អន្តរជាតិ
មីយ៉ាន់ម៉ា៖ ភ្ញៀវទេសចរដែលធ្វើឲ្យប៉ះពាល់ពុទ្ធសាសនាត្រូវបណ្តេញចេញភ្លាមៗ
× កាលពីខែកក្កដា កន្លងមក អាជ្ញាធរមីយ៉ាន់ម៉ា បានបណ្តេញភ្ញៀវទេសចរអេស្ប៉ាញ២នាក់ប្តីប្រពន្ធ បន្ទាប់ពីរកឃើញ បុរសដែលជាប្តីសាក់រូបព្រះពុទ្ធនៅលើកំភួនជើងរបស់ខ្លួន។ នេះបើតាមការផ្សាយរបស់ Myanmar Times។
អាជ្ញាធរប៉ូលិសតំបន់ Mandalay បានសម្រេចបណ្តេញបុរសអេស្ប៉ាញ និងភរិយាចេញពីមូលដ្ឋានរបស់ខ្លួនភ្លាមៗ បន្ទាប់ពីបានរកឃើញថា បុរសរូបនោះ បានបង្ហាញសាក់រូបព្រះពុទ្ធនៅលើកំភួនជើងរបស់ខ្លួន នៅពេលទស្សនាវត្ត Kantotpalin Pagoda។
ភ្ញៀវទេសចរអេស្ប៉ាញទាំងពីរ ត្រូវបានបញ្ជូនចេញភ្លាមៗទៅទីក្រុងយាំងហ្គោន មុនពេលដែលស្ថានទូតអេស្ប៉ាញ សហការរៀបចំឯកសារបណ្តេញពួកគេចេញពីប្រទេសមីយ៉ាន់ម៉ា កាលពីថ្ងៃទី១០ ខែកក្កដា កន្លងមក។
បើតាម Myanmar Times នេះមិនមែនជាលើកទីមួយនោះឡើយ ដែលអាជ្ញាធរមីយ៉ាន់ម៉ា បណ្តេញភ្ញៀវទេសចរដែលមើលងាយព្រះពុទ្ធសាសនា។ កាលពីឆ្នាំ២០១៤ បុរសកាណាដា និងមិត្តស្រីរបស់ខ្លួនត្រូវបានឃុំខ្លួនបន្ទាប់ពីពួកគេបានបង្ហោះរូបថតនៅលើបណ្តាញសង្គមដែលមានសាក់រូបព្រះពុទ្ធនៅលើជើង។
កាលពីឆ្នាំ២០១៥ ម្ចាស់រង្គសាលនូវេលសេឡង់ម្នាក់ ក៏ត្រូវបានចោទប្រកាន់ផងដែរ បន្ទាប់ពីរូបគេបានផ្សព្វផ្សាយពាណិជ្ជកម្មបញ្ចុះថ្លៃស្រា ដោយភ្ជាប់ជាមួយរូបភាពព្រះពុទ្ធពាក់កាស់ត្រចៀក។
AFP បានដកស្រង់សម្តីអាជ្ញាធរមីយ៉ាន់ម៉ាថា ប្រទេសមួយនេះរំពឹងទទួលបានភ្ញៀវទេសចរប្រមាណ៧,៥លាននាក់ក្នុងមួយឆ្នាំចាប់ពីឆ្នាំ២០១៩ខាងមុខ។ ទីតាំងព្រះពុទ្ធសាសនា ជាទិសដៅដ៏គួរឲ្យចាប់អារម្មណ៍របស់ភ្ញៀវទេសចរ ប៉ុន្តែពួកគេប្រឈមនឹងការពិន័យ ប្រសិនបើបង្កកំហុសណាមួយ ទាំងចេតនា និងអចេតនា៕
© រក្សាសិទ្ធិដោយ thmeythmey.com