លោក យ៉ែម បុញ្ញឫទ្ធិថា ពេលCNRP ឈ្នះ ១ឆ្នាំផ្តល់ថវិកា ៥០ ម៉ឺនដុល្លារដល់ឃុំសង្កាត់នីមួយៗ

ជាតិ

នយោបាយជាតិ

លោក យ៉ែម បុញ្ញឫទ្ធិថា ពេលCNRP ឈ្នះ ១ឆ្នាំផ្តល់ថវិកា ៥០ ម៉ឺនដុល្លារដល់ឃុំសង្កាត់នីមួយៗ

03, Sep 2016 , 4:59 pm

រូបភាព

ដោយ:

អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ បានអះអាងពីគោលនយោបាយរបស់គណបក្សសង្គ្រោះជាតិថា នៅឈ្នះឆ្នោតដឹកនាំរដ្ឋភិបាល គណបក្សនេះ នឹងផ្តល់ថវិកាដល់ឃុំ-សង្កាត់នីមួយៗចំនួនពីរពាន់លានរៀល ឬប្រមាណ ៥០ ម៉ឺនដុល្លារ សម្រាប់ប្រើប្រាស់ក្នុងរយៈពេល ១ ឆ្នាំ ។

លោក យ៉ែម បុញ្ញឫទ្ធិ បានបកស្រាយពីគោលនយោបាយវិមជ្ឈការរបស់គណបក្សសង្គ្រោះជាតិ ដែលនឹងផ្តល់ អំណាច ថវិកា និងសេវាសាធារណៈ ដល់ឃុំសង្កាត់ ដើម្បីប្រើប្រាស់អភិវឌ្ឍមូលដ្ឋាន។ អ្នកនាំពាក្យគណបក្សប្រឆាំងរូបនេះ ប្រកាសប្រាប់អ្នកគាំទ្រគណបក្សសង្គ្រោះជាតិនៅប្រទេសបារាំង កាលពីថ្ងៃទី ២៧ សីហា ថា នៅពេលគណបក្សសង្គ្រោះជាតិដឹកនាំរដ្ឋាភិបាល គណបក្សនេះនឹងផ្តល់ថវិកាចំនួន ២ ពាន់លានរៀល ឬស្មើនឹង ៥០ ម៉ឺនដុលា្លរដល់ឃុំ-សង្កាត់នីមួយៗក្នុងមួយឆ្នាំ។

លោក បុញ្ញឫទ្ធិ បានរិះគន់គោលនយោបាយរបស់រដ្ឋាភិបាលបច្ចុប្បន្នដែលដឹកនាំដោយគណបក្សប្រជាជនកម្ពុជាថា មិនអាចឲ្យឃុំសង្កាត់កាត់បន្ថយភាពក្រីក្រ និងអភិវឌ្ឍមូលដ្ឋានបានទេ ព្រោះការផ្តល់ថវិកាដល់ឃុំសង្កាត់ចន្លោះតែពី ១ ម៉ឺន ទៅ ៥ ម៉ឺនដុលា្លរក្នុងមួយឆ្នាំប៉ុណ្ណោះ។ មន្ត្រីជាន់ខ្ពស់គណបក្សសង្គ្រោះជាតិខាងលើ បញ្ជាក់ថា បច្ចុប្បន្នប្រជាពលរដ្ឋខ្មែរជាច្រើន បានធ្វើចំណាកស្រុកទៅធ្វើជាកម្មករនៅក្រៅប្រទេស ដោយសារតែគ្មានការងារធ្វើនៅក្នុងប្រទេស ដែលផ្ទុយពីការអះអាងរបស់រដ្ឋាភិបាលថា ពលរដ្ឋកម្ពុជាមានការងារធ្វើដល់ទៅ ៩៩ ភាគរយ។

លោក យ៉ែម បុញ្ញឫទ្ធិ ពន្យល់បន្ថែមថា គោលនយោបាយផ្តល់ថវិកា ៥០ ម៉ឺនដុល្លារដល់ឃុំសង្កាត់របស់គណបក្សសង្គ្រោះជាតិ អាចឲ្យឃុំសង្កាត់ មានលទ្ធភាពកាត់បន្ថយភាពក្រីក្រ និងអភិវឌ្ឍមូលដ្ឋានបាន ហើយជាពិសេសអាចបង្កើតការងារទប់ស្កាត់ការធ្វើចំណាកស្រុកទៀតផង។ លោកថា កម្ពុជាបច្ចុប្បន្នមានធនធានមនុស្ស និងធនធានធម្មជាតិ សម្រាប់អភិវឌ្ឍប្រទេសបាន ឲ្យតែចេះកែច្នៃធនធានទាំងនោះ។