ជាតិ
ក្រសួងការងារ ប្រាប់កម្មសិក្សាការីខ្មែរកុំឲ្យចាញ់បោកមេខ្យល់ ពេលកំពុងធ្វើការនៅប្រទេសជប៉ុន
×
ក្រសួងការងារ និងបណ្ដុះបណ្ដាល បានក្រើនរម្លឹកដល់កម្មសិក្សាការីខ្មែរ ដែលធ្វើការនៅប្រទេសជប៉ុន កុំឲ្យផ្លាស់ប្ដូរកន្លែងធ្វើការរបស់ខ្លួនជាដាច់ខាត ព្រោះថាវានឹងនាំឲ្យអ្នកទាំងនោះ ក្លាយជាកម្មសិក្សាការីខុសច្បាប់។ នេះបើតាមសេចក្ដីជូនដំណឹងរបស់ក្រសួង នៅថ្ងៃទី១ខែកញ្ញា។
សេចក្ដីជូនដំណឹងក្រសួងការងារ និងបណ្ដុះបណ្ដាលវិជ្ជាជីវៈឲ្យដឹងថា នាពេលថ្មីៗនេះមានកម្មសិក្សាការីខ្មែរមួយចំនួនបានចាញ់បោកមេខ្យល់អូសទាញឲ្យក្លាយជាកម្មសិក្សាការីខុសច្បាប់ ក្រោមរូបភាពផ្ដល់កន្លែងធ្វើការថ្មីដែលស្របច្បាប់ ទទួលបានប្រាក់បៀវត្សច្រើនជាងមុន និងទទួលសិទ្ធិស្នាក់នៅស្របច្បាប់នៅប្រទេសជប៉ុន។ ក្រសួងបញ្ជាក់ថា ការរត់គេចខ្លួន(ការប្ដូរកន្លែងធ្វើការ) នេះ នឹងបង្ករផលលំបាកដល់កម្មសិក្សាការីផ្ទាល់ឲ្យក្លាយជាកម្មសិក្សាការីខុសច្បាប់ ខាតបង់ប្រាក់ឲ្យមេខ្យល់ ប្រឈមនឹងការចាប់ខ្លួន និងបាត់បង់ឱកាសរកប្រាក់។ ចំណែកក្រុមគ្រួសារកម្មសិក្សាការី ក៏អាចប្រឈមនឹងពាក្យបណ្ដឹងដោយសារការមិនអនុវត្តតាមកិច្ចសន្យារបស់កម្មសិក្សាការី។ ហើយកត្តានេះ ក៏ធ្វើកម្ពុជាបាត់បង់ទីផ្សារការងារនៅប្រទេសជប៉ុនផងដែរ។
ករណីដែលមាបញ្ហាអ្វីមួយកើតឡើងនៅកន្លែងការងារ កម្មសិក្សាការីត្រូវស្វែងរកអន្តរាគមន៍ពីសមាគមគ្រប់គ្រង ឬស្ថានទូតកម្ពុជាប្រចាំនៅប្រទេសជប៉ុន តាមរយៈទូរស័ព្ទលេខ ០៨០ ៤៦៨៩ ៩៣៧៤ ឬតាមបណ្ដាញសង្គមហ្វេសប៊ុក Royal Embassy of Cambodia in Japan ។
ជាមួយគ្នានេះ ក្រសួងបានណែនាំដល់ទីភ្នាក់ងារឯកជន ដែលធ្វើការជ្រើសរើស បណ្ដុះបណ្ដាល បញ្ជូន និងគ្រប់គ្រងកម្មសិក្សាការីខ្មែរទៅធ្វើកម្មសិក្សា និងធ្វើការនៅប្រទេសជប៉ុន ត្រូវបង្កើនការយកចិត្តទុកដាក់លើការគ្រប់គ្រង ផ្ដល់ប្រឹក្សា និងពង្រឹងទំនាក់ទំនងជាមួយកម្មសិក្សាការីរបស់ខ្លួនឲ្យបានជិតស្និទ។ នៅពេលមានករណីកម្មសិក្សាការីរត់គេចខ្លួន ទីភ្នាក់ងារជ្រើសរើសឯកជនត្រូវរូសរាន់រាយការណ៍ជូនអាជ្ញាធរមានសមត្ថកិច្ច និងស្ថាប័នពាក់ព័ន្ធនៅប្រទេសជប៉ុន ជាពិសេសស្ថានទូតកម្ពុជាប្រចាំនៅប្រទេសជប៉ុន។ បន្ទាប់មកត្រូវជូនដំណឹងដល់ក្រុមគ្រួសារកម្មសិក្សាការី ដោយមានអាជ្ញាធរមូលដ្ឋានដឹងឮ។ បន្ទាប់មកទៀត ទីភ្នាក់ងារជ្រើសរើសឯកជនត្រូវផ្ញើរបាយការណ៍ពាក់ព័ន្ធទាំងនោះ មកនាយកដ្ឋានមុខរបរ និងហត្ថពលកម្ម នៃក្រសួងការងារ និងបណ្ដុះបណ្ដាលវិជ្ជាជីវៈ។ នេះបើតាមសេចក្ដីជូនដំណឹងខាងលើនេះ៕
Tag:
ការងារ
កម្មសិក្សាការី
© រក្សាសិទ្ធិដោយ thmeythmey.com