អន្តរជាតិ
អាមេរិក ប្រាប់សម្ព័ន្ធមិត្តកុំវាយគ្នាឯង និងត្រូវផ្ដោតលើក្រុម ISIS វិញ
×![]()
ដោយ: តន ចាន់រិទ្ធារ៉ា
ប្រតិបត្តិការឆ្លងព្រំដែនរបស់កងទ័ពតួកគី មិនតែត្រឹមតែបានបោសសម្អាតក្រុមជ្រុលនិយមរដ្ឋឥស្លាមចេញពីព្រំដែនជាមួយស៊ីរីទេ តែក៏បានរុញច្រានកងកម្លាំងឃើដ (YPG) ដែលគាំទ្រដោយអាមេរិកផងដែរ។ ជាមួយនឹងស្ថានការណ៍បែបនេះ អាមេរិក ដែលកំពុងដឹកនាំក្រុមសម្ព័ន្ធមិត្តវាយប្រយុទ្ធនឹងក្រុមរដ្ឋឥស្លាម បានណែនាំសម្ព័ន្ធមិត្តរបស់ខ្លួនទាំងពីរ ផ្អាកការប្រយុទ្ធគ្នាសិនទៅ ដ្បិតបញ្ហានេះអាចប៉ះពាល់ដល់យុទ្ធនាការប្រឆាំងក្រុមជ្រុលនិយម។
សហរដ្ឋអាមេរិក កំពុងខ្វាយខ្វល់យ៉ាងខ្លាំង បន្ទាប់ពីសម្ព័ន្ធមិត្តរបស់ខ្លួន គឺតួកគី និងកងកម្លាំងឃើដ (YPG) វាយប្រយុទ្ធគ្នានៅលើទឹកដីស៊ីរី។ ដោយមើលឃើញពីការប៉ះពាល់លើយុទ្ធសាស្ត្រសង្គ្រាមនៅស៊ីរី អាមេរិក នៅថ្ងៃទី២៩ ខែសីហា បានប្រាប់តួកគី និងក្រុមឃើដ ប្ដូរទិសដៅលើក្រុមរដ្ឋឥស្លាម ដែលជាគោលដៅចម្បងជំនួសវិញ ជាជាងការវាយគ្នាឯងនោះ។
ជាងមួយសប្ដាហ៍មកនេះ កងកម្លាំងតួកគី និងក្រុមឧទ្ទាមស៊ីរីសេរី ដែលគាំទ្រដោយយន្តហោះចម្បាំងតួកគី បានដណ្ដើមបានទីក្រុង Jarablus ពីក្រុមរដ្ឋឥស្លាម និងក្រុមឃើដ ដែលគ្រប់គ្រងផ្នែកខ្លះនៃទីក្រុងនេះ។ មកទល់ពេលនេះ ក្រុមឧទ្ទាមស៊ីរីសេរី ដែលមានតួកគីនៅពីក្រោយ កំពុងរុលទៅមុខឆ្ពោះទៅកាន់ទីក្រុង Manbij នៅភាគខាងជើង ដែលកំពុងស្ថិតក្រោមការគ្រប់គ្រងរបស់ក្រុមឃើដ បន្ទាប់ពីបណ្ដេញក្រុមរដ្ឋឥស្លាមរួចមក។
ថ្លែងក្នុងសន្និសីទកាសែតនៅមន្ទីរបញ្ចកោណ រដ្ឋមន្ត្រីការពារជាតិអាមេរិក លោក Ash Carter បានស្នើឲ្យកងទ័ពតួកគី និងក្រុមឧទ្ទាមឃើដ ឈប់វាយគ្នាទៅវិញទៅមក និងត្រូវបន្តយុទ្ធនាការវាយប្រយុទ្ធនឹងក្រុមជ្រុលនិយមរដ្ឋឥស្លាម។ ប្រសិនបើការប៉ះទង្គិចរវាងសម្ព័ន្ធទាំងពីររបស់អាមេរិកនៅតែបន្តនោះ ការរួបរួមជាធ្លុងដើម្បីកម្ទេចក្រុមជ្រុលនិយម អាចប្រឈមមុខនឹងបញ្ហាមិនខានឡើយ ដ្បិតទាំងតួកគី និងក្រុមឃើដ សុទ្ធតែដើរតួនាទីសំខាន់ក្នុងប្រតិបត្តិការនេះ។
ជាមួយគ្នានេះ ក្នុងគោលដៅបន្ថយកម្ដៅនោះ អាមេរិកក៏បានប្រាប់ក្រុមឧទ្ទាមឃើដ កុំឲ្យឆ្លងមកច្រាំងខាងកើតនៃទន្លេ Euphrates ដែលតួកគីចាត់ទុកជាបន្ទាត់ក្រហម ប្រសិនបើមិនចង់បាត់ការគាំទ្រពីអាមេរិកនោះ។ បន្ទាប់ពីការព្រមានរបស់អាមេរិកហើយនោះ កងកម្លាំងឃើដ ហាក់ដូចជាដកថយទៅកាន់ទីក្រុង Manbij ដែលទើបតែយកបានពីក្រុមរដ្ឋឥស្លាម ក្រោមការគាំទ្ររបស់អាមេរិក។
