អន្តរជាតិ
នយោបាយអន្តរជាតិ
×![]()
ដោយ: ថ្មីៗ
មន្ត្រីទូតលោកខាងលិចអះអាងថា រដ្ឋាភិបាលក្រុងហាណូយ បានពង្រាយជើងទម្រសម្រាប់បាញ់គ្រាប់រ៉ុក្កែត ទៅកាន់កោះរបស់ខ្លួនដែលស្ថិតតំបន់ជម្លោះសមុទ្រចិនខាងត្បូងរួចហើយ។ បើមានការបំពាក់កាំភ្លើងធំបាញ់គ្រាប់រ៉ុក្កែតរួចរាល់លើជើងទម្រចល័តនេះ វាអាចមានសមត្ថភាពបាញ់កម្ទេចផ្លូវយន្តហោះ និងហេដ្ឋារចនាសម្ព័ន្ធយោធារបស់ចិន ដែលសង់នៅលើក្នុងតំបន់ជម្លោះបាន។ ប៉ុន្តែក្រសួងការបរទេសវៀតណាមថា វាជាព័ត៌មានមិនច្បាស់ការ តែមិនបានបកស្រាយបន្ថែមឲ្យច្បាស់លាស់ឡើយ។ 
យោងតាមទីភ្នាក់ងារព័ត៌មាន Reuters មន្ត្រីទូតនិងយោធាលោកខាងលិចបានទម្លាយព័ត៌មានថា រដ្ឋាភិបាលវៀតណាមបានបញ្ជូនទម្រសម្រាប់បាញ់គ្រាប់រ៉ុក្កែត ទៅកាន់កោះដែលស្ថិតក្នុងតំបន់ជម្លោះសមុទ្រចិនខាងត្បូងរួចរាល់ហើយ។ មន្ត្រីដែលមិនបានបង្ហាញអត្តសញ្ញាណខាងលើ លើកឡើងថា ទម្របាញ់គ្រាប់រ៉ុក្កែតនេះត្រូវបានគេដឹកចេញពីទឹកដីវៀតណាម ទៅដំឡើងនៅមូលដ្ឋានចំនួន ៥ស្ថិតនៅលើកោះស្ព្រាត់លី។
យោងតាមប្រភពដដែល ទម្រសម្រាប់បាញ់គ្រាប់រ៉ុក្កែតនេះមិនត្រូវបានគេថត ឬផ្តិតយកពីលើអាកាសដោយភ្នាក់ងារចារកម្មឡើយ ហើយសម្ភារយោធាទាំងនេះ មិនទាន់ត្រូវបានគេបំពាក់កាំភ្លើងធំបាញ់រ៉ុក្កែតនៅឡើយដែរ។ គេវាយតម្លៃថា ការបំពាក់កាំភ្លើងធំបាញ់គ្រាប់រ៉ុក្កែតលើទម្រនេះ អាចត្រូវគេដាក់ដំណើរការក្នុងរយៈពេលត្រឹមតែពីរ ឬបីថ្ងៃប៉ុណ្ណោះ។
យ៉ាងណាមិញ ក្រសួងការបរទេសវៀតណាម បានប្រាប់ទីភ្នាក់ងារព័ត៌មាន Reuters ថា ព័ត៌មានខាងលើជាព័ត៌មានមិនច្បាស់លាស់។ តែក្រសួងមិនបានផ្តល់ព័ត៌មានបន្ថែម ឬបកស្រាយអ្វីឡើយ។ ថ្វីបើមានការអះអាងថាការពង្រាយសព្វាវុធទៅកោះជម្លោះនេះ ជារឿងមិនច្បាស់ការក្តី កាលពីខែមិថុនាអនុរដ្ឋមន្ត្រីការពារជាតិវៀតណាម លោក Nguyen Chi Vinh បានលើកឡើងថា វៀណាមមានសិទ្ធិក្នុងការពង្រាយសព្វាវុធ ទៅកាន់ទីកន្លែងណាដែលស្ថិតក្រោមអធិបតេយ្យខ្លួនបានគ្រប់ពេលវេលា។ តែលោកបញ្ជាក់ថា មកទល់ពេលនេះវៀតណាមមិនទាន់បានពង្រាយសព្វាវុធ ដូចការលើកឡើងនោះឡើយ។
