អន្តរជាតិ
អាមេរិកបង្ហាញការព្រួយបារម្ភ ក្រោយមនុស្សជិត២ពាន់នាក់ត្រូវបាញ់សម្លាប់នៅហ្វីលីពីន
× មកទល់ពេលនេះ អ្នកជាប់ពាក់ព័ន្ធនឹងគ្រឿងញៀនប្រហែល១៨០០នាក់ ត្រូវបានសម្លាប់ក្នុងសង្គ្រាមបោសសម្អាតគ្រឿងញៀន ចាប់តាំងពីលោក Rodrigo Duterte ចូលកាន់តំណែងប្រធានាធិបតីមក។ អង្គការសហប្រជាជាតិ បានរិះគន់ខ្លាំងនឹងចំណាត់ការនេះ ដោយអះអាងថា មិនគោរពសិទ្ធិមនុស្សឡើយ ហើយពេលនេះ អាមេរិកដែលជាសម្ព័ន្ធមិត្តរបស់ហ្វីលីពីន ក៏បានបញ្ចេញប្រតិកម្មនឹងប្រតិបត្តិការសម្លាប់នេះដែរ។
អគ្គស្នងការប៉ូលិសជាតិហ្វីលីពីនលោកឧត្តមសេនីយ៍ Ronald de la Rosa បានថ្លែងទៅកាន់គណៈកម្មាធិការព្រឹទ្ធសភា ថា ជនសង្ស័យចំនួន៧១២នាក់ ត្រូវបានសម្លាប់នៅក្នុងពេលដែលប៉ូលិសកំពុងតែប្រតិបត្តិការបង្ក្រាបគ្រឿងញៀន ខណៈ មនុស្ស១០៦៧ផ្សេងទៀត ត្រូវបានសម្លាប់ក្រៅប្រតិបត្តិការរបស់ប៉ូលិស។ ការសម្លាប់ក្រៅប្រតិបត្តិការរបស់ប៉ូលិស រាប់បញ្ចូលទាំងសកម្មភាពរបស់ជនស៊ីវិលក្នុងការចូលរួមបង្ក្រាបផងដែរ។
ការសម្លាប់មនុស្សយ៉ាងច្រើននៅក្នុងប្រតិបត្តិការប្រយុទ្ធប្រឆាំងគ្រឿងញៀនរបស់លោក Duterte បង្កជាការខ្វែងគំនិតគ្នារវាងហ្វីលីពីន និងអង្គការសហប្រជាជាតិ ដោយមន្ត្រីជំនាញរបស់អង្គការសហប្រជាជាតិអះអាងថា ការសម្លាប់ភាគច្រើន គឺធ្វើនៅក្រៅប្រព័ន្ធតុលាការ។ នៅខណៈនេះ សហរដ្ឋអាមេរិក ដែលកន្លងមកមិនសូវជាចេញមុខរិះគន់ប្រតិបត្តិការបោសសម្អាតគ្រឿងញៀននោះ ក៏បានចេញមកបង្ហាញការព្រួយបារម្ភជុំវិញបញ្ហានេះដែរ។
តាមពិតទៅ អាមេរិកមិនសូវជារិះគន់ខ្លាំងៗលើចំណាត់ការរបស់លោកប្រធានាធិបតី Duterte ព្រោះអាមេរិក ត្រូវរក្សាទំនាក់ទំនងជាមួយហ្វីលីពីន ដែលជាកូនអុករបស់ខ្លូនដើម្បីទប់ទល់ចិន។ យ៉ាងណាក្ដី អាមេរិក ក៏បានបង្ហាញការព្រួយបារម្ភជ្រាលជ្រៅ ចំពោះរបាយការណ៍នៃការសម្លាប់ឧក្រិដ្ឋជនគ្រឿងញៀន។ ជាមួយគ្នានេះ អ្នកនាំពាក្យក្រសួងការបរទេសអាមេរិក លោក Mark Toner បានទទូចឲ្យរដ្ឋាភិបាលហ្វីលីពីនធានាការគោរពសិទ្ធិមនុស្ស ពេលអនុវត្តបទបញ្ជា។
យោងតាមទីភ្នាក់ងារព័ត៌មាន Reuters អ្នកនាំពាក្យខាងលើ ក៏បានបញ្ជាក់ជំហររបស់អាមេរិកទៅហ្វីលីពីន។ នោះគឺអាមេរិក តែងតែបារម្ភចំពោះបញ្ហាសិទ្ធិមនុស្ស ការសម្លាប់មនុស្សក្រៅប្រព័ន្ធតុលាការ។ ប៉ុន្តែទន្ទឹមគ្នានោះ អាមេរិកក៏រក្សាការប្ដេជ្ញាចិត្តចំពោះទំនាក់ទំនងរវាងប្រទេសទាំងពីរ និងបន្តពង្រឹងមិត្តភាពឲ្យកាន់តែរឹងមាំ នៅស្របពេលនៃការកើនឡើងសកម្មភាពរបស់ចិននៅសមុទ្រចិនខាងត្បូង។
សូមបញ្ជាក់ផងដែរថា សង្គ្រាមប្រឆាំងឈ្មួញគ្រឿងញៀន ជាគោលនយោបាយអាទិភាពរបស់លោក Duterte ក្នុងការបោសសម្អាតបទល្មើស និងគ្រឿងញៀនឲ្យអស់ពីសង្គមហ្វីលីពីន។ ការបាញ់សម្លាប់មនុស្សយ៉ាងច្រើនក្នុងប្រតិបត្តិការនេះ រងការរិះគន់ខ្លាំង ប៉ុន្តែលោក Duterte មិនបានខ្វល់ពាក្យសំដីទាំងនោះឡើយ និងបានដាក់បញ្ជាដល់កងកម្លាំងប្រដាប់អាវុធទាំងអស់ បន្តការងាររបស់ខ្លួនទៅមុខទៀត៕
Tag:
អាមេរិក
ហ្វីលីពីន
© រក្សាសិទ្ធិដោយ thmeythmey.com