ជាតិ
តួកគីដាក់សំណើផ្លូវការឲ្យកម្ពុជាបិទសាលា ZAMAN
×
រដ្ឋាភិបាលតួកគី បានស្នើជាផ្លូវការឲ្យរដ្ឋាភិបាលកម្ពុជាសម្រេចបិទសាលាអន្តរជាតិ ZAMAN នៅកម្ពុជាតែម្តងពីព្រោះរដ្ឋាភិបាលតួកគីយល់ថា សាលានេះ មានជាប់ពាក់ព័ន្ធនឹងចលនារដ្ឋប្រហារបរាជ័យកាលពីថ្ងៃទី ១៥ ខែកក្កដា កន្លងទៅ។ ឆ្លើយតបនឹងសំណើនេះ មន្ត្រីទូតជាន់ខ្ពស់កម្ពុជា នឹងពិនិត្យសំណើរបស់តួតគីជាមួយស្ថាប័នពាក់ព័ន្ធ។
នៅទីបំផុត រដ្ឋាភិបាលតួកគី បានស្នើជាផ្លូវការឲ្យកម្ពុជា បិទសាលាអន្តរជាតិហ្សាម៉ាន់ (ZAMAN) ដែលមានសាខានៅប្រទេសកម្ពុជាចោល។ សំណើនេះធ្វើឡើយដោយ លោក Ilhan Khemal Tug ឯកអគ្គរដ្ឋទូតតួកគីប្រចាំនៅកម្ពុជា នៅពេលដែលលោកជួបជាមួយលោក ប្រាក់ សុខុន រដ្ឋមន្ត្រីការបរទេសកម្ពុជា នៅទីស្តីការក្រសួងការបរទេសនៅថ្ងៃចន្ទនេះ។ លោក ជុំ សុន្ទរី អ្នកនាំពាក្យក្រសួងការបរទេសកម្ពុជា និងជាអ្នកដែលមានវត្តមានក្នុងបន្ទប់ប្រជុំរវាងលោក ប្រាក់ សុខុន ជាមួយមន្ត្រីទូតតួកគីផងនោះ បានប្រាប់អ្នកកាសែតពីចម្លើយរបស់លោក ប្រាក់ សុខុន ទៅកាន់មន្ត្រីទូតតួកគីយ៉ាងនេះថា៖« ក្រសួងការបរទេសកម្ពុជានឹងធ្វើការពិនិត្យពិចារណានូវសំណើនេះ ជាមួយស្ថាប័នពាក់ព័ន្ធរបស់កម្ពុជា»។
តែយ៉ាងណា លោក សុន្ទរី មិនហ៊ាននិយាយឲ្យច្បាស់ប្រាប់អ្នកការសែតអំពីមូលហេតុដែលរដ្ឋាភិបាលតួកគីស្នើឲ្យកម្ពុជាបិទសាលារៀនដ៏ល្បីនៅកម្ពុជាមួយនេះទេ។ ថ្វីបើលោកមិនប្រាប់ក៏គេអាចដឹងដែរថា មូលហេតុដែលតួកគីចង់ឲ្យកម្ពុជា បិទសាលាហ្សាម៉ាន់ ដោយសាររដ្ឋាភិបាលនេះចោទសាលាហ្សាម៉ាន់ថា ជាប់ពាក់ព័ន្ធនឹងណ្តាញសមាជិកចលនាអន្តរជាតិរបស់លោក Fethullas Gulen ដែលរៀបចំធ្វើរដ្ឋប្រហារយោធានៅតួកគីកាលពីថ្ងៃទី ១៥ ខែកក្កដា។ ការចោទប្រកាន់ចំៗនេះ ធ្វើឡើងដោយលោក Ilhan Khemal Tug ឯកអគ្គរដ្ឋទូតតួកគីប្រចាំនៅកម្ពុជាតែម្តង នៅក្នុងសន្និសីទសារព័ត៌មាននៅស្ថានទូតតួកគីប្រចាំនៅកម្ពុជា កាលពីថ្ងៃទី ១៨ ខែកក្កដា ឆ្នាំ ២០១៦ ។
