ប្លែកៗ
អន្តរជាតិ
បន្ទាប់ពីក្រុងឡុងដ៍ ប៉ារីសនឹងមានភោជនីយដ្ឋានស្រាតនាពេលខាងមុខ
× បន្ទាប់ពីក្រុងឡុងដ៍ ប្រទេសអង់គ្លេស ភោជនីយដ្ឋានសម្រាប់ភ្ញៀវដែលចូលចិត្តស្រាត អាចនឹងបើកដំណើរនាពេលឆាប់ៗខាងមុខនៅក្នុងទីក្រុងប៉ារីស ប្រទេសបារាំង។ នេះបើតាមការលើករបស់លោក Sebastian Lyall ដែលជាអ្នកផ្តួចផ្តើមគំនិត ក្នុងបទសម្ភាសមួយជាមួយទីភ្នាក់ងារព័ត៌មាន AFP។
លោក Sebastian Lyall ទើបតែដំណើរការសេវាកម្មភោជនីយដ្ឋានស្រាតនៅទីក្រុងឡុងដ៍ ហើយលោកចង់ពង្រីកអាជីវកម្មនេះបន្ថែមនៅក្នុងប្រទេសបារាំង ដោយលោកចង់ទាក់ទាញភ្ញៀវដែលមាននិស្ស័យ និងទស្សនៈធម្មជាតិនិយម។
លោកបានបញ្ជាក់ប្រាប់ AFP ថា៖ «យើងកំពុងពិភាក្សាជាមួយដៃគូរកស៊ីធំៗ។ យើងមិនដឹងចាប់ផ្តើមនៅពេលណានោះទេ ប៉ុន្តែយើងរកទីតាំងដែលមានសក្តានុពលនៅក្នុងទីក្រុងប៉ារីស។ ទន្ទឹមនឹងគិតថា វាអាចដំណើរការទៅមុខ យើងក៏នឹងពិចារណាលើផ្លូវច្បាប់ផងដែរ ដើម្បីធ្វើទៅកុំឲ្យខុស»។
កាលពីពេលថ្មីៗនេះ លោក Lyall បានបើកដំណើរការភោជនីយដ្ឋាន «The Bunyadi» (ធម្មជាតិ) នៅទីក្រុងឡុងដ៍។ មនុស្សយ៉ាងហោចណាស់៤៦០០០នាក់ បានចុះឈ្មោះកក់តុ ប៉ុន្តែមានតែ២៥០០នាក់ប៉ុណ្ណោះដែលភ្លក់រសជាតិម្ហូបអាហារនៅ The Bunyadi ជាមួយរាងកាយស្រាតននោលគោក ចន្លោះពីខែឧសភា ដល់ខែមិថុនា។
នៅភោជនីយដ្ឋានស្រាត បញ្ជីមុខម្ហួបក៏ពិសេសផងដែរ ដោយប្រើប្រាស់បន្លែសរីរាង្គ ហើយការចម្អិនមិនប្រើប្រាសអគ្គិសនី ហ្គាស ឬភ្លើងនោះឡើយ។ តាមគំរូនៅទីក្រុងឡុងដ៍ ភោជនីយដ្ឋានស្រាតនៅបារាំង នឹងមានបញ្ជីមុខម្ហូបភាគច្រើន គឺសាច់ឆៅ និងបន្លែស្រស់ ដោយ៣មុខ មានតម្លៃជាង៥០ដុល្លារអាមេរិក។ បន្ថែមពីលើនេះ អតិថិជននឹងបានហូបអាហារក្រោមពន្លឺភ្លើងទៀន និងមានដើមឫស្សី នៅជុំវិញខ្លួនជាដើម។
ទោះបីជាយ៉ាងណាក៏ដោយ សហព័ន្ធអ្នកស្រឡាញ់ធម្មជាតិបារាំង មើលឃើញថា វាជាការបើកអាជីវកម្មទាំងស្រុង មិនជាប់ពាក់ព័ន្ធអ្វីនឹងការលើកកម្ពស់ការស្រឡាញ់ធម្មជាតិនោះឡើយ។ លោក Yves Leclerc ដែលជាអនុប្រធានសហព័ន្ធ បានកត់សម្គាល់ថា ការបើកបម្រើសេវាកម្មភោជនីយដ្ឋានស្រត មិនមែនជារឿងថ្មីនោះឡើយ ហើយលោកយល់ថា ការលើកកម្ពស់ការស្រឡាញ់ធម្មជាតិ មិនចាំបាច់ដើរស្រាតចូលភោជនីយដ្ឋាននោះឡើយ៕
Tag:
ភោជនីយដ្ឋានស្រាត
ធម្មជាតិ
© រក្សាសិទ្ធិដោយ thmeythmey.com