ជាតិ
អង់គ្លេសគ្រោងបើកសាកលវិទ្យាល័យ និងសាលាបណ្តុះបណ្តាលនៅកម្ពុជា
× ភ្នំពេញ៖ លោក Bill Longhurst ឯកអគ្គរាជទូតចក្រភពអង់គ្លេសប្រចាំកម្ពុជា បានថ្លែងថា ស្ថាប័នអប់រំរបស់ចក្រភពអង់គ្លេស កំពុងសិក្សាពីលទ្ធភាពបង្កើតសាកលវិទ្យាល័យ និងមជ្ឈមណ្ឌលបណ្តុះបណ្តាលជំនាញវិជ្ជាជីវៈនៅកម្ពុជា ដើម្បីចូលរួមចំណែកក្នុងការអភិវឌ្ឍវិស័យអប់រំនៅកម្ពុជា។ គម្រោងនេះ ត្រូវបានមន្ត្រីជាន់ខ្ពស់ក្រសួងអប់រំ យុវជន និងកីឡា សាទរ និងគាំទ្រផងដែរ។
ឯកអគ្គរាជទូតចក្រភពអង់គ្លេសប្រចាំនៅកម្ពុជា លោក Bill Longhurst បានថ្លែងនៅសន្និសីទសារព័ត៌មានថា ចក្រភពអង់គ្លេស បាននិងងកំពុងសិក្សាស្រាវជ្រាវពីលទ្ធភាព បើកសាកលវិទ្យាល័យ និងមជ្ឈមណ្ឌលបណ្តុះបណ្តាលនៅកម្ពុជា ក្នុងបំណងចូលរួមអភិវឌ្ឍន៍វិស័យអប់រំនៅកម្ពុជា។ ការថ្លែងនេះ គឺធ្វើឡើងនៅក្នុងពិធីអបអរសាទរ និងជូនដំណើរនិស្សិតជ័យលាភីអាហារូបករណ៍ Chevening នៅស្ថានទូតចក្រភពអង់គ្លេសប្រចាំនៅកម្ពុជា ក្នុងរាជធានីភ្នំពេញ កាលពីល្ងាចថ្ងៃទី៣០ ខែសីហា ឆ្នាំ២០១៦។ លោកឯកអគ្គរាជទូត ថ្លែងយ៉ាងដូច្នេះថា៖«យើងសង្ឃឹមថា ស្ថាប័នអប់រំរបស់ចក្រភពអង់គ្លេស នឹងឈានជើងមកដល់កម្ពុជា ហើយយើងសង្ឃឹមថា នៅថ្ងៃខាងមុខ និស្សិតកម្ពុជា នឹងទទួលបានការអប់រំជាន់ខ្ពស់ ដែលមានស្តង់ដារពីចក្រភពអង់គ្លេស»។
យ៉ាងណាក៏ដោយចុះ លោកឯកអគ្គរាជទូត ពុំបានបញ្ជាក់ពីកាលបរិច្ឆេទច្បាស់លាស់នោះទេ ដោយលើកពីមូលហេតុថា៖«យើងដឹងហើយថា ដើម្បីឈានជើងចូលទីផ្សារណាមួយ គឺស្ថានប័នទាំងអស់ហ្នឹង គឺត្រូវការស្រាវជ្រាវឲ្យបានល្អិនល្អន់ជាមុនសិន ដូច្នេះ ពួកគេត្រូវការពេលវេលា»។ ប៉ុន្តែលោកថា បច្ចុប្បន្ន មានស្ថាប័នអប់រំរបស់ចក្រភពអង់គ្លេសជាច្រើន បានឈានជើងចូលទីផ្សារនៅអាស៊ីអាគ្នេយ៍ ដោយបើកជាសាកលវិទ្យាល័យផង និងសាលាបណ្តុះបណ្តាលវិជ្ជាជីវៈផង ដើម្បីផ្តល់សេវាអប់រំដ៏ល្អ ដល់និស្សិតនៅក្នុងតំបន់រួចមកហើយ។
ទាក់ទងនឹងគម្រោងបើកសាកលវិទ្យាល័យ និងមជ្ឈមណ្ឌលបណ្តុះបណ្តាលរបស់ស្ថាប័នអប់រំ ចក្រភពអង់គ្លេសនេះដែរ លោក សាមឺឌី ស៊ីវឌ្ឍនា អនុរដ្ឋលេខាធិការ ក្រសួងអប់រំ យុវជន និងកីឡា បានថ្លែងប្រាប់ក្រុមអ្នកសារព័ត៌មាន គ្រាដែលលោកចូលរួមជូនដំណើរនិស្សិតជ័យលាភីអាហារូបករណ៍ Chevening ថា ក្នុងនាមក្រសួងអប់រំ យុវជន និងកីឡា គឺមានគាំទ្រចំពោះគម្រោងនេះ។ លោកបញ្ជាក់យ៉ាងដូច្នេះថា៖«បើគេបើកសាលាកាន់តែច្រើន គឺកាន់តែល្អ ពីព្រោះ ធ្វើកូនខ្មែរកាន់តែរីកចម្រើន»៕
© រក្សាសិទ្ធិដោយ thmeythmey.com