ការទម្លាយព័ត៌មានរឿងពង្រាយសព្វាវុធទៅកាន់តំបន់ជម្លោះនេះ កើតឡើងស្របពេលដែលស្ថាប័នស្រាវជ្រាវអាមេរិកបញ្ចេញរូបភាពថតដោយផ្កាយរណបដែលបង្ហាញថា ចិនសង់ឃ្លាំងផ្ទុកយន្តហោះចម្បាំងនៅតំបន់ជម្លោះ។ ហើយអ្វីដែលមិនអាចប្រកែកបាននោះ គឺចិននៅបន្តសកម្មភាពយោធូបនីយកម្មរបស់ខ្លួន នៅក្នុងតំបន់ជម្លោះដោយសង់ហេដ្ឋារចនាសម្ព័ន្ធ បំពាក់រ៉ាដា និងសំណង់នានា ដែលបម្រើប្រយោជន៍យោធាបាននោះ។ អ្វីដែលចិនសាងសង់នោះ ជារួមបង្កគ្រោះថ្នាក់សម្រាប់ភាគីជម្លោះឯទៀត ជាពិសេសវៀតណាមតែម្តង។
អ្នកយុទ្ធសាស្ត្រយោធាវៀតណាមបារម្ភថា ការកសាងសំណង់យោធានេះ នឹងធ្វើឲ្យសមត្ថភាពការពារខ្លួនរបស់វៀតណាម កាន់តែគ្រោះថ្នាក់ខ្លាំង។ ដូច្នេះហើយ ការពង្រាយសព្វាវុធជាពិសេសឧបករណ៍បាញ់គ្រាប់រ៉ុក្កែត ជារឿងចាំបាច់សម្រាប់វៀតណាម។
បើតាមប្រភពមន្ត្រីលោកខាងលិចខាងលើដដែល ឧបករណ៍បាញ់គ្រាប់រ៉ុក្កែតនេះ ជាផ្នែកមួយនៃប្រព័ន្ធបាញ់មីស៊ីលដ៏ទំនើប EXTRA ដែលវៀតណាមទើបទិញពីអ៊ីស្រាអែល។ ប្រព័ន្ធមីស៊ីល EXTRA នេះ អាចមានសមត្ថភាពខ្ពស់អាចបាញ់ដល់ចម្ងាយ ១៥០គីឡូម៉ែត្រ និងអាចបាញ់ក្បាល់គ្រាប់ច្រើនប្រភេទ និងអាចបាញ់នាវា និងវត្ថុឬទីតាំងនានា នៅលើដីផងដែរ។
រយៈពេលប៉ុន្មានឆ្នាំមកនេះ វៀតណាមបានចំណាយលុយច្រើនសន្ធឹកសន្ធាប់ ដើម្បីពង្រឹងសមត្ថភាពនិងធ្វើទំនើបកម្មយោធា។ វៀតណាមផ្តោតសំខាន់លើការបង្កើនសមត្ថភាពកងទ័ពជើងទឹក និងជើងអាកាសហើយវៀតណាម បានទិញនាវាមុជទឹក៦គ្រឿង និងយន្តហោះចម្បាំងជាច្រើនគ្រឿងផងដែរពីរុស្ស៊ីកន្លងមក។ ហើយវៀតណាមជឿជាក់ថា សមត្ថភាពយោធានេះ យ៉ាងហោចណាស់អាចធ្វើឲ្យចិនញញើតដែរ។
ត្រលប់មកវិញ ទាក់ទិនបញ្ហានេះ អ្នកជំនាញផ្នែកយោធាវៀតណាម នៃរាជបណ្ឌិតសភាយោធាអូស្ត្រាលីលោក Carl Thayer បានមានប្រសាសន៍ថា ការពង្រាយទម្របាញ់គ្រាប់រ៉ុក្កែតនេះបង្ហាញពីការប្រឹងប្រែងរបស់វៀតណាម ក្នុងការកំញើញចិនតាមដែលអាចធ្វើបាន។ លោកបន្តថា៖« ផ្លូវយន្តហោះ និងការធ្វើយោធូបនីយកម្មរបស់ចិន នៅលើកោះស្ព្រាត់លី ជាឧបសគ្គមួយសម្រាប់វៀតណាម ជាពិសេសនៅដែនទឹក និងដែនអាកាសភាគខាងត្បូង។ ហើយវៀតណាមកំពុងបង្ហាញថា គេត្រៀមខ្លួនដើម្បីប្រឆាំងរាល់ការគំរាមកំហែងពីខាងក្រៅ»៕
Tag:
វៀតណាម
សមុទ្រចិនខាងត្បូង
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
14 ម៉ោង
