ជាតិ
តុលាការកំពូលរក្សាបទចោទលើសំណុំរឿងលោក ថោង សារ៉ាត់ និងឪពុកម្តាយ
× ភ្នំពេញ៖ តុលាការកំពូល បានប្រកាសសាលដីការក្សាបទចោទប្រកាន់លើលោក ថោង សារ៉ាត់ និងឪពុកម្តាយ គឺលោក ថោង ចំរើន និងអ្នកស្រី កែវ សារី ពីបទកាន់កាប់អាវុធខុសច្បាប់ តាមមាត្រា ៤៩០នៃក្រមព្រហ្មទណ្ឌដដែល នៅថ្ងៃទី១៥ ខែសីហា ឆ្នាំ២០១៦នេះ។
លោក ថោង សារ៉ាត់ និង ឪពុកម្តាយ ត្រូវជាប់ពន្ធនាគារព្រៃសរចំនួន២ឆ្នាំម្នាក់ និងពិន័យប្រាក់ចំនួន ៦លានរៀល ពីបទកាន់កាប់អាវុធខុសច្បាប់វែងខ្លីចំនួន១១ដើម តាមមាត្រា ៤៩០នៃក្រមព្រហ្មទណ្ឌកាល តាមអំណាចសាលក្រមសាលាដំបូងរាជធានីភ្នំពេញ កាលពីថ្ងៃទី ១៥ មិថុនា ឆ្នាំ២០១៥កន្លងទៅ។
គួរជម្រាបជូនថា ក្រោយចេញពីបន្ទប់សវនាការតុលាការកំពូលភ្លាមៗ លោក ថោង ចំរើន អាយុ ៦៣ឆ្នាំ និងលោកស្រី កែវ សារី អាយុ ៥៥ឆ្នាំ ពុំចង់និយាយ អ្វីតបនឹងសំណួរអ្នកសារព័ត៌មានឡើយកាលពីថ្ងៃទី៨ ខែសីហា ខណៈកូនប្រុសពួកគេលោក ថោង សារ៉ាត់ ឧត្តមសេនីយ៍ទោនៃកងយោធពលខេមរភូមិន្ទ ជាថៅកែសាច់ប៉ាត់តេ ៩៩៩ ម្ចាស់បុរី ៩៩៩ និង ជាប្រធានក្រុមហ៊ុន Meanchey Inteational Investment ត្រូវបានតំណាងអយ្យការសម្រេចចោទប្រកាន់ពីបទ «ផ្តើមគំនិត ក្នុងអំពើឃាតកម្ម គិតទុកជាមុន» តាមមាត្រា ២៨ និង ២០០ នៃក្រមព្រហ្មទណ្ឌ និងពីបទ «កាន់កាប់ដឹកជញ្ជូន ប្រើប្រាស់អាវុធគ្មានការអនុញ្ញាត» អវត្តមាន ក្នុងសវនាការ។
លោកស្រី កែវ សារី បាននិយាយយ៉ាងខ្លីទាំងញញឹមពេលដើរចេញពីបន្ទប់សវនាការតុលាការកំពូល យ៉ាងដូច្នេះថា៖«ខ្ញុំគ្មានពាក្យអ្វីនិយាយទេ។ ខ្ញុំទុកឲ្យមេធាវីការពារ»។
តែយ៉ាងណា លោកមេធាវីការពារឪពុកម្តាយលោក ថោង សារ៉ាត់ លោក ហាវ ស៊ីណាត បដិសេធពុំទាន់និយាយអ្វី ទាំងអស់។ លោកនិយាយយ៉ាងដូច្នេះថា៖«ខ្ញុំរក្សាសិទ្ធិនិយាយពិភាក្សាជាមួយកូនក្តីសិន។ ខ្ញុំមិនអាចនិយាយអ្វីបានទេ នៅពេលនេះ។ សុំទោសបង»។
គួររម្លឹកផងដែរ តុលាការរកឃើញថា ពួកគេបានប្រព្រឹត្តបទល្មើសលាក់អាវុធនៅផ្ទះលេខ៩២១ ផ្លូវលេខ២ សង្កាត់ចាក់អង្រែក្រោម ខណ្ឌមានជ័យ ក្រោយករណីឃាតតកម្មលោកឧកញ៉ា អ៊ឹង ម៉េងជឺ អាយុ ៥៣ ឆ្នាំ ជាថៅកែក្រុមហ៊ុន ស៊ីម៉ងត៍ត្បូងពេជ្រ និងជាប្រធានក្រុមហ៊ុន Shimmex Group ត្រូវខ្មាន់កាំភ្លើង (ឃាតករ) បាញ់សម្លាប់ កាលពីម៉ោង ៧យប់ថ្ងៃទី ២២ ខែវិច្ឆិកា ឆ្នាំ ២០១៤ នៅពេលលោកចុះពីរថយន្តឡិចស៊ីស ៥៧០ ទិញផ្លែឈើ នៅហាងលក់ផ្លែឈើមួយ ស្ថិតនៅផ្លូវលេខ ២៧៤ សង្កាត់ទួលស្វាយព្រៃទី ២ ខណ្ឌចំការមន៕
Tag:
ថោង ចំរើន
កែវ សារី
ថោង សារ៉ាត់
© រក្សាសិទ្ធិដោយ thmeythmey.com