ឆ្លើយតបនឹងបញ្ហានេះ សារព័ត៌មានថ្មីៗនៅមិនទាន់អាចទាក់ទងសុំការបកស្រាយពីលោក ដេត សុខឧត្តម សកលវិទ្យាធិការរងនៃសកលវិទ្យាល័យ ZAMAN បានទេនៅថ្ងៃចន្ទនេះ។ តែកាលពីចុងខែកក្កដា កន្លងទៅលោក សុខឧត្តម ធ្លាប់ប្រាប់វិទ្យុអាស៊ីសេរីថា ថ្នាក់ដឹកនាំសាលាអន្តរជាតិរបស់លោក គ្រោងនឹងជួបក្រសួងការបរទេសកម្ពុជា ដើម្បីពន្យល់ពីបញ្ហានេះ។
ជាមួយគ្នានេះ កាលពីថ្ងៃទី ១៨ ខែកក្កដា លោក Ejder Klic ប្រធានក្រុមហ៊ុន ហ្សាម៉ាន់Co.,Ltd បានចេញសេចក្តីថ្លែងការណ៍ បដិសេធនឹងការចោទប្រកាន់របស់ឯកអគ្គរដ្ឋទូតតួគីប្រចាំនៅកម្ពុជាមកលើសាលាអន្តរជាតិZAMAN ហើយក្រុមហ៊ុនរបស់លោក ក៏ថ្កោលទោសអំពើរដ្ឋប្រហារនៅតួគីនោះដែរ។ លោក Ejder Klic បានបញ្ជាក់បែបនេះថា៖ «យើងមានអារម្មណ៍សោកស្តាយចំពោះការចោទប្រកាន់ដោយគ្មានមូលហេតុច្បាស់លាស់ មកលើសាលាយើង ដែលបានដំណើរការជាង ២០ ឆ្នាំមកហើយថា ជាប់ពាក់ព័ន្ធទៅនឹងការប៉ុនប៉ងធ្វើរដ្ឋប្រហារដ៏សាហាវនេះ»។
បើតាមសេចក្តីថ្លែងការណ៍ដដែលនោះ លោក Ejder Klic ទទួលស្គាល់ថា ស្ថាបនិករបស់សាលាអន្តរជាតិហ្សាម៉ាន់ បានចាប់ផ្តើមស្ថាបនាដោយផ្អែកលើស្មារតី និងទស្សនៈវិស័យពីលោក ហ្វេធូឡា ហ្គូឡិន(Fethullas Gulen ) ពិតមែន។ ប៉ុន្តែលោក ហ្គូលិន មិនដែលបានចូលរួមក្នុងការងាររដ្ឋបាល ឬជាម្ចាស់ស្របច្បាប់ណាមួយរបស់សាលាហ្សាម៉ាន់ឡើយ។ « លោក ហ្គូឡិន មិនដែលបានផ្តល់ការសម្រេចចិត្តណាមួយក្នុងការបង្កើត ឬក្នុងដំណើរការសាលានេះទេ។ សរុបមកអ្វីដែលទាក់ទងនឹងលោក ហ្គូឡិន គឺគ្រាន់តែស្មារតី និងទស្សនៈវិស័យតែប៉ុណ្ណោះ»។ នេះជាការបកស្រាយបន្ថែមរបស់ លោក Ejder Klic ទន្ទឹមនឹងអះអាងយ៉ាងនេះទៀតថា៖«សាលានេះទទួលបានអាជ្ញាបណ្ណពីក្រសួងអប់រំ យុវជន និងកីឡា ដែលជារបស់ក្រុមហ៊ុនហ្ស៊ាម៉ាន់ ហើយបានចុះក្នុងបញ្ជីពាណិជ្ជកម្មផងដែរ។ ដូច្នេះសាលានេះ គឺជាសាលារបស់ប្រជាជនកម្ពុជា ដែលមានការចុះអធិការកិច្ច ការបង់ពន្ធជាប្រចាំ និងរៀបចំដោយក្រុមប្រឹក្សាភិបាលរបស់សាលា»៕
Tag:
ZAMAN
ប្រាក់ សុខុន
ជុំ សុន្ទរី
តួកគី
© រក្សាសិទ្ធិដោយ thmeythmey.com