បាក់ឌុប៖គ្រូល្បីៗនៅជ័យថាវី បង្រៀនមិនតិចជាង១០ម៉ោងក្នុងមួយថ្ងៃ

ជាតិ

បទយកការណ៍ / បទសម្ភាសន៍

បាក់ឌុប៖គ្រូល្បីៗនៅជ័យថាវី បង្រៀនមិនតិចជាង១០ម៉ោងក្នុងមួយថ្ងៃ

13, Aug 2016 , 4:39 pm

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ ការប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា នឹងឈានមកដល់នាពេលដ៏ខ្លីខាងមុខនេះ។ សិស្សានុសិស្សដែលត្រៀមប្រឡង បានសម្រុករៀនទាំងថ្ងៃទាំងយប់។ ទន្ទឹមនឹងការសម្រុករៀនត្រៀនេះ សាស្ត្រាចារ្យល្បីៗមួយចំនួន បានចំណាយពេលវេលាប្រមាណ១០ម៉ោងកក្នុងមួយថ្ងៃ ដើម្បីបង្ហាត់បង្រៀនសិស្សទាំងនោះ។ បើទោះបីជាត្រូវចំណាយកម្លាំងច្រើន និងហត់នឿយ ប៉ុន្តែសាស្ត្រាចារ្យទាំងនោះ មិនរួញរាឡើយក្នុងការបង្រៀនសិស្ស ដើម្បីឲ្យពួកគេទទួលបាននិទ្ទេសល្អ។

នៅក្នុងបរិវេណសាលាជ័យថាវី ដែលគេស្គាល់ថាជាសាលា«បង្រៀនគួរ»ដ៏ល្បីមួយក្នុងរាជធានីភ្នំពេញ មានសិស្សថ្នាក់ទី១២ជាច្រើនរយនាក់ សម្រុករៀនត្រៀមប្រឡងបាក់ឌុប។ ជារៀងរាល់ម៉ោង សិស្សទាំងអស់តែងចល័តពីបន្ទប់មួយ ទៅបន្ទប់មួយទៀត ដើម្បីរៀនមុខវិជ្ជាផ្សេងទៀត។ ជាមួយគ្នានោះ សាស្ត្រាចារ្យដែលបង្រៀននៅទីនេះ ក៏ចល័តពីបន្ទប់មួយទៅ បន្ទប់មួយទៀត រៀងរាល់ម៉ោងដែរ។ សាស្ត្រាចារ្យល្បីៗមួយចំនួនបានចំណាយពេលក្រោម១០ម៉ោងឡើយក្នុងមួយថ្ងៃ ដើម្បីបង្រៀនសិស្សត្រៀមប្រឡងបាក់ឌុប។

លោកស្រី កែវ សុគន្ធារី សាស្ត្រចារ្យជីវវិទ្យានៅសាលាជ័យថាវី បានប្រាប់សារព័ត៌មានថ្មីៗថា គាត់ចំណាយពេល១៣ម៉ោងក្នុងមួយថ្ងៃ គឺពីម៉ោង៦ព្រឹក រហូតម៉ោង៧យប់ ដើម្បីបង្រៀនសិស្សត្រៀមប្រឡងបាក់ឌុប។ លោកស្រី សាស្ត្រាចារ្យរូបនេះ បានបញ្ជាក់យ៉ាងដូច្នេះ៖«នៅពេលសិស្សជិតដល់ពេលប្រឡង ធ្វើឲ្យខ្ញុំមមាញឹកខ្លាំងក្នុងការបង្រៀន។ ឥឡូវហ្នឹងខ្ញុំផ្តាសាយទេ តែខ្ញុំនៅតែមកបង្រៀនសិស្សដែរ»។ លោកស្រី កែវ សុគន្ធារី បានបន្ត បញ្ជាក់ទាំងសំឡេងស្អកថា នៅឆ្នាំនេះ ហាក់មិនសូវមានសិស្សមកពីតាមបណ្តាខេត្តមករៀនទេ ពីព្រោះនៅតាមសាលានៅតាមខេត្តមួយចំនួនមានគ្រូបំប៉ន ត្រៀមប្រឡងបាក់ឌុបដែរ ដូច្នេះសិស្សតាមខេត្តអាចរៀនបំប៉នបាននៅជិតផ្ទះរបស់ពួកគេ។ ជាមួយគ្នា លោកស្រី ក៏បានសរសើរការកែទម្រង់វិស័យអប់រំ ថាជាការត្រឹមត្រូវ។ លោកស្រី កែវ សុគន្ធារី បញ្ជាក់បន្ថែម៖«សិស្សឆ្នាំនេះ បានមករៀនច្រើន ខ្ញុំបង្រៀនសិស្សរហូត ស្ទើរតែគ្មានពេលសម្រាក ហើយការរឹតបន្តឹងរបស់ក្រសួងជាការត្រឹមត្រូវ ព្រោះសិស្សបានខំប្រឹងរៀនជាងឆ្នាំមុនៗ»។

