ជាតិ
នយោបាយជាតិ
លោក យឹម សុវណ្ណ ថាបក្សប្រឆាំងមិនបានចូលរួមក្នុងយុទ្ធនាការ «ថ្ងៃចន្ទពណ៌ខ្មៅ» ឡើយ
× ភ្នំពេញ៖ លោក យឹម សុវណ្ណ អ្នកនាំពាក្យរបស់គណបក្សសង្គ្រោះជាតិ បានអះអាងថា គណបក្សរបស់លោក មិនមានផែនការ ចូលរួមក្នុងយុទ្ធនាការ «ថ្ងៃចន្ទពណ៌ខ្មៅ» ដើម្បីសម្តែងមតិនៅតាមទីសាធារណៈ នោះទេ។ ការលើកឡើងរបស់លោក យឹម សុវណ្ណបែបនេះ គឺដើម្បីឆ្លើយតបនឹងសាលារាជធានីភ្នំពេញ ដែលស្នើឲ្យគណបក្សសង្គ្រោះជាតិ បញ្ឈប់សកម្មភាពក្នុងយុទ្ធនាការថ្ងៃចន្ទពណ៌ខ្មៅ។
លោក យឹម សុវណ្ណ បានប្រកាសគោលជំហរថា គណបក្សសង្គ្រោះជាតិ តែងគោរពឆន្ទៈរបស់បុគ្គលិក និងថ្នាក់ដឹកនាំគ្រប់រូប ក្នុងការសម្តែងមតិ។ អ្នកនាំពាក្យរូបនេះ បន្តថា ការសម្តែងមតិ មិនមែនជាការគំរាមកំហែងអ្វីនោះទេ ប៉ុន្តែ វា ជាការប្រើសិទ្ធិសេរីភាពរបស់ខ្លួន ដើម្បីដោះស្រាយបញ្ហា និងស្វែងរកយុត្តិធម៌។ លោកបញ្ជាក់ដូច្នេះថា៖«ខ្ញុំសូមបញ្ជាក់ទៅ រាជរដ្ឋាភិបាល ក៏ដូចជាអាជ្ញាធរមានសមត្ថកិច្ច ថាកុំឲ្យមានការព្រួយបារម្ភ»។
មន្ត្រីជាន់ខ្ពស់បក្សសង្គ្រោះជាតិខាងលើ បានបន្ថែមទៀតថា រាជរដ្ឋាភិបាល ឬគណបក្សកាន់អំណាច មានតួនាទី និង ភារកិច្ចរបស់ខ្លួន ហើយគណបក្សប្រឆាំង ក៏មានកិច្ចការ ដែលត្រូវធ្វើផងដែរ ដើម្បីផ្តល់គំនិត ក្នុងការអភិវឌ្ឍប្រទេសជាតិ ប្រកបដោយសមធម៌ ហើយប្រជាពលរដ្ឋ នឹងបានទទួលនូវសេចក្តីសុខ ទាំងអស់គ្នា។
ការលើកឡើងរបស់លោក យឹម សុវណ្ណ ធ្វើឡើងនៅចំពោះមុខអ្នកគាំទ្រ និងអ្នកសារព័ត៌មាន នៅទីស្នាក់ការកណ្តាលគណបក្ស នាថ្ងៃទី១៣ ខែសីហា ឆ្នាំ២០១៦នេះ។ សារនយោបាយរបស់លោក យឹម សុវណ្ណ គឺជាការឆ្លើយតបនឹង សាលារាជធានីភ្នំពេញ។
