បាក់ឌុបតឹង៖ សិស្សថ្នាក់ទី១២ថ្មី ក៏សម្រុករៀនត្រៀមច្រើនដែរ

ជាតិ

បទយកការណ៍ / បទសម្ភាសន៍

បាក់ឌុបតឹង៖ សិស្សថ្នាក់ទី១២ថ្មី ក៏សម្រុករៀនត្រៀមច្រើនដែរ

14, Aug 2016 , 4:30 pm

រូបភាព

ដោយ: ខន ចំប៉ា

នេះជាឆ្នាំទី៣ហើយ ដែលក្រសួងអប់រំ យុវជន និងកីឡា ធ្វើការរឹតបន្តឹងការប្រឡងបាក់ឌុប។ នៅមុនការប្រឡងមកដល់ សិស្សជាច្រើនមកពីគ្រប់ទិសទី បានសម្រុកមករៀនបន្ថែមនៅ សាលាជ័យថាវី ដែលជាសាលារៀនដ៏ល្បីមួយក្នុងរាជធានីភ្នំពេញ។ ប៉ុន្តែអ្វីដែលគួរឲ្យកត់សម្គាល់នោះ គឺសិស្សថ្នាក់ទី១១ ឡើងទី១២ កាន់តែច្រើន បានមករៀនមេរៀនសម្រាប់ថ្នាក់ទី១២មុន ដើម្បីត្រៀមសម្រាប់ការសិក្សារបស់ពួកគេនៅឆ្នាំសិក្សាក្រោយ នៅសាលាជ័យថាវីនេះដែរ។

កំណែទម្រង់ការអប់រំ តាមរយៈការរឹតបន្តឹងការប្រឡងបាក់ឌុបរយៈ៣ឆ្នាំជាប់គ្នា(រាប់ទាំងឆ្នាំនេះ) បានកែប្រែឥរិយាបថសិស្ស ឲ្យខិតខំប្រឹងប្រែងរៀន មិនធ្វេសប្រហែសដូចមុនទៀតឡើយ។ ដោយមិននិយាយពីសិស្សថ្នាក់ទី១២ ជាច្រើនរយនាក់ដែលមករៀនត្រៀមសម្រាប់ការប្រឡងបាក់ឌុបរបស់ខ្លួន គេសង្កេតឃើញថា មានសិស្សថ្នាក់ទី១២ថ្មី កាន់តែច្រើន ក៏មករៀនមេរៀនសម្រាប់ថ្នាក់ទី១២ ត្រៀមសម្រាប់ការសិក្សារបស់ពួកគេនៅឆ្នាំសិក្សាក្រោយដែរ។

កញ្ញា ប៊ុន សុខកញ្ញា ជាសិស្សដែលត្រូវរៀនថ្នាក់ទី១២ សម្រាប់ឆ្នាំសិក្សា២០១៦-២០១៧ បានបញ្ជាក់ប្រាប់សារព័ត៌មានថ្មីៗថា នាងសម្រេចមករៀនមេរៀនថ្នាក់ទី១២ នៅពេលនេះ ក៏ព្រោះតែចង់ឲ្យមុខវិជ្ជាគិតលេខរបស់ខ្លួនល្អប្រសើរ។ កំពុងឈរជាមួយមិត្តភក្តិស្រី២នាក់ផ្សេងទៀត ដែលមករៀនត្រៀមដូចគ្នា សុខកញ្ញា រៀនបួនមុខវិជ្ជា គឺគណិតវិទ្យា រូបវិទ្យា គីមីវិទ្យា និងជីវវិជ្ជា ដោយមួយមុខវិជ្ជាត្រូវបង់ថ្លៃសិក្សា១៥០០រៀល ក្នុងមួយម៉ោង។

ជាសិស្សនៃសាលាអន្តរទ្វីបអាមេរិកាំង សុខកញ្ញា បានបន្តលើកឡើងថា ការរឹតបន្តឹងការប្រឡងបាក់ឌុប ក៏ជាហេតុផលដែលជំរុញឲ្យនាងមករៀនមេរៀនមុនដែរ។ សុខកញ្ញា បានបញ្ជាក់យ៉ាងដូច្នេះថា៖«ពេលចូលរៀនវិញត្រូវមុខវិជ្ជាច្រើនត្រូវរៀន បើរៀនត្រៀមមុនមួយឆ្នាំ វារាងធូរបន្តិច អត់មានកាតព្វកិច្ចច្រើន។ ណាមួយ យើងត្រៀមមុនអីចឹង យើងក៏មានទុនច្រើនសម្រាប់ប្រឡងបាក់ឌុបឆ្នាំក្រោយ»។

ភ័យខ្លាចធ្លាក់ពេលប្រឡងបាក់ឌុបនៅឆ្នាំក្រោយ ក៏ជាក្តីបារម្ភរបស់យុវជន ហុង កានូ ដែរ។ ជាសិស្សវិទ្យាល័យសម្តេចម៉ែ ក្នុងឃុំជប់ ខេត្តត្បូងឃ្មុំ កានូ បានបញ្ជាក់យ៉ាងដូច្នេះ៖«ឥឡូវគេរឹតបន្តឹងខ្លាំង អីចឹងបើយើងអត់ប្រឹងរៀន គឺធ្លាក់។ បើយើងមេរៀនពេលដែលវិស្សមកាលអីចឹង គឺអាចរៀនបានបីដង។ យើងរៀនពេលវិស្សមកាលហ្នឹងម្តង ហើយពេលចូលរៀនយើងរៀនសាលារដ្ឋ ហើយយើងរៀនបន្ថែមម៉ោងពេលកំពុងរៀនម្តងទៀត។ អីចឹងយើងជឿជាក់ថាជាប់ច្រើនឆ្នាំក្រោយ»។

