ជាតិ
សិល្បះ
កម្ពុជាយកបទចម្រៀងខ្មែរមួយបទទៅប្រកួតប្រឡងចម្រៀងសម័យកម្រិតអាស៊ាននៅប្រទេសថៃ
×
គណៈកម្មការមហោស្រព ចម្រៀងនិងតន្ត្រីសម័យថ្នាក់ជាតិលើកទី៤ ឆ្នាំ ២០១៦ បានសម្រេចយកបទចម្រៀងតែងនិពន្ធថ្មីមួយបទ ក្រោមចំណងជើងថា «អំនួតអ្នកចិញ្ចឹមសត្វ» ទៅប្រកួតនៅក្នុងកម្មវិធីប្រឡងចម្រៀងសម័យកម្រិតអាស៊ាន នៅក្នុងប្រទេសថៃ នាពេលខាងមុខ។
អនុប្រធានប្រចាំការគណៈកម្មការមហោស្រព ចម្រៀង និងតន្ត្រីសម័យថ្នាក់ជាតិលើកទី៤ ឆ្នាំ ២០១៦ លោក ជា ច័ន្ទបរិបូរណ៍ បានបញ្ជាក់ថា ការសម្រេចបញ្ជូនបទចម្រៀងនិពន្ធថ្មីរបស់កូនខ្មែរទៅប្រឡងនេះ ធ្វើឡើងតាមការស្នើសុំរបស់សមាជិកគណកម្មការវាយតម្លៃបទចម្រៀងសម័យកម្រិតអាស៊ាននៅប្រទេសថៃ។ លោក បរិបូរណ៍ បានពន្យល់ថា មូលហេតុដែលក្រុមងាររបស់លោកសម្រេចយកបទចម្រៀងនិពន្ធថ្មីក្រោមចំណង «អំនួនអ្នកចិញ្ចឹមសត្វ» ទៅប្រឡង ដោយសារបទនេះ បានជាប់ចំណាត់លេខ ១ នៅក្នុងព្រឹត្តិការណ៍មហោស្រព ចម្រៀង និងតន្ត្រីសម័យថ្នាក់ជាតិលើកទី៤ ដែលទើបបិទបញ្ចប់កាលពីថ្ងៃទី ៣១ ខែសីហា ឆ្នាំ ២០១៦ កន្លងទៅ។
លោក ជា ច័ន្ទបរិបូរណ៍ ដែលជារដ្ឋលេខាធិការក្រសួងព័ត៌មានផងនោះ បានបរិយាយទៀតថា បទ ចម្រៀង«អំនួនអ្នកចិញ្ចឹមសត្វ» ជាស្នាដៃនិពន្ធរបស់ក្រុមតន្ត្រីខេត្តពោធិ៍សាត់ ដែលជាចង្វាក់បែបខ្មែរ គឺចង្វាក់តាលុង និងមានខ្លឹមសារល្អ ។ « បទចម្រៀងនេះ វាបង្ហាញពីអត្តសញ្ញាណរបស់ខ្មែរ។ យើងប្រឡងលើឆាកអន្តរជាតិបែបនេះ ត្រូវតែយករបស់ដែលបង្កើតឡើងដោយខ្មែរទើបវាជាមានមោទនភាពជាតិពិតប្រាកដ»។ លោក បរិបូរណ៍លើកឡើងយ៉ាងនេះហើយ ក៏បន្តបង្ហាញពីអារម្មណ៍បែបនេះថា៖« យើងមានមោទនភាពជាតិ ហើយក្រសួងពត៌មាន មានមោទភាពណាស់ដែលសម្រេចដាក់បទចម្រៀងនេះទៅប្រឡងលក្ខណៈអន្តរជាតិបែបនេះ។ ហើយខ្ញុំនៅតែមោទនភាព បើទោះបីជាលទ្ធផលនៃការប្រឡងខាងមុខយើងធ្លាក់ឬជាប់ក៏ដោយ។ ខ្ញុំមានសង្ឃឹម...»។
បើតាមលោកអនុប្រធានប្រចាំការគណៈកម្មការមហោស្រព ចម្រៀង និងតន្ត្រីសម័យថ្នាក់ជាតិលើកទី៤ ខាងលើ ការប្រឡងចម្រៀងសម័យកម្រិតអាស៊ាននេះ មិនតម្រូវឲ្យកម្ពុជាបញ្ជូនក្រុមតន្ត្រី ឬអ្នកចម្រៀងទៅប្រឡងដោយផ្ទាល់ទេ ដោយគ្រាន់តែថតចម្រៀងនោះ ជាDVD ហើយប្រែខ្លឹមសារជាភាសាអង់គ្លេសតែប៉ុណ្ណោះ។
មន្ត្រីជាន់ខ្ពស់ក្រសួងព័ត៌មាន បន្ថែមថា កម្មវិធីប្រឡង ចម្រៀងសម័យកម្រិតអាស៊ាន នេះ ធ្វើឡើងជារឿងរាល់ឆ្នាំ តែកម្ពុជាមិនដែលបានចូលរួមនោះទេ ដោយលើកនេះជាលើកទី ១ ។ យ៉ាងណាលោក បរិបូរណ៍ នៅមិនទាន់អាចនិយាយ បានថា កម្មវិធីប្រឡងនេះ នឹងចាប់ផ្តើមនៅពេលណាឲ្យប្រាកដទេ ដោយលោកគ្រាន់តែដឹងថា កម្មវិធីនេះផុតកំណត់ទទួលពាក្យប្រឡងនៅថ្ងៃទី ៩ ខែកញ្ញា នេះ៕
Tag:
ជា ច័ន្ទបរិបូរណ៍
តន្ត្រី
© រក្សាសិទ្ធិដោយ thmeythmey.com