ក្រុងសៀមរាបធ្វើស្ពានឆ្លងស្ទឹង២បន្ថែមទៀតដើម្បីសម្រួលចរាចរណ៍

ជាតិ

ក្រុងសៀមរាបធ្វើស្ពានឆ្លងស្ទឹង២បន្ថែមទៀតដើម្បីសម្រួលចរាចរណ៍

02, Sep 2016 , 9:19 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ ស្ពានថ្មចំនួន២ខ្សែបន្ថែមទៀត បានបើកការដ្ឋានសាងសង់ហើយនៅព្រឹកថ្ងៃទី២ កញ្ញានេះ។ អាជ្ញាធរខេត្តសៀមរាប បានរៀបចំគម្រោងសាងសង់ស្ពានថ្មនេះឡើង ដោយហេតុថា ស្ពានថ្មកាត់ស្ទឹងសៀមរាប ដែលតភ្ជាប់ជាមួយផ្លូវជាតិលេខ៦នោះ មានតែមួយខ្សែ ហើយវាតែងបង្កការកកស្ទះជារឿយៗ នៅពេលមានបុណ្យទានម្តងៗ។

ក្នុងពិធីបើកការដ្ឋានសាងសង់ស្ពានថ្មថ្មីនៅព្រឹកថ្ងៃទី២ កញ្ញា អភិបាលខេត្តសៀមរាប លោក ឃឹម ប៊ុនសុង ថ្លែងទាំងមោទនថា វត្តមានស្ពានថ្មីដែលគ្រោងនឹងដំណើរការក្នុងពេលដ៏ឆាប់ខាងមុខនេះ នឹងសម្រួលដល់ចរាចរណ៍ក្នុងខេត្តរបស់លោក ឲ្យកាន់តែប្រសើរឡើង។ លោកថា ស្ពានមួយខ្សែត្រូវបានសង់នៅជាប់ស្ពានថ្មចាស់ ដែលស្ថិតនៅមុខព្រះរាជដំណាក់ និងមួយខ្សែទៀត ស្ថិតនៅមុខវត្តពោធិ៍លង្កា។

លោក ឃឹម ប៊ុនសុងបញ្ជាក់ទៀតថា នៅពេលស្ពានថ្មមួយខ្សែទៀត ដែលសង់ជាប់នឹងស្ពានថ្មចាស់មុខវត្តដំណាក់ វានឹងក្លាយជាស្ពានភ្លោះដំបូងគេនៅទីក្រុងសៀមរាប។ លោកបានឲ្យដឹងទៀតថា ការសាងសង់ស្ពានថ្មីនៅក្បែរស្ពានបុរាណមុខព្រះរាជដំណាក់ នឹងប្រើបច្ចេកទេសត្រឹមត្រូវ ដើម្បីជៀសវាងធ្វើឲ្យប៉ះពាល់ដល់គ្រឹះស្ពានបុរាណ ដែលមានអាយុកាលជិតមួយសតវត្សមួយហើយនោះ។

អភិបាលខេត្តសៀមរាបមានជំនឿចិត្តថា វត្តមានស្ពានថ្មីដែលសាងសង់ឡើងដោយមន្ទីរសាធារណការខេត្តនៅពេលនេះ គឺនឹងអាចកាត់បន្ថយការកកស្ទះចរាចរណ៍ រួមនិងលើកសោភណ្ឌភាពទីក្រុងសៀមរាប ឲ្យកាន់តែប្រសើរឡើងមួយកម្រិតថែមទៀត។ លោកថា គម្រោង ស្ពានថ្មីនេះ គ្រោងនឹងប្រើពេល ៧ខែ ដើម្បីបញ្ចប់ការសាងសង់ ជារួមគឺមុនព្រឹត្តិការណ៍អង្គរសង្ក្រាន្តឆ្នាំ២០១៧។

គួរបញ្ជាក់ផងដែរថា ស្ពានដែលកំពុងបើកការដ្ឋានសាងសង់នៅពេលនេះ គឺមានប្រវែងបណ្តោយ ៤៦ម៉ែត្រ និងទទឹង ៨,២០ម៉ែត្រ៕