សម្រេចចិត្តមករៀនត្រៀមថ្នាក់ទី១២ថ្មីនេះ ក៏ដោយសារ កានូ ក៏ចង់វាស់ស្ទង់ពីសមត្ថភាព របស់សិស្សនៅទីក្រុង និង របៀបបង្រៀនរបស់គ្រូផងដែរ។ «ខ្ញុំចង់ដឹងថា គ្រូនៅទីនេះខុសពីគ្រូបង្រៀននៅតាមខេត្តយ៉ាងម៉េច យើងអាចមើលឃើញទូលំទូលាយថាអ្នកនៅទីនេះគេខ្លាំងរបៀបម៉េច»។ នេះជាការបញ្ជាក់របស់ យុវជនកានូ មុននឹងថ្លែងសរសើរពីទិដ្ឋភាពរៀននៅសាលាជ័យថាវីយ៉ាងដូច្នេះ៖«នៅទីនេះ គេរៀនគ្នាច្រើន តែស្ងាត់ ហើយគ្រូក៏បង្រៀនល្អ»។

ងាកមកកញ្ញា ប៉េង យីមពិសី វិញ បានបញ្ជាក់ពីមូលហេតុដែលគេមករៀនមេរៀនថ្នាក់ទី១២ ថានៅសាលាជ័យថាវី មានគ្រូល្អៗច្រើន ហើយឯកសាររៀនក៏សម្បូរបែបជាងសាលាផ្សេងទៀត។ បន្ថែមពីនេះ សិស្សនៃវិទ្យាល័យជាស៊ីមសាមគ្គីរូបនេះ ចង់យកពេលទំនេរនៅវិស្សមកាលនេះ មកពង្រឹងសមត្ថភាពលើមុខវិជ្ជាផ្នែកគិតលេខរបស់ខ្លួន ត្រៀមសម្រាប់ការប្រឡងបាក់ឌុបដែលក្រសួងបន្តរឹតបន្តឹងនៅឆ្នាំសិក្សាក្រោយដែរ។ ពិសី ដែលចង់ក្លាយទៅជាវេជ្ជបណ្ឌិតទៅអនាគតនោះ បានបញ្ជាក់យ៉ាងដូច្នេះ៖«ពេលចូលរៀន យើងមិនមែនរៀនតែបួនមុខហ្នឹងទេ ដូច្នេះខ្ញុំរៀនបួនមុខហ្នឹងឲ្យខ្លាំងសិន ចាំចូលកងវិញចាំសម្រុករៀនមុខវិជ្ជាមេរៀន»។

បើតាម កញ្ញា ពិសី ប៉េង យីមពិសី និងមិត្តភក្តិត្រូវអង្គុយរៀនជាមួយសិស្សប្រមាណ២០០នាក់ផ្សេងទៀតក្នុងមួយបន្ទប់ ដែលសុទ្ធសឹងជាសិស្សថ្នាក់ទី១២ថ្មីដូចគ្នា។ ទោះមានសិស្សយ៉ាងនេះក្តី ប៉ុន្តែ ពិសី អះអាងថា ក្នុងម៉ោងរៀនគឺមានសភាពស្ងប់ស្ងាត់ សិស្សម្នាក់ៗស្តាប់គ្រូពន្យល់យ៉ាងយកចិត្តទុកដាក់។ កញ្ញា យីមពិសី បានពន្យល់បន្ថែមយ៉ាងនេះ៖«អត់សូវរញ៉េរញ៉ៃ ដោយសារគេមក គេដឹងតែរៀន ម្នាក់គេចង់រៀន គេស្តាប់គ្រូពន្យល់ ហើយគ្រូគាត់ពន្យល់ក្បោះក្បាយទៀត»។

ដ្បិតពួកគេអះអាងថា ទីនេះមានគ្រូល្អ និងសម្បូរឯកសារច្រើនសម្រាប់រៀនក៏ពិតមែន ប៉ុន្តែសិស្សច្រើនពេកក្នុងមួយបន្ទប់ តម្រូវឲ្យពួកគេមករៀនឲ្យបានលឿន ដើម្បីបានអង្គុយតុខាងមុខ ដែលងាយស្រួលស្តាប់គ្រូពន្យល់ និងសួរមេរៀន។ អ្នកដែលមករៀនយឺត ត្រូវអង្គុយពាក់កណ្តាល ឬនៅខាងក្រោយផុតនោះ ដែលធ្វើឲ្យពួកគេពិបាកស្រែកសួរគ្រូ ពេលឆ្ងល់ម្តងៗ។

យ៉ាងណាក៏ដោយ ទាំងពិសី កញ្ញា និងកានូ សុទ្ធតែបានរំពឹងទុកថាពួកគេនឹងប្រឡងជាប់ និងរំពឹងទទួលបាននិទ្ទេសល្អផង សម្រាប់ការប្រឡងបាក់ឌុបនៅឆ្នាំសិក្សា២០១៦-២០១៧ ខាងមុខ៕