អន្តរជាតិ
នយោបាយអន្តរជាតិ
ប្រមុខUN«បាន គីមូន» សរសើរ មាតាប្រជាធិបតេយ្យមីយ៉ាន់ម៉ា«ស៊ូជី»និងអ្នកកែទម្រង់«ថេនសេន»
×
អគ្គលេខាធិការអង្គការសហប្រជាជាតិ លោក បាន គីមូន (Ban Ki-Moon) នៅថ្ងៃទី៣០ ខែសីហាម្សិលមិញ បានបំពេញទស្សនកិច្ចជាលើកទី៥ទៅកាន់រដ្ឋកំពុងរះប្រជាធិបតេយ្យអាស៊ីអាគ្នេយ៍មីយ៉ាន់ម៉ា។ ប្រមុខអង្គការសហប្រជាជាតិរូបនេះ បានជួបជាមួយនឹងប្រមុខការទូតមីយ៉ាន់ម៉ាលោកស្រី អ៊ុងសាន ស៊ូជី (Aung San Suu Kyi) ដោយលោក បានលើកឡើងពីផលលំបាកនិងបញ្ហាប្រឈមរបស់មីយ៉ាន់ម៉ា ក៏ដូចជា សរសើរការប្រឹងប្រែងរបស់លោកស្រីអ៊ុងសាន ស៊ូជី និងអតីតប្រធានាធិបតីមីយ៉ាន់ម៉ា លោក ថេន សេន (Thein Sein)ផងដែរ។
«ថ្ងៃនេះ លោកស្រី អ៊ុងសាន ស៊ូជី និងខ្ញុំ បានព្រមព្រៀងគ្នាថា ប្រជាជនមីយ៉ាន់ម៉ា ទោះបីជាមានពូជសាសន៍, សាសនា ឬកម្រិតសេដ្ឋកិច្ច, តម្រូវការសង្គម និងឱកាសសេដ្ឋកិច្ច ក្នុងបរិយាកាសណាក៏ដោយ គ្រប់គ្នាត្រូវតែទទួលបានសេរីភាព ភាពស្មើភាព និងការធានាបានសន្តិសុខ។»។
នេះគឺជាសេចក្តីថ្លែងការណ៍របស់លោកបាន ក្នុងសន្និសីទសារព័ត៌មានរួមជាមួយនឹងលោកស្រីស៊ូជី ក្រោយនៃកិច្ចប្រជុំ ដែលផ្សាយដោយមជ្ឈមណ្ឌលព័ត៌មានអង្គការសហប្រជាជាតិ។
នាឱកាសដដែលនោះ លោកអគ្គលេខាធិការជិតផុតអាណត្តិ បានថ្លែងសរសើរ និងគាំទ្រចំពោះការប្រឹងប្រែងរបស់លោកស្រីអ៊ុងសាន ស៊ូជី ក្នុងការកសាងលទ្ធិប្រជាធិបតេយ្យមីយ៉ាន់ម៉ា ហើយលោក ក៏បានសម្តែងភាពរីករាយក្នុងការវិលត្រលប់មកកាន់មីយ៉ាន់ម៉ាក្នុងទិដ្ឋភាពថ្មីប្រកបដោយសន្តិភាព កិត្តិយស និងគួរមោទនភាព នៃការផ្លាស់ប្តូរចុងក្រោយដែលជាផ្នែកមួយដែលចេញពីការបោះឆ្នោតខែវិច្ឆិកាឆ្នាំ២០១៥កន្លងទៅ។
ក្រៅពីការលើកទឹកចិត្តលោកស្រីអ៊ុងសាន ស៊ូជី ក្នុងការប្រឹងប្រែងកសាងប្រទេសពីរបបគ្រប់គ្រងដោយយោធា ទៅជាលទិ្ធប្រជាធិបតេយ្យប្រមុខអង្គការសហប្រជាជាតិរូបនោះ ក៏មិនភ្លេចមេដឹកនាំនយោបាយគំរូមីយ៉ាន់ម៉ាមួយរូប ដែលនោះគឺជា លោកអតីតប្រធានាធិបតី ថេន សេននោះឯង។ លោក បាន គីមូន បានអះអាងថា លោក ពិតជាសរសើរពីភាពដឹកនាំរបស់លោកថេន សេន ដែលបានចូលរួមចំណែកលើកស្ទួយការកែទម្រង់ប្រទេស។
សូមរម្លឹកផងដែរថា កាលពីថ្ងៃទី០៨ ខែវិច្ឆិកា ឆ្នាំ ២០១៥ កន្លងទៅ មីយ៉ាន់ម៉ា បានរៀបចំការបោះឆ្នោតប្រជាធិបតេយ្យលើកដំបូងបំផុតក្នុងរយៈពេល៦ទសវត្សរ៍ចុងក្រោយ ក្រោមការដឹកនាំដោយអតីតប្រធានាធិបតី ថេន សេន។ ជាលទ្ធផលបក្សសម្ព័ន្ធជាតិដើម្បីប្រជាធិបតេយ្យរបស់លោកស្រី អ៊ុងសាន ស៊ូជី ទទួលបានជ័យជម្នះភ្លូកទឹកភ្លូកដី ដោយតំណាងរាស្ត្របក្សលោកស្រីស៊ូជី មានសមាសភាពសរុបនៅក្នុងរដ្ឋសភា២៥៥នៃអាសនៈសរុប៤៤០និងសមាសភាពក្នុងព្រឹទ្ធិសភា១៣៥ នៃអាសនៈសរុប២២៤។
ជារឿងដែលគួរសរសើរ និងកត់សម្គាល់នោះ រដ្ឋាភិបាលលោកថេន សេន ដែលបានឡើងកាន់អំណាចក្នុងដំណាក់កាលអន្តរកាលពីរបបយោធាមកកាន់របបប្រជាធិបតេយ្យ បានបង្ហាញភាពចាស់ទុំផ្នែកនយោបាយ ដោយហ៊ានទទួលស្គាល់ចំពោះលទ្ធផលនៃការបោះឆ្នោតដែលខុសពីការបោះឆ្នោតមុនៗរបស់មីយ៉ាន់ម៉ាដែលរៀបចំដោយយោធា។ ភាពដឹកនាំក្នុងការផ្សះផ្សារជាតិ រួមជាមួយនឹងភាពចាស់ទុំនយោបាយរបស់លោក ថេន សេន លោក ត្រូវបានគេចាត់ទុកជា«អ្នកកែទម្រង់មីយ៉ាន់ម៉ា»៕
Tag:
មីយ៉ាន់ម៉ា
អាស៊ាន
© រក្សាសិទ្ធិដោយ thmeythmey.com