អាមេរិក ប្រាប់ចិនកុំឲ្យភ័យរឿងប្រព័ន្ធការពារមីស៊ីលនៅកូរ៉េខាងត្បូង

អន្តរជាតិ

នយោបាយអន្តរជាតិ

អាមេរិក ប្រាប់ចិនកុំឲ្យភ័យរឿងប្រព័ន្ធការពារមីស៊ីលនៅកូរ៉េខាងត្បូង

18, Aug 2016 , 7:39 am

រូបភាព

នាយសេនាធិការទ័ពជើងគោកអាមេរិក លោកឧត្តមសេនីយ៍ Mark A. Milley

ដោយ: តន ចាន់រិទ្ធារ៉ា

មេបញ្ជាការកងទ័ពជើងគោកអាមេរិក បានទៅបញ្ចុះបញ្ចូលចិន កុំឲ្យមានការព្រួយបារម្ភជុំវិញការពង្រាយប្រព័ន្ធការពារមីស៊ីល (THAAD) នៅកូរ៉េខាងត្បូង។ ចិន ដែលមិនសប្បាយចិត្តនឹងការពង្រាយខែលការពារនេះ តែងតែទាមទារឲ្យក្រុងសេអ៊ូល និងក្រុងវ៉ាស៊ីនតោន លុបចោលគម្រោងពង្រាយនេះ តែអាមេរិកអះអាងថា ខែលការពារនេះ គឺសំដៅកូរ៉េខាងជើង មិនមែនគំរាមចិនឡើយ។

មន្ត្រីយោធាជាន់ខ្ពស់អាមេរិក បាននិយាយនៅថ្ងៃទី១៦ ខែសីហា ថា ការសម្រេចចិត្តរបស់អាមេរិក និងកូរ៉េខាងត្បូង ក្នុងការរពង្រាយខែលការពារមីស៊ីល (THAAD) គឺដើម្បីការពារការគំរាមកំហែងពីកូរ៉េខាងជើង និងមិនមែនសំដៅចិនឡើយ។ ផែនការពង្រាយខែលការពារនេះ ធ្វើឲ្យចិនខឹងសម្បារយ៉ាងខ្លាំង ប៉ុន្តែជាររឿយៗនោះ អាមេរិកក៏តែងតែចេញមករម្ងាប់កំហឹងរបស់ក្រុងប៉េកាំង លើការពង្រាយខែលការពារនេះ។

ក្នុងសេចក្ដីប្រកាសព័ត៌មានចេញផ្សាយដោយស្ថានទូតអាមេរិកប្រចាំក្រុងប៉េកាំង កងទ័ពជើងគោកអាមេរិកបញ្ជាក់ថា នាយសេនាធិការទ័ពជើងគោក លោកឧត្តមសេនីយ៍ Mark A. Milley បានជួបជាមួយសមភាគីចិនលោក Li Zuocheng ។ ក្នុងជំនួបនោះ លោក Milley និយាយថា ខែលការពារនេះ គឺជាវិធានការការពារប៉ុណ្ណោះ គឺការពារប្រជាជនកូរ៉េខាងត្បូង អាមេរិក ពីការវាយប្រហាររបស់កូរ៉េខាងជើង ហើយគ្មានអ្វីទៅគំរាមចិនឡើយ។

មិនមែនតែក្រុងវ៉ាស៊ីនតោនទេ ក្រុងសេអ៊ូល ដែលចង់បានខែលការពារនេះខ្លាំង ក៏បាននិយាយការពារប្រព័ន្ធការពារនេះដែរ។ កូរ៉េខាងត្បូង អះអាងថា ប្រព័ន្ធការពារនេះ គឺការពារការគំរាមពីសកម្មភាពសាកល្បងមីស៊ីល និងអាវុធនុយក្លេអ៊ែររបស់កូរ៉េខាងជើង។ ប៉ុន្តែ កន្លងមក ក្រុងប៉េកាំង មិនសូវជាស្ងប់ចិត្តនឹងការបកស្រាយនេះប៉ុន្មានឡើយ ដោយលើកឡើងថា ប៉ះពាល់ដល់ផលប្រយោជន៍ចិន។

ជាមួយគ្នានោះ សេចក្ដីប្រកាសព័ត៌មានដដែលបន្តថា មេទ័ពអាមេរិក ក៏បានលើកឡើងពីបំណងរក្សាប្រព័ន្ធទំនាក់ទំនងរវាងកងទ័ពទាំងពីរ ដើម្បីកាត់បន្ថយការប្រឈមមុខ និងដោះស្រាយភាពខុសគ្នា។ មេទ័ពអាមេរិក ថែមទាំងលើកឡើងពីការប្ដេជ្ញាចិត្ត ក្នុងការគោរពច្បាប់បញ្ញត្តិអន្តរជាតិនានា និងបានលើកទឹកចិត្តឲ្យភាគីចិន ធ្វើតាមដូចគ្នាដែរ សំដៅកាត់បន្ថយភាពតានតឹងក្នុងតំបន់។

សារព័ត៌មាន Reuters ផ្សាយថា មេទ័ពចិន ក៏ឆ្លើយតបនឹងការលើកឡើងរបស់សមភាគីអាមេរិក ដោយលោកនិយាយថា បញ្ហាទាំងអស់រួមទាំងបញ្ហាសមុទ្រចិនខាងត្បូង និងបញ្ហាកោះតៃវ៉ាន់ផងនោះ សុទ្ធតែជាកង្វល់របស់ក្រុងប៉េកាំង ហើយដែលអាមេរិក ត្រូវយកចិត្តទុកដាក់ និងរកដំណោះស្រាយឲ្យសមស្រប។ លោក Li Zuocheng បន្តថា ទាហានប្រទេសទាំងពីរ នឹងបន្តសហប្រតិបត្តិការជាមួយគ្នា ដោះស្រាយជម្លោះឲ្យបានល្អ រួមទាំងគ្រប់គ្រងការប្រឈមផងដែរ៕