អន្តរជាតិ
×![]()
ក្មេងប្រុសស៊ីរី Omran Daqneesh វ័យ៥ឆ្នាំបានជួបជាមួយឪពុកម្តាយរបស់គេវិញ ហើយក្រោយពីបានទទួលការជួយសង្គ្រោះពីក្រោមបំណែកអាគារនិងទទួលការព្យាបាលពីគ្រូពេទ្យស្ម័គ្រចិត្តក្នុងតំបន់។ ក្មេងប្រុសដ៏ក្លាហានដែលជានិមិត្តរូបនៃសោកនាដកម្មនៅក្នុងសង្គ្រាមស៊ីរីនិងធ្វើឲ្យពិភពលោកស្លុតចិត្តនោះ មិនបានរងរបួសធ្ងន់ឡើយ ប៉ុន្តែគេរងការប៉ះទង្គិចផ្លូវចិត្តខ្លាំង។
ក្មេងប្រុសស៊ីរី Omran Daqneesh ដែលរងរបួសដោយសារការទម្លាក់គ្រាប់បែកនៅទីក្រុង Aleppo ដែលធ្វើឲ្យពិភពលោកតក់ស្លុតនិងសោកសង្រេងនោះ បានជួបជុំជាមួយក្រុមគ្រួសាររបស់ខ្លួនវិញហើយ។ ឪពុកម្តាយ Daqneesh បានទៅតាមមើលកួនរបស់ខ្លួននៅមន្ទីរពេទ្យ ក្រោយកូនខ្លួនត្រូវបានគេជួយសង្គ្រោះនិងបញ្ជូនទៅមន្ទីរពេទ្យ។
បើតាមសារព័ត៌មាន Daily Mail ឪពុកម្តាយ និងបងប្អូនរបស់ Daqneesh ចំនួន៣នាក់ផ្សេងទៀតនោះសុទ្ធតែរួចផុតពីគ្រោះថ្នាក់ ក្រោយការទម្លាក់គ្រាប់បែកកម្ទេចផ្ទះរបស់ពួកគេ។
លោក Abu Rajab ជាសមាជិកក្រុមអ្នកវេជ្ជសាស្ត្រអាមេរិក-ស៊ីរី បានអះអាងថា ថ្វីបើ Omran Daqneesh ត្រូវបានសង្កត់ដោយគំនរនៃសំណង់អាគារក៏ដោយ តែក្បាលរបស់គេគ្រាន់តែរងរបួសសើស្បែកប៉ុណ្ណោះ។ គ្រូពេទ្យបានជួយរុំរបួសក្បាល និងភ្នែកក្រោយយកកម្ទេចចេញពីភ្នែកអស់ហើយនោះ។
លោក Abu Rajab ជឿជាក់ថា កុមារ Omran Daqneesh ក្មេងម្នាក់នេះមិនរងរបួសធ្ងន់ដោយសារការរងការសង្កត់ដោយសំណង់អាគារឡើយ តែគេអាចរងការប៉ះទង្គិចផ្នែកផ្លូវចិត្តខ្លាំងទៅវិញទេ។
បើតាមវីដេអូដែលចែកចាយដោយបណ្តាញសារព័ត៌មានអន្តរជាតិនិង មជ្ឈមណ្ឌលព័ត៌មាន Aleppo (Aleppo Media Center) ក្មេងប្រុសម្នាក់ខាងលើអង្គុយស្ងៀមទ្រឹងដូចជាភ្លឹក ហើយមានឈាមជោកក្បាលក្នុងទឹកមុខស្រងោតស្រងាត់បំផុត តែមិនយំឡើយ ក្រោយត្រូវគេជួយសង្គ្រោះនោះ។ គេហាក់បីដូចជាភ័យរន្ធត់ខ្លាំងណាស់ក្រោយរងគ្រោះដោយសារការទម្លាក់គ្រាប់បែករបស់កងកម្លាំងរដ្ឋាភិបាលនោះ។
ហើយកុមារ Omran Daqneesh មិននិយាយអ្វីទាំងអស់ក្រោយពេលគេនាំយកទៅដាក់ក្នុងរថយន្តសង្គ្រោះ តែក្មេងនេះឆ្លើយនៅពេលដែលគេសួរនាំពីឪពុកម្តាយ។ ហើយបន្ទាប់មកក្មេងម្នាក់នេះក៏ចាប់ផ្តើមទ្រហោយំតែម្តង ពេលបានជួបឪពុកម្តាយខ្លួន។
ត្រលប់មកវិញ ខាងមជ្ឈមណ្ឌលព័ត៌មាន Aleppo បានអះអាងថា នៅថ្ងៃព្រហស្បតិ៍ទី ១៨ សីហា ម្សិលមិញនេះដែរ វាមានក្មេងៗរងរបួសដោយសារការវាយប្រហារផ្លូវអាកាសប្រហែល ១២នាក់ ហើយពួកគេភាគច្រើនមានអាយុក្រោម ១៥ឆ្នាំ។
សូមបញ្ជាក់ថា សង្គ្រាមស៊ីវិលនៅស៊ីរីចាប់ផ្តើមឡើងនៅក្នុងឆ្នាំ ២០១១ ក្រោយចលនាប្រឆាំងរដ្ឋាភិបាលកើតឡើងផុសផុលដើម្បីទាមទារផ្តួលរលំរបបដឹកនាំលោក បាសា អាល់អាសាដ។ តែសង្គ្រាមនេះបន្តអូសបន្លាយរហូតមក ដោយសារគ្មានភាគីណាមួយអាចឈ្នះសង្គ្រាមដាច់ណាត់ ហើយមកទល់ពេលនេះសង្គ្រាមស៊ីរីនេះបានឆក់យកជីវិតមនុស្សប្រហែលជាង ៤សែននាក់ និងបណ្តាលឲ្យមនុស្សជាង៧លាននាក់ផ្សេងទៀតបាត់បង់ជំរកនិងរត់ភៀសខ្លួន៕
© រក្សាសិទ្ធិដោយ thmeythmey.com
