តុលាការកំពូល ត្រូវការពេល១សប្តាហ៍ ដើម្បីពិចារណាថា ដោះលែងលោក អ៊ុំ សំអាន ឬបន្តឃុំខ្លួន

ជាតិ

តុលាការកំពូល ត្រូវការពេល១សប្តាហ៍ ដើម្បីពិចារណាថា ដោះលែងលោក អ៊ុំ សំអាន ឬបន្តឃុំខ្លួន

10, Aug 2016 , 7:39 pm

រូបភាព

ដោយ: ម៉ៅ សុផា

ភ្នំពេញ៖ នៅព្រឹកថ្ងៃទី១០ ខែសីហា ឆ្នាំ២០១៦ នេះ តុលាការកំពូល បានចំណាយពេលប្រហែល១ម៉ោង ក្នុងការជំនុំជម្រះ លើសំណើសុំនៅក្រៅឃុំរបស់លោក អ៊ុំ សំអាន តំណាងរាស្ត្រនៃគណបក្សសង្គ្រោះជាតិ។ ក្រោយបញ្ចប់សវនាការ តុលាការកំពូល បានពន្យារពេលក្នុងការប្រកាសសាលដីកា។ សាលដីកា នឹងត្រូវប្រកាសនៅថ្ងៃទី១៧ ខែសីហា ឆ្នាំ២០១៦ ឯណោះវិញ។

ការមិនទាន់ប្រកាសដីកានៅថ្ងៃនេះ គឺដោយសារតែក្រុមប្រឹក្សានៃអង្គជំនុំជម្រះ ត្រូវការពេលវេលាឲ្យបានគ្រប់គ្រាន់ក្នុងការពិចារណា មុននឹងសម្រេចថា ត្រូវដោះលែង ឬបន្តឃុំខ្លួន លោក អ៊ុំ សំអាន។ នេះបើតាមលោក ហែម សុជាតិ មេធាវី១រូប ក្នុងចំណោមមេធាវីទាំង៣រូប របស់លោកលោក អ៊ុំ សំអាន ដែលថ្លែងប្រាប់ក្រុមអ្នកសារព័ត៌មាន ក្រោយចាកចេញពីបន្ទប់សវនាការ។

បើទោះបីជា សេចក្តីសម្រេចមិនទាន់ត្រូវបានប្រកាសក៏ដោយ តែលោក ហែម សុជាតិ ហាក់ដូចជាសង្ឃឹមថា កូនក្តីរបស់លោក អាចនឹងទទួលលទ្ធផលវិជ្ជមានពីតុលាការកំពូល។ លោក ហែម សុជាតិ អះអាងថា លោក អ៊ុំ សំអាន មិនបានប្រព្រឹត្តបទល្មើសជាក់ស្តែង ដូចការចោទប្រកាន់កន្លមមកទេ ហើយជាពិសេសនោះ កូនក្តីរបស់លោក គឺជាតំណាងរាស្ត្រ ដែលកំពុងមានអភ័យឯកសិទ្ធិជាប់នឹងខ្លួនថែមទៀត។ យោងតាមហេតុផលខាងលើ លោកមេធាវីរូបនេះ ជឿជាក់ថា តុលាការកំពូល នឹងពិចារណាឲ្យបានច្បាស់លាស់ ហើយដោះលែងលោក អ៊ុំ សំអាន ឲ្យមានសេរីភាពឡើងវិញ។

ចំណែកឯ លោក អ៊ុំ សំអាន បានស្រែកប្រាប់ក្រុមអ្នកសារព័ត៌មានថា ការឃុំខ្លួនលោក ជាតំណាងរាស្ត្រ ទាំងមានអភ័យឯកសិទ្ធិបែបនេះ គឺជាការរំលោភលើរដ្ឋធម្មនុញ្ញ។ លោក អ៊ុំ សំអាន នៅតែរិះគន់តុលាការ ថាស្ថិតនៅក្រោមការបង្គាប់បញ្ជារបស់អ្នកមានអំណាច។ តំណាងរាស្ត្របក្សប្រឆាំងរូបនេះ បានរិះគន់រដ្ឋាភិបាលធ្ងន់ៗថា៖«លោក ហ៊ុន សែន និងគណបក្សប្រជាជនបានធ្វើរដ្ឋប្រហាររដ្ឋធម្មនុញ្ញ ដោយឃុំខ្លួនខ្ញុំ ជាតំណាងរាស្ត្រ ដែលកំពុងមានអភ័យឯកសិទ្ធិ។ លោកនាយករដ្ឋមន្ត្រី ហ៊ុន សែន កំពុងកាន់អំណាចផ្តាច់ការ។ យើងដឹងហើយថា តុលាការ គ្រាន់តែជាឧបករណ៍របស់អ្នកកាន់អំណាច ប៉ុណ្ណោះ»។

បន្ទាប់ពីលោក អ៊ុំ សំអាន ត្រូវបានបញ្ជូនទៅកាន់ពន្ធនាគារព្រៃស ក្រុមមេធាវី ក៏បានស្នើឲ្យសាលាដំបូងរាជធានីភ្នំពេញ ដោះលែងតំណាងរាស្ត្ររូបនេះ ឲ្យមានសេរីភាពឡើងវិញ។ ប៉ុន្តែសាលាដំបូងរាជធានីភ្នំពេញ បានច្រានចោល។ ក្រុមមេធាវី បានបន្តប្តឹងទៅសាលាឧទ្ធរណ៍ ដើម្បីប្រឆាំងនឹងសេចក្តីសម្រេចរបស់តុលាការរាជធានីភ្នំពេញ ដែលមិនអនុញ្ញាតឲ្យលោក អ៊ុំ សំអាន រួចផុតពីការឃុំឃាំង។ ជាអកុសល ក្រុមមេធាវី បានបរាជ័យជាលើកទី២ ដោយសាលាឧទ្ធរណ៍ គាំទ្រសាលក្រមរបស់តុលាការរាជធានីភ្នំពេញ ហើយក៏សម្រេចតម្កល់សំណុំរឿងរបស់លោក អ៊ុំ សំអាន ទុកជាបានការ។

សូមបញ្ជាក់ថា នៅថ្ងៃទី១២ ខែមេសាកន្លងទៅ តុលាការក្រុងភ្នំពេញ បានចោទប្រកាន់ លោក អ៊ុំ សំអាន ពីបទ ញុះញង់ឲ្យប្រព្រឹត្តបទឧក្រិដ្ឋជាអាទិ៍ និង ញុះញង់ឲ្យមានការរើសអើង តាមមាត្រា ៤៩៥ និងមាត្រា ៤៩៦ នៃក្រមព្រហ្មទណ្ឌ ពាក់ព័ន្ធនឹងការបញ្ចេញទស្សនៈពីបញ្ហាព្រំដែន តាមហ្វេសប៊ុក កាលពីឆ្នាំ២០១៥ ។ ក្រោយមកករណីលោក អ៊ុំ សំអាន ត្រូវបានសមាជិករដ្ឋសភា មកពីគណបក្សប្រជាជនកម្ពុជាបោះឆ្នោត គាំទ្រឱ្យតុលាការ និងសមត្ថកិច្ចអនុវត្តនីតិវិធីបន្ត ចំពោះតំណាងរាស្ត្រគណបក្សប្រឆាំងរូបនេះ៕