ជាតិ
សេដ្ឋកិច្ច
កំណើននៃការលក់ខុនដូ និងផ្ទះបូរីថយចុះពី«៣០ទៅ៥០%»
×
ភ្នំពេញ៖ វិស័យអចលនទ្រព្យបានរីកចម្រើនខ្លាំងក្នុងរយៈពេលប៉ុន្មានឆ្នាំចុងក្រោយនេះ។ ប៉ុន្តែកម្លាំងរីកចម្រើនបានបន្ថយឥទ្ធិពលរបស់វា។ ជាក់ស្តែង ស្ថានភាពនៅពេលនេះ បានបង្ហាញថា សកម្មភាពទិញលក់អចលនទ្រព្យបានថយចុះគួរឲ្យកត់សម្គាល់។ សកម្មភាពលក់ខុនដូបានធ្លាក់ចុះពី៣០ទៅ៥០ភាគរយក្នុងរយៈពេល៦ខែដើមឆ្នាំ២០១៦នេះ បើប្រៀបធៀបទៅនឹងរយៈពេលដូចគ្នាកាលពីឆ្នាំ២០១៥កន្លងមក។ សកម្មភាពលក់ផ្ទះនៅក្នុងបូរីបានធ្លាក់ចុះប្រមាណជា៣០ភាគរយ ក្នុងរយៈពេលដូចគ្នា នឹងខុនដូដែរ។
កញ្ញា គ្រុយ ណារិន អនុប្រធាននាយកដ្ឋាននៃនាយកដ្ឋានគោលនយោនបាយសេដ្ឋកិច្ច និងហិរញ្ញវត្ថុនៃក្រសួងសេដ្ឋកិច្ច និងហិរញ្ញវត្ថុបានថ្លែងប្រាប់សារព័ត៌មានថ្មីៗថា វិស័យអចលនទ្រព្យមិនទាន់ស្ថិតក្នុងស្ថានភាពហានិភ័យនៅឡើយទេ។ តែអ្វីដែលអ្នកជំនាញទូទៅអាចនិយាយបាន គឺថា ទីផ្សារអចលនទ្រព្យកំពុងផ្តល់សញ្ញាថា ការផ្គត់ផ្គង់កំពុងលើសតម្រូវការ។ ទោះបីជាការផ្គត់ផ្គង់កំពុងលើសតម្រូវការយ៉ាងណាក៏ដោយ ក៏កញ្ញា គ្រុយ ណារិន បានពិពណ៌នាថា តម្លៃនៃអចលនទ្រព្យមិនទាន់ត្រូវបានគេកែសម្រួលនៅឡើយទេ ពោល គឺតម្លៃនៅខ្ពស់ដដែល។
តម្លៃនៅដដែលមែន។ តែរបាយការណ៍នៃក្រសួងសេដ្ឋកិច្ច និងហិរញ្ញវត្ថុបានបង្ហាញថា កំណើននៃការលក់អចលនទ្រព្យមួយចំនួនត្រូវបានគេប៉ាន់ស្មានថា មានការថយចុះគួរឲ្យកត់សម្គាល់ ក្នុងនោះ កំណើននៃការលក់ខុនបានថយចុះរហូតដល់ទៅ៥០%គិតត្រឹមខែមិថុនាឆ្នាំ២០១៦ ស្របពេលដែលកំណើននៃការលក់ផ្ទះនៅតាមបូរី បានថយចុះប្រមាណជា៣០%។
ក្នុងខណៈពេលដែលវិស័យអចលនទ្រព្យទំនងជាប្រឈមនឹងបញ្ហានោះ គេសង្កេតឃើញឥណទានពីធនគារបានថមថយកំណើនពី៣៤%នៅឆ្នាំ២០១៤ មកនៅត្រឹម៣០%នៅឆ្នាំ២០១៥ ហើយវានឹងបន្តថមថយកំណើនទៀតនៅឆ្នាំ២០១៦នេះផងដែរ។ ក្នុងរយៈពេល៦ខែដើមឆ្នាំ២០១៦នេះ កំណើនឥណទានបានថមថយមកក្នុងអត្រាប្រមាណជា២២%ដែលទាបជាងអត្រា៣៦%ក្នុងរយៈពេលដូចគ្នាកាលពីឆ្នាំ២០១៥កន្លងមក។ កំណើន ទាំងឥណទាន និងប្រាក់បញ្ញើកំពុងតែមានការថមថយ ហើយនេះ ត្រូវបានគេវាយតម្លៃថា គឺជាសញ្ញាល្អ។ ប៉ុន្តែអ្នករៀបចំគោលនយោបាយក៏ត្រូវតែបន្តតាមដានឲ្យដិតដល់បន្ថែមទៀត ជាពិសេស ក្នុងវិស័យអចលនទ្រព្យ និងទំនាក់ទំនងរវាងអ្នកអភិវឌ្ឍអចលនទ្រព្យ ធនាគារ និងគ្រឹះស្ថានមីក្រូហិរញ្ញវត្ថុ។
កញ្ញា គ្រុយ ណារិន អនុប្រធាននាយកដ្ឋាននៃនាយកដ្ឋានគោលនយោនបាយសេដ្ឋកិច្ច និងហិរញ្ញវត្ថុនៃក្រសួងសេដ្ឋកិច្ច និងហិរញ្ញវត្ថុ បានពន្យល់បន្ថែមទៀតថា ការថមថយផ្នែកឥណទាននេះ គឺជាសញ្ញាល្អសម្រាប់វិស័យអចលនទ្រព្យ ព្រោះថា ការផ្តល់កម្ចីហួសហេតុពេក«វាអាចបង្កហានិភ័យ»។ តែសម្រាប់ពេលនេះ វាមិនទាន់មានហានិភ័យទេ»។ ចុះបើកាត់បន្ថយឥណទាន វាអាចធ្វើឲ្យទីផ្សារអចលនទ្រព្យកាន់តែជួបបញ្ហាឬទេ?
កញ្ញា គ្រុយ ណារិន បានពន្យល់ថា អ្នកជំនាញពាក់ព័ន្ធ នឹងមិនកាត់បន្ថយរហូតដល់ធ្វើឲ្យសេដ្ឋកិច្ចប្រឈមនឹងបញ្ហាកំណើននោះទេ។ តែអ្នកជំនាញចង់ធ្វើការកែសម្រួលកម្ចីដើម្បីឲ្យតម្រូវការ និងការផ្គត់ផ្គង់អចលនទ្រព្យវាស៊ីចង្វាក់គ្នាតែប៉ុណ្ណោះ៕
Tag:
សេដ្ឋកិច្ច
អចលនទ្រព្យ
© រក្សាសិទ្ធិដោយ thmeythmey.com