មជ្ឈមណ្ឌលយុទ្ធសាស្ត្រនិងសិក្សាអន្តរជាតិ អាមេរិកបានបញ្ចេញរូបភាពផ្កាយរណបថ្មីដែលបង្ហាញឲ្យឃើញពីសំណង់ឃ្លាំងយន្តហោះដែលសង់ឡើងនៅក្នុងតំបន់សមុទ្រចិនខាងត្បូង។ គេវាយតម្លៃថា សំណង់នេះជាផ្នែកមួយនៃយុទ្ធសាស្ត្រយោធូបនីយកម្មតំបន់ជម្លោះ ហើយបើមានការពង្រាយយន្តហោះចម្បាំងមែនវានឹងធ្វើឲ្យការតានតឹងកើនឡើងនិងធ្វើឲ្យបញ្ហាកាន់តែស្មុគស្មាញ។
រូបភាពផ្កាយរណបថ្មីបង្ហាញថា ចិនបន្តសាងសង់សំណង់សម្រាប់បម្រើប្រយោជន៍យោធានៅក្នុងតំបន់ជម្លោះសមុទ្រចិនខាងត្បូង។ បើយោងតាមទំហំនិងរូបរាងនៃសំណង់ថ្មីនេះ វានេះត្រូវបានគេអះអាងថាជាឃ្លាំងផ្ទុកយន្តហោះចម្បាំង ហើយវាសម្រួលដល់ការប្រើប្រាស់យន្តហោះចម្បាំងក្នុងពេលមានកាលៈទេសៈចាំបាច់។
យោងតាមសារព័ត៌មាន New York Times រូបភាពថ្មីនេះត្រូវប្រមូលនិងត្រួតពិនិត្យក៏ដូចជាវិភាគវាយតម្លៃដោយស្ថាប័នស្រាវជ្រាវអាមេរិក វិទ្យាស្ថានយុទ្ធសាស្ត្រនិងសិក្សាអន្តរជាតិ។ ស្ថាប័នខាងលើអះអាងថា អ្វីដែលចិនបានសាងសង់នោះជាឃ្លាំងផ្ទុកយន្តហោះ ហើយវាត្រូវបានសាងសង់ឡើងលើទីតាំងជម្លោះចំនួនបី ក្នុងនោះមាន Fiery Cross, Subi និង Mischief Reefs។
យ៉ាងណាក៏ដោយ រូបភាពដៃលថតដោយផ្កាយរណបនេះមិនមានបង្ហាញរូបយន្តហោះនៅទីកន្លែងខាងលើឡើយ។ បើតាមរបាយការណ៍វិភាគនៃស្ថាប័នខាងលើ សំណង់ឃ្លាំងសម្រាប់ដាក់យន្តហោះដែលត្រូវបានសង់ឡើងនេះវាមានទំហំធំ ហើយអាចដាក់យន្តហោះចម្បាំងគ្រប់ប្រភេទរបស់កងទ័ពរំដោះប្រជាជនចិន។
របាយការណ៍ដដែលបានបន្តថា ប្រភេទឃ្លាំងធំដែលសង់លើតំបន់ជម្លោះនេះអាចផ្ទុកយន្តហោះយុទ្ធសាស្ត្រសម្រាប់ទម្លាក់គ្រាប់បែក H-6 , យន្តហោះសម្រាប់ចាក់សាំង H-6U, យន្តហោះដឹកជញ្ជូន Y-8 និងយន្តហោះដឹកជញ្ជូនប្រព័ន្ធប្រកាសអាសន្ននិងគ្រប់គ្រង KJ 200 ថែមទៀតផង។
យ៉ាងណាមិញ រឿងដែលគួរឲ្យកត់សម្គាល់នោះគឺ រូបភាពផ្កាយរណបបង្ហាញពីឃ្លាំងផ្ទុកយន្តហោះចិន កើតឡើងប្រហែលមួយខែបុណ្ណោះក្រោយពេលតុលាការមជ្ឈការអន្តរជាតិចេញសេចក្តីសម្រេចទាត់ចោលការទាមទាររបស់ចិនក្នុងតំបន់ជម្លោះសមុទ្រចិនខាងត្បូងដោយផ្អែកតាមលក្ខខណ្ឌប្រវត្តិសាស្ត្រ និងរួមទាំងកោះសិប្បនិម្មិតដែលចិនកសាងប៉ុន្មានឆ្នាំមកនេះផង។ ប៉ុន្តែចិនទាត់ចោលសេចក្តីសម្រេចនេះ។
តាមពិតទៅ ការសាងសង់កន្លែងផ្ទុកយន្តហោះនៅក្នុងតំបន់ជម្លោះ ស្ថិតក្រោមយុទ្ធសាស្ត្រនៃការរៀបចំយោធូបនីយកម្មតំបន់ជម្លោះរបស់រដ្ឋាភិបាលក្រុងប៉េកាំង។ ប្រសិន បើអាចមានការពង្រាយយន្តហោះចម្បាំងទៅកាន់ទីតាំងខាងលើនៅពេលខាងមុខនោះ វានឹងកាន់តែធ្វើឲ្យភាពតានតឹងកើនឡើង ហើយអាមេរិកយល់ថា វាជាការគំរាមកំហែងចំពោះសេរីភាពនៃការធ្វើនាវាចរណ៍របស់ខ្លួនក្នុងតំបន់ផងដែរ។
កន្លងមកមហាយក្សចិនថា ខ្លួនសាងសង់កោះសិប្បនិម្មិតនិងសំណង់នានារួមមានហេដ្ឋារចនាសម្ព័ន្ធនោះគឺដើម្បីបម្រើប្រយោជន៍ស៊ីវិលប៉ុណ្ណោះ មិនមែនជាសកម្មភាពយោធូបនីយកម្មអ្វីឡើយ។ ហើយវានឹងត្រូវប្រើប្រាស់ក្នុងគោលដៅមនុស្សធម៌ ហើយចិនស្វាគមន៍ប្រទេសជាមិត្តឲ្យចូលប្រើប្រាស់សំណង់របស់ខ្លួនថែមទៀត៕