លោក សុខ ឥសាន អះអាងថា គ្មានការចាប់ខ្លួនឯកឧត្តម កឹម សុខា ទេ បើចេញក្រៅទីស្នាក់ការ

ជាតិ

នយោបាយជាតិ

លោក សុខ ឥសាន អះអាងថា គ្មានការចាប់ខ្លួនឯកឧត្តម កឹម សុខា ទេ បើចេញក្រៅទីស្នាក់ការ

04, Sep 2016 , 10:00 pm

រូបភាព

ដោយ:

មន្ត្រីជាន់ខ្ពស់គណបក្សប្រជាជនកម្ពុជា បានអះអាងថា ប្រសិនបើឯកឧត្តម កឹម សុខា ចេញពីទីស្នាក់ការកណ្តាលគណបក្សសង្គ្រោះជាតិនោះ គ្មានសមត្ថកិច្ចណាចាប់ខ្លួននោះទេ។ តែមន្ត្រីជាន់ខ្ពស់គណបក្សសង្គ្រោះជាតិធ្លាប់បញ្ជាក់ថា ឯកឧត្តម កឹម សុខា បានសម្រេចចិត្តមិនឈានជើងដើរចេញពីគណបក្សឡើយ។

លោក សុខ ឥសាន ហ៊ានធានាថា គ្មានកងកម្លាំងសមត្ថកិច្ចចាប់ខ្លួនឡើយ ប្រសិនបើឯកឧត្តម កឹម សុខា ចេញពីទីស្នាក់ការកណ្តាលគណបក្សសង្គ្រោះជាតិនោះ។ ការអះអាងប្រាប់សារព័ត៌មានថ្មីៗរបស់អ្នកនាំពាក្យគណបក្សប្រជាជនកម្ពុជារូបនេះ ធ្វើឡើងបន្ទាប់ពីគណបក្សប្រឆាំងរិះគន់ថា ការប្រកួតប្រជែកសម្រាប់ការបោះឆ្នោតមិនស្មើភាពគ្នាទេ ដោយសារមេដឹកនាំកំពូលគណបក្សសង្គ្រោះជាតិទាំងពីរគឺឯកឧត្តម កឹម សុខា និងឯកឧត្តម សម រង្ស៊ី ត្រូវរដ្ឋាភិបាលប្រើប្រព័ន្ធតុលាការដើម្បីគាបសង្កត់លោកទាំងពីរ។

មុននិយាយករណីឯកឧត្តម សម រង្ស៊ី លោក ឥសាន និយាយពីករណីឯកឧត្តម កឹម សុខា ថា បើសមត្ថកិច្ចពិតជាមានចេតនាចង់ចាប់ខ្លួនឯកឧត្តម កឹម សុខា មែននោះ មិនពិបាកឡើយ ពោលគឺតែមួយនាទី គឺចាប់បាន។ « មិនចាំបាច់ធ្វើរបាំងដែកការពារទេ បើគេចង់ចាំតែមួយនាទីទេ។ តែគេមិនចាប់ឡើយ។ តុលាការគ្រាន់តែហៅទៅសួរតើ។ លោក កឹម សុខា ឃុំខ្លួនឯង ធ្វើបាបខ្លួនឯងទេ។ លោក កឹម សុខា អាចទៅចុះឈ្មះបោះឆ្នោតបានតើ តែគាត់មិនទៅ។ នេះរឿងខ្លួនឯងទេ»។ នេះជាការបញ្ជាក់របស់តំណាងរាស្ត្រវ័យ ៥០ ឆ្នាំ របស់គណបក្សប្រជាជនកម្ពុជាខាងលើ ហើយក៏បន្តលើកឡើងពីកររណីឯកឧត្តម សម រង្ស៊ី។

លោក ឥសាន បានហៅឯកឧត្តម សម រង្ស៊ី ថា ជា«អនុជន» ព្រោះលោកយល់ថា ឯកឧត្តម សម រង្ស៊ី គឺជាទណ្ឌិត ដោយមានសាលដីការស្ថាពររួចហើយ។ លោកថា ឯកឧត្តម សម រង្ស៊ី បាត់សិទ្ធិជាពលរដ្ឋ មិនអាចចុះឈ្មោះបោះឆ្នោត និងធ្វើនយោបាយទេ ដែលជាហេតុនៃការប្រកួតប្រជែងនយោបាយមិនស្មើគ្នា។ លោក បញ្ជាក់បែបនេះថា៖ «ពិតហើយ វាមិនអាចស្មើគ្នាទេ បើម្ខាងគណបក្សប្រជាជនមិនធ្វើខុសច្បាប់ តែម្ខាងទៀតធ្វើខុសច្បាប់ ត្រូវតែទួលខុសត្រូវចំពោះមុខច្បាប់។ តែមេបក្សដទៃមិនធ្វើខុសច្បាប់ គេប្រកួតប្រជែងធម្មតាតើ»។

មន្ត្រីជាន់ខ្ពស់គណបក្សសង្គ្រោះជាតិ លោក អេង ឆៃអ៊ាង ថ្លែងប្រាប់អ្នកគាំទ្រខ្លួននៅស្នាក់ការគណបក្សនៅថ្ងៃទី ៤ ខែកញ្ញា ថា រដ្ឋាភិបាលបច្ចុប្បន្នបានរំលោភលើស្មារតីនៃកិច្ចព្រមព្រៀងទីក្រុងប៉ារីស រដ្ឋធម្មនុញ្ញ និងគោលការណ៍លទ្ធិប្រជាធិបតេយ្យ។ ដោយសារបញ្ហានេះ នៅថ្ងៃទី ៥ ខែកញ្ញា ក្រុមសមជិកសភាគណបក្សសង្គ្រោះជាតិ នឹងដាក់ញត្តិទៅស្ថានទូតនៃប្រទេសហត្ថលេខី ដើម្បីដាក់សម្ពាធមកលើរដ្ឋបាលឲ្យគោរពកិច្ចព្រមព្រៀង និងធានាឲ្យការបោះឆ្នោតប្រព្រឹត្តទៅដោយសេរីត្រឹមត្រូវ និងយុត្តិធម៌ ជាពិសេសមេដឹកនាំទាំងពីររបស់គណបក្សសង្គ្រោះជាតិ អាចចូលរួមប្រកួតប្រជែងដោយស្មើភាពជាមួយបក្សកាន់អំណាច។

ករណីឯកឧត្តម កឹម សុខា កន្លងមកលោក អេង ឆៃអ៊ាង ធ្លាប់អះអាងប្រាប់សារព័ត៌មានថ្មីៗថា ឯកឧត្តម កឹម សុខា បានសម្រេចចិត្តមិនឈានជើងដើរចេញពីគណបក្សឡើយ។ លោក អេង ឆៃអ៊ាង បានបញ្ជាក់ថា ឯកឧត្តម កឹម សុខា បានប្ដេជ្ញាចិត្តរួចហើយ ថា លោកសុខចិត្តឃុំខ្លួននៅគណបក្ស ដើម្បីធ្វើកូដកម្មតស៊ូមតិប្រឆាំងនឹងសេចក្ដីសម្រេចរបស់តុលាការ ដែលរំលោភលើអភ័យឯកសិទ្ធិលោក និងតំណាងរាស្ត្រកន្លងមកនេះ។