ចំណែកឯលោកសាស្ត្រចារ្យ នាង បូ វិញ ក៏រវល់ស្ទើររកពេលសម្រាកគ្មានដែរ ។ សាស្ត្រាចារ្យគណិតវិទ្យារូបនេះ មានកាលវិភាគបង្រៀនសិស្ស១២ម៉ោង ក្នុងមួយថ្ងៃ ដែលធ្វើឲ្យលោកហត់នឿយខ្លះដែរ។ លោកសាស្ត្រចារ្យ បានប្រាប់សារព័ត៌មានថ្មីៗថា៖ «ក្នុងការបង្រៀនសិស្សពីមួយម៉ោងទៅមួយម៉ោង ខ្ញុំត្រូវប្រើកម្លាំង និងសំឡេងច្រើន ដើម្បីពន្យល់សិស្សឲ្យងាយយល់ ក្នុងការដោះស្រាយលំហាត់»។ បើតាមសាស្ត្រចារ្យល្បីឈ្មោះរូបនេះ គាត់តែងតាស់តឿនឲ្យសិស្សខិតខំប្រឹងរៀន ទាំងមុខវិទ្យាគណិតដែលគាត់បង្រៀន និងមុខវិជ្ជាផ្សេងទៀតដែរ។ លើសពីនេះ លោកសាស្ត្រាចារ្យ នាង បូ ក៏បានប្រាប់គន្លឺះមួយចំនួនក្នុងការសិក្សាទៅដល់សិស្សទាំងនោះទៀតផង។

ទោះជាមានការនឿយហត់បន្តិចដោយសារត្រូវបង្រៀនច្រើនម៉ោងក្តី ប៉ុន្តែ លោក បានបញ្ជាក់ពីក្តីរំភើបទៅវិញ នៅពេលដែលសិស្សចេះ និងអាចអនុវត្តបានលំហាត់បាន។ លោកបានបង្ហាញពីមោទនភាពនៅពេលមានសិស្សដែលគាត់បង្រៀនក្នុងឆ្នាំកន្លងមក មានអ្នកខ្លះទទួលបាននិទ្ទេសA។ លោក នាង បូ បញ្ជាក់ថា នេះគឺជាតបស្នងគុណយ៉ាងធំធេងសម្រាប់លោក ក្នុងនាមជាគ្រូបង្រៀនម្នាក់។

ក្រឡេកមកមើលលោក ជ័យ ថាវី សាស្ត្រចារ្យគីមីវិទ្យានៅសាលាជ័យ ថាវីម្ដង ក៏បានចំណាយពេលវេលាជាច្រើនម៉ោងក្នុងការបង្រៀន មិនចាញ់សាស្ត្រចារ្យទាំងពីរខាងលើទេ។ ទោះត្រូវចំណាយពេលច្រើនម៉ោង ក្នុងមួយថ្ងៃ ដើម្បីបង្ហាត់បង្រៀនក៏ដោយ លោកសាស្ត្រចារ្យ ជ័យ ថាវី នៅតែសប្បាយចិត្តក្នុងការបង្រៀន ព្រោះលោកគិតថា លោកបានចូលចំណែករួមអភិវឌ្ឍន៍ប្រទេសជាតិតាមរយៈការបណ្ដុះធនធានមនុស្សនេះ។

លោកសាស្ត្រចារ្យ បានយ៉ាងដូច្នេះថា៖ មមាញឹកបង្រៀននៅពេលហ្នឹង គឺជាទម្លាប់របស់គ្រូហើយ។ ហើយនេះ ក៏ជាបទពិសោធន៍ដ៏ល្អសម្រាប់គ្រូ ក្នុងការបង្រៀនសិស្ស។ សិស្សមករៀនច្រើន ហើយខំប្រឹង គ្រូក៏សប្បាយចិត្ត»។

សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា នឹងប្រព្រឹត្តទៅរយៈពេល២ថ្ងៃ ចាប់ពីថ្ងៃទី២២ ដល់ ២៣ សីហាខាងមុខ។ បេក្ខជនប្រឡងមានចំនួនសរុប ៩៣.៧៥២នាក់ និងមានមណ្ឌលប្រឡងចំនួន ១៥៧មណ្ឌល និង ៣.៧៨១បន្ទាប់ នៅទូទាំង២៥ រាជធានី-ខេត្ត៕