អន្តរជាតិ
តួកគីនិងរុស្ស៊ីត្រឡប់មកស្និទ្ធស្នាលជាមួយគ្នាវិញ ធ្វើឲ្យលោកខាងលិចបារម្ភ
× ចុងក្រោយប្រធានាធិបតីរុស្ស៊ី វ្ល៉ាឌីមៀ ពូទីន និងប្រធានាធិបតីតួកគី Recep Tayyip Erdogan បានឯកភាពគ្នាបើកទំព័រទំនាក់ទំនងទ្វេភាគីឡើងវិញនិងប្តេជ្ញាពង្រឹងចំណងមិត្តភាពនេះផង។ គម្រោងថាមពលរួមគ្នានឹងចាប់ផ្តើមឡើងវិញ ហើយរុស្ស៊ីដកទណ្ឌកម្ម និងជំរុញឲ្យទេសចរទៅទស្សនកិច្ចនៅតួកគីដូចមុនដែរ។ តែលោកខាងលិចទំនងជាមិនសប្បាយចិត្តឡើយពេល ភាគីទាំងពីរត្រូវរ៉ូវគ្នាបែបនេះ។
វត្តមានប្រធានាធិបតីតួកគីលោក Recep Tayyip Erdogan នៅទឹកដីរុស្ស៊ី និងជួបពិភាក្សាជាមួយប្រមុខរដ្ឋរុស្ស៊ី វ្ល៉ាឌីមៀ ពូទីនផងនោះនាថ្ងៃអង្គារទី ៩សីហាម្សិលមិញ បញ្ជាក់ច្បាស់ថា ភាពល្អក់ករកនិងប្រេះឆាផ្នែកការទូតត្រូវបានប៉ះប៉ូវហើយ។ តែភាពស្និទ្ធស្នាលរបស់មេដឹកនាំទាំងពីរធ្វើឲ្យលោកខាងលិចបារម្ភមិនតិចដែរ ព្រោះការប្រែប្រួលទំនាក់ទំនងរុស្ស៊ីនិងតួកគី នឹងអាចធ្វើឲ្យលោកខាងលិចប្រឈមភាពស្មុគស្មាញខ្លាំងក្នុងការដោះស្រាយជម្លោះស៊ីរី, បញ្ហាជនភៀសខ្លួន និងការប្រឆាំងភេរវកម្មជាដើមផង។
យោងតាមសារព័ត៌មាន Washington Post គ្រាន់តែជួបពិភាក្សាគ្នាហើយ ប្រធានាធិបតីតួកគី ហៅប្រធានាធិបតីរុស្ស៊ីលោក ពូទីន ថាជា«មិត្តសំឡាញ់» ក្នុងសន្និសីទសារព័ត៌មានដែលរៀបចំឡើងនៅក្រុង St. Petersburg ។ លោកអំពាវនាវឲ្យមានការផ្លាស់ប្តូរទំនាក់ទំនងទៅរកស្ថានភាពមុនមានវិបត្តិការទូត ឬខ្ពស់ជាងនោះផងដែរ។
ក្រោយកិច្ចពិភាក្សា មេដឹកនាំទាំងពីរក៏ឯកភាពគ្នាថា នឹងប្រឹងប្រែងពង្រឹងចំណងការទូតនេះឲ្យបានខ្លាំងកា្ល និងធ្វើយ៉ាងណាពង្រីកសហប្រតិបត្តិការដោយឈរលើគោលការណ៍គោរពប្រយោជន៍គ្នាទៅវិញទៅមកផងដែរ។ ភាគីរុស្ស៊ីសន្យាដកទណ្ឌកម្ម និងជំរុញឲ្យអ្នកទេសចរត្រឡប់ទៅកំសាន្តនៅតួកគីវិញ ហើយគម្រោងពាក់ព័ន្ធវិស័យថាមពលទាំងអម្បាលម៉ាននឹងត្រូវចាប់ផ្តើមដំណើរការឡើងវិញចាប់ពីពេលនេះផងដែរ។
សូមបញ្ជាក់បន្តិចដែរ ទំនាក់ទំនងរុស្ស៊ីជាមួយតួកគីដុនដាបខ្លាំង ក្រោយពេលដែលតួកគីសម្រេចបាញ់ទម្លាក់យន្តហោះចម្បាំងរុស្ស៊ីដែលហោះហើរនៅជាប់ព្រំដែនស៊ីរី។ ហើយ មកត្រឹមសប្តាហ៍នេះវាមានរយៈពេល ៨ខែហើយ ក្រោយការបាញ់ទម្លាក់យន្តហោះនេះ។ ហើយតួកគីជួបប្រឈមបញ្ហាច្រើនណាស់ ក្រោយទំនាក់ទំនងជាមួយរុស្ស៊ីធ្លាក់ចុះដុនដាបខ្លាំង ព្រោះគម្រោងធំៗជាច្រើនរវាងរុស្ស៊ីនិងតួកគីត្រូវបានព្យួរ ហើយតួកគីបាត់បង់ប្រយោជន៍ផ្នែកសេដ្ឋកិច្ចច្រើនដែរ។ នេះក៏ដោយសារ ក្រុងម៉ូស្គូបានសម្រេចដាក់ទណ្ឌកម្មប្រឆាំងតួកគី ហើយចំនួនទេសចររុស្ស៊ីដែលធ្លាប់ទៅកំសាន្តនៅតួកគីនោះក៏ស្រាប់តែថយចុះយ៉ាងគំហុករហូតដល់ជិត៩០ភាគរយក្នុងឆ្នាំ ២០១៦នេះ។
ដោយឡែក ក្រៅពីលើកឡើងពីការពង្រឹងទំនាក់ទំនងទ្វេភាគី លោក Erdogan ក៏បានអរគុណសមភាគីរុស្ស៊ីដែលបានផ្តល់ជំនួយដល់តួកគីក្រោយពេលរដ្ឋប្រហារបរាជ័យនៅតួកគីដើម្បីផ្តួលរលំរបបដឹកនាំស្របច្បាប់កាលពីពាក់កណ្តាលខែកក្កដាដែរ។ កន្លងមកប្រមុខរដ្ឋតួកគីខាងលើបានរិះគន់លោកខាងលិចចំពោះការគាំទ្រដោយប្រយោលចំពោះរដ្ឋប្រហារយោធាបរាជ័យកន្លងមក និងចលនាកុប្បកម្មដែលបានសម្លាប់មនុស្សអស់ប្រហែល ២៥០នាក់នោះ។ ហើយមេដឹកនាំតួកគីនេះក៏បន្តទាមទារឲ្យសហរដ្ឋអាមេរិកធ្វើបត្យាប័នបញ្ជូនបុព្វជិតផ្សព្វផ្សាយសាសនាលោក Fethullah Gulenដែលកំពុងស្ថិតនៅអាមេរិកមកតួកគីដើម្បីកាត់ទោសផងដែរ។
ឆ្លើយតបចំពោះការអរគុណដល់ការផ្តល់ជំនួយរបស់រុស្ស៊ីពីសំណាក់ប្រធានាធិបតីតួកគី លោក ពូទីន ថ្លែងប្រាប់វិញថា៖«នេះជាគោលជំហរជាគោលការណ៍របស់យើង។ យើងតែតែងប្រឆាំងដាច់ខាតចំពោះរាល់សកម្មភាពណាដែលប្រឆាំងរដ្ឋធម្មនុញ្ញ»៕
Tag:
វ្ល៉ាឌីមៀ ពូទីន
Recep Tayyip Erdogan
Fethullah Gulen
© រក្សាសិទ្ធិដោយ thmeythmey.com