តាមពិតទៅគោលដៅធំនៃប្រតិបត្តិការរបស់តួកគីនៅស៊ីរី គឺរុញច្រានក្រុមឃើដកុំឲ្យឆ្លងទន្លេនេះ បន្ទាប់ពីមួយរយៈពេលចុងក្រោយនេះ កងកម្លាំងឃើដនេះ បានពង្រីកដែនដីគ្រប់គ្រងយ៉ាងច្រើន តាមបណ្ដោយព្រំដែនតួកគី និងស៊ីរី។ ដោយសារហេតុនេះ ទើបតួកគីបើកដៃឲ្យក្រុមឧទ្ទាមស៊ីរីសេរី បន្តដំណើរទៅកាន់ទីក្រុង Manbij ដែលស្ថិតនៅមិនឆ្ងាយប៉ុន្មានពី Jarablus៕
សហរដ្ឋអាមេរិក កំពុងខ្វាយខ្វល់យ៉ាងខ្លាំង បន្ទាប់ពីសម្ព័ន្ធមិត្តរបស់ខ្លួន គឺតួកគី និងកងកម្លាំងឃើដ (YPG) វាយប្រយុទ្ធគ្នានៅលើទឹកដីស៊ីរី។ ដោយមើលឃើញពីការប៉ះពាល់លើយុទ្ធសាស្ត្រសង្គ្រាមនៅស៊ីរី អាមេរិក នៅថ្ងៃទី២៩ ខែសីហា បានប្រាប់តួកគី និងក្រុមឃើដ ប្ដូរទិសដៅលើក្រុមរដ្ឋឥស្លាម ដែលជាគោលដៅចម្បងជំនួសវិញ ជាជាងការវាយគ្នាឯងនោះ។
ជាងមួយសប្ដាហ៍មកនេះ កងកម្លាំងតួកគី និងក្រុមឧទ្ទាមស៊ីរីសេរី ដែលគាំទ្រដោយយន្តហោះចម្បាំងតួកគី បានដណ្ដើមបានទីក្រុង Jarablus ពីក្រុមរដ្ឋឥស្លាម និងក្រុមឃើដ ដែលគ្រប់គ្រងផ្នែកខ្លះនៃទីក្រុងនេះ។ មកទល់ពេលនេះ ក្រុមឧទ្ទាមស៊ីរីសេរី ដែលមានតួកគីនៅពីក្រោយ កំពុងរុលទៅមុខឆ្ពោះទៅកាន់ទីក្រុង Manbij នៅភាគខាងជើង ដែលកំពុងស្ថិតក្រោមការគ្រប់គ្រងរបស់ក្រុមឃើដ បន្ទាប់ពីបណ្ដេញក្រុមរដ្ឋឥស្លាមរួចមក។
ថ្លែងក្នុងសន្និសីទកាសែតនៅមន្ទីរបញ្ចកោណ រដ្ឋមន្ត្រីការពារជាតិអាមេរិក លោក Ash Carter បានស្នើឲ្យកងទ័ពតួកគី និងក្រុមឧទ្ទាមឃើដ ឈប់វាយគ្នាទៅវិញទៅមក និងត្រូវបន្តយុទ្ធនាការវាយប្រយុទ្ធនឹងក្រុមជ្រុលនិយមរដ្ឋឥស្លាម។ ប្រសិនបើការប៉ះទង្គិចរវាងសម្ព័ន្ធទាំងពីររបស់អាមេរិកនៅតែបន្តនោះ ការរួបរួមជាធ្លុងដើម្បីកម្ទេចក្រុមជ្រុលនិយម អាចប្រឈមមុខនឹងបញ្ហាមិនខានឡើយ ដ្បិតទាំងតួកគី និងក្រុមឃើដ សុទ្ធតែដើរតួនាទីសំខាន់ក្នុងប្រតិបត្តិការនេះ។
ជាមួយគ្នានេះ ក្នុងគោលដៅបន្ថយកម្ដៅនោះ អាមេរិកក៏បានប្រាប់ក្រុមឧទ្ទាមឃើដ កុំឲ្យឆ្លងមកច្រាំងខាងកើតនៃទន្លេ Euphrates ដែលតួកគីចាត់ទុកជាបន្ទាត់ក្រហម ប្រសិនបើមិនចង់បាត់ការគាំទ្រពីអាមេរិកនោះ។ បន្ទាប់ពីការព្រមានរបស់អាមេរិកហើយនោះ កងកម្លាំងឃើដ ហាក់ដូចជាដកថយទៅកាន់ទីក្រុង Manbij ដែលទើបតែយកបានពីក្រុមរដ្ឋឥស្លាម ក្រោមការគាំទ្ររបស់អាមេរិក។
តាមពិតទៅគោលដៅធំនៃប្រតិបត្តិការរបស់តួកគីនៅស៊ីរី គឺរុញច្រានក្រុមឃើដកុំឲ្យឆ្លងទន្លេនេះ បន្ទាប់ពីមួយរយៈពេលចុងក្រោយនេះ កងកម្លាំងឃើដនេះ បានពង្រីកដែនដីគ្រប់គ្រងយ៉ាងច្រើន តាមបណ្ដោយព្រំដែនតួកគី និងស៊ីរី។ ដោយសារហេតុនេះ ទើបតួកគីបើកដៃឲ្យក្រុមឧទ្ទាមស៊ីរីសេរី បន្តដំណើរទៅកាន់ទីក្រុង Manbij ដែលស្ថិតនៅមិនឆ្ងាយប៉ុន្មានពី Jarablus៕
Tag:
អាមេរិក
តួកគី
ឃើដ
ក្រុមរដ្ឋឥស្លាម
© រក្សាសិទ្ធិដោយ thmeythmey.com
