អន្តរជាតិ
នយោបាយអន្តរជាតិ
តួកគី៖ ទំនាក់ទំនងតួកគី-អាមេរិក រង្គោះរង្គើ ព្រោះអាមេរិកមិនធ្វើបត្យាប័នលោក Gulen
×
ទំនាក់ទំនងរវាងតួកគី និងអាមេរិក ធ្លាក់ចុះយ៉ាងខ្លាំង បន្ទាប់ពីរដ្ឋប្រហារមិនបានសម្រេចថ្ងៃទី១៥ ខែកក្កដា។ តួកគី បានទាមទារឲ្យអាមេរិកធ្វើបត្យាប័នលោក Fethullah Gulen ដែលត្រូវបានចោទប្រកាន់ដោយរដ្ឋាភិបាលតួកគីថា នៅពីក្រោយរដ្ឋប្រហារ។ តែអាមេរិកអល់អែក និងមិនបានបញ្ជូនលោក Gulen មកទៅតួកគីតាមការស្នើឡើយ ដែលនេះត្រូវបានប្រមុខរដ្ឋាភិបាលតួកគីអះអាងថា ជាមូលហេតុដែលធ្វើឲ្យខូចខាតទំនាក់ទំនងប្រទេសទាំងពីរ។
នាយករដ្ឋមន្ត្រីតួកគី លោក Binali Yildirim និយាយថា បរាជ័យនៃការធ្វើបត្យាប័នលោក Fethullah Gulen ដែលជាមេក្លោងនៃរដ្ឋប្រហារថ្ងៃទី១៥ ខែកក្កដា កំពុងតែបំផ្លាញទំនាក់ទំនងតួកគី និងអាមេរិកហើយ។ លោក Yildirim ថ្លែងដូចនេះ នៅមុនដំណើទស្សនកិច្ចរបស់អនុប្រធានាធិបតីអាមេរិក លោក Joe Biden មកកាន់តួកគី សំដៅសម្រួលទំនាក់ទំនងដែលកំពុងតែរង្គោះរង្គើនេះ។
លោក Yildirim បញ្ជាក់ថា ចាប់ពីថ្ងៃទី១៥ ខែកក្កដាមកនោះ អ្វីៗមិនដូចពីមុនទៀតទេ។ អាមេរិកដឹងពីរឿងនេះ ហើយតួកគី ក៏ដឹងថា អាមេរិកដឹងបញ្ជានេះដែរ។ លោកបន្តថា ពេលនេះ ទំនាក់ទំនងតួកគី និងអាមេរិក គឺមានលក្ខណៈធម្មតាប៉ុណ្ណោះ។ នេះបើយោងតាមការផ្សាយរបស់សារព័ត៌មាន Sputnik។
នៅក្រោយការប៉ុនប៉ងធ្វើរដ្ឋប្រហារមិនជោគជ័យ រដ្ឋាភិបាលតួកគី បានបើកប្រតិបត្តិការបោសសម្អាតអ្នកជាប់ពាក់ព័ន្ធការប៉ុនប៉ងនេះ ដោយរួមទាំងការឃុំខ្លួនមនុស្សរាប់ម៉ឺននាក់ មានទាំងប៉ូលិស ទាហាន និងជនស៊ីវិល។ ប្រតិបត្តិការនេះ ក៏ធ្លាយទៅដល់ការបិទស្ថាប័នសារព័ត៌មាន សាលារៀន ព្រមទាំងវិស័យឯកជនផងដែរ ហើយអ្វីដែលធ្វើអាមេរិក និងអឺរ៉ុបបារម្ភ និងរិះគន់ខ្លាំងៗនោះ គឺផែនការអនុវត្តឡើងវិញទោសប្រហារជីវិត។
ជុំវិញបញ្ហានេះ ថ្នាក់ដឹកនាំតួកគី មិនសប្បាយចិត្តនោះឡើយ និងបានលើកឡើងថា អាមេរិក និងអឺរ៉ុប ដែលជាសម្ព័ន្ធមិត្តចាក់ទឹកមិនលិច មិនបានគាំទ្រខ្លូនឡើយ តែបែរជាទៅគាំទ្រអ្នកនៅពីក្រោយរដ្ឋប្រហារទៅវិញ។ តួកគីកាន់តែខឹង នៅពេលដែលអាមេរិកមិនព្រមធ្វើតាមសំណើរបស់ខ្លួន ដែលចង់ឲ្យរដ្ឋបាលលោក បារ៉ាក់ អូបាម៉ា បញ្ជូនលោក Gulen មកតួកគីវិញនោះ។
ការមើលមុខគ្នាមិនត្រូវជាមួយលោកខាងលិច បង្ខំឲ្យតួកគីងាកទៅសម្រួលទំនាក់ទំនងជាមួយរុស្សី ដែលកន្លងមកមិនសូវជាត្រូវគ្នាប៉ុន្មានដែរនោះ។ ប្រធានាធិបតីតួកគី បានទៅជួបលោក វ្ល៉ាឌីមៀ ពូទីន ដើម្បីសម្រួលទំនាក់ទំនងឡើងវិញ ដែលនេះអាចជាមូលហេតុនៃទស្សនកិច្ចរបស់លោកអនុប្រធានាធិបតី Biden មកកាន់តួកគី។ បើទោះជាមិនពេញចិត្តនឹងចំណាត់ការបោសសម្អាតអ្នកជាប់ពាក់ព័ន្ធរដ្ឋប្រហារក៏ដោយ អាមេរិកប្រហែលជាមិនសូវជាសប្បាយចិត្តដែរ ពេលឃើញរុស្សីមិនចែចង់តួកគី ដែលជាសមាជិកណាតូនោះ៕
Tag:
តួកគី
អាមេរិក
រដ្ឋប្រហារ
© រក្សាសិទ្ធិដោយ thmeythmey.com