ជាតិ
នយោបាយជាតិ
ទាល់តែចៅក្រមស៊ើបសួរ ចេញដីកាដំណោះស្រាយ ទើបមេធាវី បន្តជួយឯកឧត្តម កឹម សុខា
× ភ្នំពេញ៖ ចៅក្រមស៊ើបសួរ នៃសាលាដំបូងរាជធានីភ្នំពេញ បានបញ្ចប់ការស៊ើបសួរ លើសំណុំរឿងរបស់ឯកឧត្តម កឹម សុខា អនុប្រធានគណបក្សសង្គ្រោះជាតិ កាលពីប៉ុន្មានថ្ងៃកន្លងទៅ។ ឯកឧត្តម កឹម សុខា ត្រូវបានចោទពីបទ «បដិសេធក្នុងការចូលខ្លួន» ដែលតុលាការចាត់ទុកថាជា បទល្មើសជាក់ស្តែង។
តាមនីតិវិធី បន្ទាប់ពីបញ្ចប់ការស៊ើបសួរ ចៅក្រមស៊ើបសួរ ត្រូវទម្លាក់សំណុំរឿងរបស់ឯកឧត្តម កឹម សុខា ទៅស្ថាប័នអយ្យការវិញ ដើម្បីឲ្យព្រះរាជអាជ្ញា ធ្វើសេចក្តីសន្និដ្ឋានស្ថាពរ។ ក្រោយធ្វើសេចក្តីសន្និដ្ឋានស្ថាពររួចរាល់ហើយ ព្រះរាជអាជ្ញា នឹងបញ្ជូនរឿងក្តី ទៅកាន់ចៅក្រមស៊ើបសួរសាជាថ្មី ដើម្បីឲ្យចាត់ការបន្ត។
នៅពេលសំណុំរឿងធ្លាក់ដល់ដៃម្តងទៀត ចៅក្រមស៊ើបសួរ ត្រូវចេញដីកាដំណោះស្រាយ។ ដីកាដំណោះស្រាយនេះ គឺជាការសម្រេចរបស់ចៅក្រមស៊ើបសួរ ថាត្រូវបញ្ជូនសំណុំរឿងរបស់ឧត្តម កឹម សុខា ទៅជំនុំជម្រះ ឬក៏តម្កល់ទុកឥតចាត់ការ។
លោក ហែម សុជាតិ មេធាវី១រូប ក្នុងចំណោមមេធាវីទាំង៥រូប ដែលការពារក្តីឲ្យឯកឧត្តម កឹម សុខា បានអះអាងថា ក្នុងកាលៈទេសៈនេះ សហមេធាវី ត្រូវរក្សាភាពស្ងៀមស្ងាត់សិន។ លោក បន្ថែមថា លុះត្រាតែចៅក្រមស៊ើបសួរ ចេញដីកាដំណោះស្រាយ ទើបក្រុមមេធាវីទាំងនោះ អាចសម្រេចចិត្ត ថាត្រូវធ្វើអ្វីបន្តទៀត ដើម្បីការពារឯកឧត្តម កឹម សុខា តាមផ្លូវច្បាប់។
កន្លងមក លោក ហែម សុជាតិ ធ្លាប់ប្រាប់សារព័ត៌មានថ្មីៗម្តងរួចមកហើយ ថាលោក ហាក់ដូចជាគ្មានសង្ឃឹមថា ចៅក្រមស៊ើបសួរនឹងតម្កល់សំណុំរឿងរបស់កូនក្តីខ្លួន ទុកឥតចាត់ការនោះទេ។ លោក បញ្ជាក់ថា ក្រុមមេធាវី មានតែត្រៀមខ្លួន ចេញមុខការពារកូនក្តីរបស់ខ្លួនប៉ុណ្ណោះ នៅពេលចៅក្រមស៊ើបសួរ សម្រេចបញ្ជូនសំណុំរឿងទៅជំនុះជម្រះ។
សូមសូមបញ្ជាក់ថា មូលហេតុដែលតុលាការ ចោទឯកឧត្តម កឹម សុខា ថាប្រព្រឹត្តបទល្មើសជាក់ស្តែង ដោយសារតែអនុប្រធានបក្សប្រឆាំងរូបនេះ បដិសេធមិនបង្ហាញខ្លួនក្នុងនាមជាសាក្សីចំនួន២លើក ជុំវិញរឿងរ៉ាវរបស់កញ្ញា ខុម ចាន់តារាទី ហៅស្រីមុំ។ មកដល់នឹងពេលនេះ អស់រយៈជាង២ ខែហើយ ដែលឯកឧត្តម កឹម សុខា ឃុំខ្លួនឯងនៅក្នុងទីស្នាក់ការកណ្តាល៕
© រក្សាសិទ្ធិដោយ thmeythmey.com