កាលពីថ្ងៃទី១២ ខែសីហា សាលារាជធានីភ្នំពេញ បានផ្ញើលិខិតទៅកាន់ ឯកឧត្តម កឹម សុខា អនុប្រធានគណបក្សសង្គ្រោះជាតិ ជុំវិញយុទ្ធនាការ «ថ្ងៃចន្ទពណ៌ខ្មៅ»។ លិខិតនោះ បានលើកឡើងថា ការចូលរួម និងការគាំទ្រ ក្នុងយុទ្ធនាការថ្ងៃចន្ធពណ៌ខ្មៅ ពីសំណាក់គណបក្សង្គ្រោះជាតិ គឺជាការបំពុល និងញុះញង់ ព្រមទាំងការកៀងគរកម្លាំងអង្គការក្រៅរដ្ឋាភិបាល សមាគម និងប្រជាពលរដ្ឋ ដែលជាទង្វើខុសច្បាប់ ហើយបង្កឲ្យមានចលាចលក្នុងសង្គម ដោយផ្ទុយពីគោលការណ៍ណែនាំ របស់ក្រសួងមហាផ្ទៃ និងរាជរដ្ឋាភិបាល។
ស្ថិតនៅក្រោមហេតុផលថាទប់ស្កាត់នូវភាពចលាចល រក្សាសន្តិភាព និងសណ្តាប់ធ្នាប់សាធារណៈ សាលារាជធានីភ្នំពេញ បានស្នើឲ្យគណបក្សសង្គ្រោះជាតិ បញ្ឈប់សកម្មភាព ពាក់ព័ន្ធនឹងយុទ្ធនាការ ថ្ងៃចន្ទពណ៌ខ្មៅ។ ក្នុងលិខិតដែលដាក់ជូនឯកឧត្តម កឹម សុខានោះ សាលារាជធានីភ្នំពេញ បានសង្កត់ធ្ងន់ថា ប្រសិនបើគណបក្សសង្គ្រោះជាតិ នៅតែបន្តធ្វើសកម្មភាពបែបនេះ បក្សប្រឆាំង ត្រូវតែទទួលខុសត្រូវទាំងស្រុងចំពោះមុខច្បាប់។
សូមរម្លឹកថា លោក នី ចរិយា អគ្គលេខាធិការរងរបស់គជប រួមទាំងមន្ត្រីអាដហុក៤រូបទៀត គឺលោក នី សុខា, លោក ណៃ វង់ដា, លោក យី សុខសាន្ត និងលោកស្រី លឹម មុន្នី ត្រូវបានតុលាការរាជធានីភ្នំពេញ សម្រេចបញ្ជូនខ្លួនទៅឃុំបណ្តោះអាសន្ន កាលពីថ្ងៃទី២ ខែឧសភា ឆ្នាំ២០១៦។ បើតាមការចោទប្រកាន់របស់តុលាការជាន់ទាប អ្នកទាំង៥ខាងលើ សុទ្ធតែជាប់ពាក់ព័ន្ធនឹងរឿងរ៉ាវរបស់កញ្ញា ខុម ចាន់តារ៉ាទី ហៅស្រីមុំ ជាមួយឯកឧត្តម កឹម សុខា អនុប្រធានគណបក្សសង្គ្រោះជាតិ។
ចាប់តាំងពីពេលនោះមក សកម្មជននយោបាយ មន្ត្រីសង្គមស៊ីវិល ព្រះសង្ឃ និងប្រជាពលរដ្ឋមួយចំនួន ចាប់ផ្តើមបង្កើតយុទ្ធានាការ «ថ្ងៃចន្ទពណ៌ខ្មៅ» ឡើង ដើម្បីទាមទារឲ្យដោះលែង អ្នកទាំង៥នោះ។ រហូត មកដល់ពេលនេះ ប្រជាពលរដ្ឋ នៅតែស្លៀកពាក់ពណ៌ខ្មៅ ហើយបន្តធ្វើសកម្មភាពនៃការទាមជារៀងរាល់ថ្ងៃចន្ទ ដើម្បីសុំឲ្យដោះលែង មន្ត្រីគជប និងមន្ត្រីអាដហុក។ ប៉ុន្តែ តុលាការ និងសមត្ថកិច្ច មិនបានធ្វើតាមសំណើរនិងការទាមទាររបស់ប្រជាពលរដ្ឋឡើយ ដោយនៅតែឃុំខ្លួន ហើយបន្តនាំខ្លួនអ្នកទាំង៥ ទៅសាកសួរជាបន្តបន្ទាប់៕
© រក្សាសិទ្ធិដោយ thmeythmey.com