ជាតិ
ប្រធានមន្ទីរសុខាភិបាលរាជធានី អាចទទួលបានតំណែងថ្មី
× សម្តេចនាយករដ្ឋមន្ត្រី ហ៊ុន សែន បានចេញមុខពន្យល់សាធារណជននៅថ្ងៃអាទិត្យនេះ អំពីមូលហេតុដែលសម្តេចសម្រេចដកតំណែងប្រធានមន្ទីរសុខាភិបាលរាជធានីភ្នំពេញ លោក សុខ សុគន្ធ នៅថ្ងៃសៅរ៍។ នៅក្នុងការពន្យល់ជាលាយល័ក្ខណ៍អក្សរនៅលើទំព័រហ្វ៊េសប៊ុកផ្ទាល់ខ្លួន ប្រមុខរដ្ឋាភិបាលបានបង្ហើបថា លោក សុខ សុគន្ធ នឹងអាចត្រូវបានតែងតាំងមុខតំណែងថ្មី។
កំហុសរបស់លោកប្រធានមន្ទីរសុខាភិបាលរាជធានីភ្នំពេញ ក្នុងករណីឃាត់រថយន្តសង្គ្រោះនៃវិទ្យុ ABC នោះ គឺការអនុវត្តខុសនីតិវិធី។ នេះគឺជាការបកស្រាយរបស់សម្តេចនាយករដ្ឋមន្ត្រី ហ៊ុន សែន នៅថ្ងៃអាទិត្យនេះ ពោលគឺមួយថ្ងៃក្រោយពីសម្តេចសម្រេចដកតំណែងប្រធានមន្ទីរសុខាភិបាលរាជធានី ហើយក៏មានការអត្ថាធិប្បាយថា ចំណាត់ការរបស់សម្តេចនេះ នឹងធ្វើឲ្យមន្ត្រីថ្នាក់ក្រោមខ្លាចរអា នឹងការអនុវត្តច្បាប់។
ប្រមុខរដ្ឋាភិបាលបញ្ជាក់យ៉ាងដូច្នេះថា៖«ប្រធានមន្ទីរសុខាភិបាលពិតជាមន្ត្រីនរគបាលយុត្តិធម៌ ប៉ុន្តែប្រសិនបើគាត់អនុវត្តន៍ក្នុងតួនាទីនេះ ទាក់ទងនឹងបទល្មើស គឺចាំបាច់ត្រូវរាយការណ៍សុំការដឹកនាំ និងសម្របសម្រួលពីព្រះរាជអាជ្ញា ស្របតាមនីតិវិធីជាធរមាន»។ សម្តេចបន្ថែមថា៖«ប៉ុន្តែ ក្នុងកំណត់ហេតុឃាត់រថយន្ត លោកប្រធានមន្ទីរបានប្រើប្រាស់តួនាទីជាលេខាធិការដ្ឋាន លុបបំបាត់ឱសថក្លែងក្លាយ និងសេវាសុខាភិបាលឯកជនខុសច្បាប់ ហើយប្រត្តិបត្តិការដោយកម្លាំងមន្ទីរសុខាភិបាលទាំងអស់ ដោយគ្មានការចូលរួមពីនគរបាល ឬអាវុធហត្ថ ឬស្ថាប័នអយ្យការនោះទេ បន្ថែមលើនោះ គឺគ្មានរបាយការណ៍មកថ្នាក់លើ ឬស្ថាប័នអយ្យការពាក់ព័ន្ធ បន្ទាប់ពីការឃាត់រថយន្តនោះដែរ»។
នៅក្នុងខ្លឹមសារនៃការបកស្រាយអំពីចំណាត់ការរបស់ប្រមុខរដ្ឋាភិបាលដដែល លោក សុខ សុគន្ធ នឹងមិនត្រូវបោះបង់ចោលឡើយ។ សម្តេច ហ៊ុន សែន បានសរសេរបន្តដោយបង្ហាញអំពីផលលំបាក ក្នុងការដោះស្រាយបញ្ហានេះ ដោយផ្តល់សារសំខាន់ដល់ទាំងប្រព័ន្ធផ្សព្វផ្សាយដ៏មានប្រជាប្រិយ និងដល់ទាំងមន្ត្រីរាជការថា អតីតប្រធានមន្ទីរសុខាភិបាលរាជធានីភ្នំពេញ នឹងអាចត្រូវបានតែងតាំងនៅក្នុងតួនាទីសមរម្យណាមួយ នៅថ្នាក់ជាតិ ឬថ្នាក់ក្រោមជាតិ។
គួររម្លឹកថា អតីតប្រធានមន្ទីរសុខាភិបាល សម្រេចឲ្យមន្ត្រីឃាត់រថយន្តសង្គ្រោះបន្ទាន់របស់វិទ្យុ ABC ដែលជាវិទ្យុមហាជនដ៏ល្បី ក្រោមមូលហេតុថា រថយន្តសង្គ្រោះនេះ មិនមានបំពាក់បរិក្ខារសង្គ្រោះបន្ទាន់ មានស្លាកលេខជាដើម។ ក្រោយការឃាត់រថយន្តសង្គ្រោះនេះភ្លាម មហាជនមួយចំនួន និងបុគ្គលិកវិទ្យុ ABC បានសំដែងប្រតិកម្មយ៉ាងខ្លាំង ដោយអះអាងថា រថយន្តសង្គ្រោះនេះ គឺរថយន្តដែលបម្រើវិស័យមនុស្សធម៌ និងបានជួយពលរដ្ឋខ្មែររងគ្រោះជាច្រើន ហើយពួកគេក៏បានសរសេរសុំអន្តរាគមន៍ពីសម្តេចនាយករដ្ឋមន្ត្រីនៅលើទំព័រហ្វេសប៊ុករបស់សម្តេច ហ៊ុន សែន។
សម្តេច ហ៊ុន សែន ក៏បានសម្រេចតំណែងប្រធានមន្ទីរសុខាភិបាលរាជធានីភ្នំពេញ និងបានផ្តល់រថយន្តសង្គ្រោះចំនួន២បន្ថែមដល់វិទ្យុមហាជន ABC ដែលគ្រប់គ្រងដោយលោកអាចារ្យ អេ៕
© រក្សាសិទ្ធិដោយ thmeythmey.com