តំណាងរាស្ត្របក្សប្រឆាំង នឹងទៅសួរសុខទុក្ខលោក អ៊ុំ សំអាន នៅថ្ងៃស្អែក

ជាតិ

តំណាងរាស្ត្របក្សប្រឆាំង នឹងទៅសួរសុខទុក្ខលោក អ៊ុំ សំអាន នៅថ្ងៃស្អែក

17, Aug 2016 , 2:45 pm

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ តំណាងរាស្ត្រនៃគណបក្សសង្គ្រោះជាតិ នឹងធ្វើដំណើរទៅកាន់ពន្ធនាគារព្រៃសនៅថ្ងី ១៨ ខែសីហា ឆ្នាំ២០១៦ ដើម្បីសួរសុខទុក្ខ លោក អ៊ុំ សំអាន ដែលកំពុងជាប់ឃុំឃាំងនៅទីនោះ។ នេះបើតាមការអះអាងរបស់លោក ឡុង រី តំណាងរាស្ត្របក្សប្រឆាំង ដែលជាអ្នកដឹកនាំប្រតិភូនេះ។

សាលាដំបូងរាជធានីភ្នំពេញ កាលពីថ្ងៃទី១៥ ខែសីហា បានចេញលិខិតអនុញ្ញាតឲ្យលោក ឡុង រី អ្នកតំណាងរាស្ត្រគណបក្សសង្គ្រោះជាតិ ដឹកនាំប្រតិភូ ទៅសួរសុខទុក្ខលោក អ៊ុំ សំអាន នៅពន្ធនាគារព្រៃស នៅថ្ងៃស្អែក។

លោក ឡុង រី ថ្លែងប្រាប់សារព័ត៌មានថ្មីៗនៅព្រឹកនេះ ថា ប្រតិភូ ដែលទៅសួរសុខទុក្ខ លោក អ៊ុំ សំអាន នៅថ្ងៃស្អែក រួមមានតំណាងរាស្ត្រប្រហែលជា៥ទៅ៦នាក់ និងមន្ត្រីជាន់ខ្ពស់មួយចំនួនទៀតផងដែរ។

លោក អ៊ុំ សំអាន ត្រូវបានសមត្ថកិច្ចឃាត់ខ្លួន កាលពីខែមេសា ឆ្នាំ២០១៦ កន្លងទៅ។ ក្រោយមក តុលាការរាជធានីភ្នំពេញ ក៏សម្រេចបញ្ជូន តំណាងរាស្ត្រ ដែលរិះគន់រឿងព្រំដែនកម្ពុជា-វៀតណាម ដោយឥតសំចៃមាត់រូបនេះ ទៅឃុំបណ្តោះអាសន្ន ដោយចោទពី បទញុះញង់ឲ្យប្រព្រឹត្តបទឧក្រិដ្ឋជាអាទិ៍ និងញុះញង់ឲ្យមានការរើសអើង តាមមាត្រា ៤៩៥ និងមាត្រា ៤៩៦ នៃក្រមព្រហ្មទណ្ឌ ពាក់ព័ន្ធនឹងការបញ្ចេញទស្សនៈ ពីបញ្ហាព្រំដែន តាមហ្វេសប៊ុក កាលពីឆ្នាំ២០១៥។ លើសពីនេះទៀត សមាជិករដ្ឋសភា មកពីគណបក្សប្រជាជនកម្ពុជា ថែមទាំងបានបោះឆ្នោត គាំទ្រឲ្យតុលាការ និងសមត្ថកិច្ចបន្តអនុវត្តនីតិវិធី ចំពោះលោក អ៊ុំ សំអាន ទៀតផង។

បន្ទាប់ពីលោក អ៊ុំ សំអាន ត្រូវបានបញ្ជូនខ្លួនទៅឃុំឃាំង ក្រុមមេធាវី បានស្នើម្តងហើយម្តងទៀត ចាប់តាំងពីតុលាការជាន់ទាប រហូតដល់តុលាការជាន់ខ្ពស់ ដើម្បីសុំឲ្យដោះលែងកូនក្តីរបស់ខ្លួន។ ប៉ុន្តែ សាលាដំបូងរាជធានីភ្នំពេញ សាលាឧទ្ធរណ៍ និងតុលាការកំពូល សុទ្ធតែបដិសេធមិនឲ្យលោក អ៊ុំ សំអាន បានរួចផុតពីពន្ធនាគារ។

លោក អ៊ុំ សំអាន នឹងត្រូវបញ្ជូនទៅជំនុំជម្រះ នៅថ្ងៃទី៥ ខែកញ្ញា ឆ្នាំ២០១៦។ នេះបើតាមការបញ្ជាក់របស់លោក សំ សុគង់ មេធាវី១រូប ក្នុងចំណោមមេធាវីទាំង៣រូប ដែលការពារក្តីឲ្យលោក អ៊ុំ សំអាន៕