់សម្គាល់ លោក Tayyip Erdogan បានរៀបរាប់ផងដែរ ពីបញ្ហាលំបាកនានាដែលតួកគីជួបប្រឈម ក្រោយទំនាក់ទំនងជាមួយរុស្ស៊ីធ្លាក់ចុះដុនដាប ក្នុងបទសម្ភាសន៍ខាងលើដែរ។
លោកគូសបញ្ជាក់ថា ដោយសារទំនាក់ទំនងប្រេះស្រាំ គម្រោងធំៗជាច្រើនរវាងរុស្ស៊ីនិងតួកគីត្រូវបានព្យួរ ហើយតួកគីបាត់បង់ប្រយោជន៍ផ្នែកសេដ្ឋកិច្ចច្រើនដែរ។ នេះក៏ដោយសារ ក្រុងម៉ូស្គូបានសម្រេចដាក់ទណ្ឌកម្មប្រឆាំងតួកគី ហើយចំនួនទេសចររុស្ស៊ីដែលធ្លាប់ទៅកំសាន្តនៅតួកគីនោះក៏ស្រាប់តែថយចុះយ៉ាងគំហុករហូតដល់ជិត៩០ភាគរយក្នុងឆ្នាំ ២០១៦នេះ។
តាមពិតទៅ នេះជាដំណើរទស្សនកិច្ចទៅក្រៅប្រទេសដំបូងបំផុតរបស់ប្រធានាធិបតីតួកគី ចាប់តាំងពីមានរដ្ឋប្រហារបរាជ័យកើតឡើងកាលពីពាក់កណ្តាលខែកក្កដានោះ។ តួកគីរំពឹងថា ការស្តាទំនាក់ទំនងឲ្យល្អឡើងវិញរវាងតួកគីនិងរុស្ស៊ីនេះនឹងផ្តល់ប្រយោជន៍ច្រើន ហើយណាមួយវាក៏ជាសារមួយព្រមានដល់លោកខាងលិចជាពិសេសអាមេរិកផងដែរ។ តួកគីកន្លងមកបានចោទប្រកាន់សហរដ្ឋអាមេរិក ថាជាអ្នកដែលពាក់ព័ន្ធចលនារដ្ឋប្រហារនេះ។ ហើយរដ្ឋាភិបាលតួកគីបានស្នើឲ្យក្រុងវ៉ាស៊ីនតោនធ្វើបត្យាប័នបញ្ជូនលោក Fethullah Gulen ដែលត្រូវគេចោទថាជាអ្នកនៅពីក្រោយចលនារដ្ឋប្រហារនោះមកប្រទេសតួកគីវិញដើម្បីកាត់ទោសផងដែរ៕
Tag:
វ្ល៉ាឌីមៀ ពូទីន
Tayyip Erdogan
Fethullah Gulen
© រក្សាសិទ្ធិដោយ thmeythmey.com