អន្តរជាតិ
នយោបាយអន្តរជាតិ
លោកអូបាម៉ា ទទូចឲ្យចិន «ចៀសវាងសម្ញែងសាច់ដុំដាក់ប្រទេសតូចៗជាងខ្លួន»លើបញ្ហាសមុទ្រចិនខាងត្បូង
×![]()
ដោយ: ថ្មីៗ
មុនពេលជួបជាមួយនឹងលោកប្រធានាធិបតីចិន ស៊ី ជិនពីង លោកប្រធានាធិបតីអាមេរិក បារ៉ាក់ អូបាម៉ា បានផ្ញើសារដោយប្រយោលដោយទទូចឲ្យក្រុងប៉េកាំង បង្ហាញពីតួនាទីប្រកបដោយការទទួលខុសត្រូវរបស់ខ្លួន ក្នុងនាមជាមហាអំណាចដែលកំពុងតែមានឥទ្ធិពលរបស់ពិភពលោក។ លោកប្រធានាធិបតីអាមេរិករូបនោះ ក៏ទទូចឲ្យចិនចៀសវាងការបង្ហាញសាច់ដុំដាក់ប្រទេសតូចជាងខ្លួន ដូចជាករណីជម្លោះសមុទ្រចិនខាងត្បូងជាដើមនោះ។ 
ថ្លែងក្នុងកិច្ចសម្ភាសន៍ជាមួយនឹងសារព័ត៌មាន CNN លោក អូបាម៉ា ដែលគ្រោងនឹងជួបលោក ស៊ី នៅក្នុងកិច្ចប្រជុំកំពូលក្រុមប្រទេស G20 ដែលចិនជាម្ចាស់ផ្ទុះនាពេលខាងមុខដ៏ខ្លី បានអះអាងថា អាមេរិក គាំទ្រចំពោះការងើបឡើងនៃឥទ្ធិពលរបស់ចិនបែបសន្តិភាព ក៏ប៉ុន្តែ ក្រុងប៉េកាំង ក៏ត្រូវដឹងដែរថា ទន្ទឹមនឹងការកើនឡើងនៃអំណាចឬឥទ្ធិពលរបស់ខ្លួន ចិន ក៏ត្រូវមានការទទួលខុសត្រូវកាន់តែច្រើនផងដែរ»។
លោកប្រធានាធិបតីជិតអាណត្តិអាមេរិករូបនោះ ក៏បានបន្ថែមយ៉ាងដូច្នេះថា «ប្រាកដណាស់អ្នក(ចិន) ធំជាងហ្វីលីពីន ឬវៀតណាម ឬប្រទេសដទៃផ្សេងទៀត... តែនេះមិនមែនជាហេតុផលដែលអ្នកត្រូវបង្ហាញសាច់ដុំដើម្បីសម្ញែងលើប្រទេសទាំងនោះនោះទេ។ ប្រសិនបើអ្នកផ្តល់ហត្ថលេខាលើសន្ធិសញ្ញាហើយ អ្នកត្រូវបានចងភ្ជាប់តាមច្បាប់អន្តរជាតិ»។
បើទោះបីជាប្រធានាធិបតីអាមេរិក មិនបានបញ្ជាក់ចំៗថាតើការបង្ហាញសាច់ដុំនោះជាអ្វីក៏ដោយ គេបានដឹងច្បាស់ហើយថា វាគ្មានអ្វីក្រៅពីកម្លាំងយោធានោះទេ។ ហើយសេចក្តីថ្លែងការណ៍នេះ ក៏ទំនងជាសំដៅទៅលើសកម្មភាពយោធាចុងក្រោយនេះរបស់ចិននៅក្នុងសមុទ្រចិនខាងត្បូងដែលចិន អះអាងថាជាការធ្វើសមយុទ្ធជាប្រចាំរបស់កងទ័ពខ្លួនដើម្បីត្រៀមលក្ខណៈការពារ និងប្រឆាំងនឹងសត្រូវខាងក្រៅ ដែលវា ក៏ស្របពេល និងក្រោយពេលដែលតុលាការអន្តរជាតិកាត់ក្តីឲ្យចិនចាញ់ហ្វីលីពីនក្នុងសំណុំរឿងសមុទ្រចិនខាងត្បូងផងដែរនោះ។
សូមជម្រាបផងដែរថា បើទោះបីជា អាមេរិក មិនមែនជាភាគីនៅក្នុងជម្លោះសមុទ្រចិនខាងត្បូងដូចជាបណ្តាសមាជិកអាស៊ានដែលជាសម្ព័ន្ធមិត្តខ្លួនហ្វីលីពីន និងវៀតណាមក៏ដោយ អាមេរិក បានប្រលូកខ្លួនយ៉ាងជ្រៅ និងសកម្មនៅក្នុងជម្លោះនោះ។ ហើយនោះគឺ ក្រៅពីការចេញសេចក្តីថ្លែងការណ៍រិះគន់សកម្មភាពចិននៅតំបន់ជម្លោះនោះ អាមេរិក បានបញ្ជូននាវា និងយន្តហោះចម្បាំងរបស់ខ្លួនជាបន្តបន្ទាប់ដើម្បីប្រឆាំងចិនក្រោមរូបភាពនៃការអនុវត្តសិទ្ធិសេរីភាពនៃការហោះហើរ និងធ្វើនាវាចរណ៍អន្តរជាតិ។
តាមសេចក្តីប្រកាសរបស់ទីប្រឹក្សាសន្តិសុខរងអាមេរិកលោក Ben Rhod លោកប្រធានាធិបតីបារ៉ាក់ អូបាម៉ា នឹងជួបពិភាក្សាទ្វេភាគីជាមួយនឹងលោកប្រធានាធិបតីស៊ី ជិនពីង នៅក្រៅនៃកិច្ចប្រជុំកំពូលក្រុមប្រទេសG20 ដែលប្រព្រឹត្តឡើងនៅក្នុងប្រទេសចិននៅសប្តាហ៍ក្រោយនេះ។ ហើយលោក អូបាម៉ា ក៏គ្រោងនឹងលើកពីបញ្ហាសមុទ្រចិនខាងត្បូងដើម្បីជជែកផងដែរ៕
Tag:
អាមេរិក
ចិន
សមុទ្រចិនខាងត្បូង
© រក្សាសិទ្ធិដោយ thmeythmey.com
