ជាតិ
នយោបាយជាតិ
ទូតអាមេរិក ឲ្យប្រជាពលរដ្ឋខ្លួននៅកម្ពុជាប្រុងប្រយ័ត្នពីសុវត្ថិភាពផ្ទាល់ខ្លួន
× ស្ថានទូតអាមេរិកប្រចាំនៅរាជធានីភ្នំពេញ បានចេញសេចក្តីជូនដំណឹងឲ្យប្រជាពលរដ្ឋខ្លួនដែលកំពុងរស់នៅ និងកំពុងធ្វើដំណើរនៅក្នុងប្រទេសកម្ពុជាប្រុងប្រយ័ត្នចំពោះការតវ៉ានយោបាយដែលអាចកើតឡើងនៅថ្ងៃចន្ទទី ៥ ខែកញ្ញា។
សេចក្តីជូនដំណឹងរបស់ស្ថានទូតអាមេរិក បន្តថា គណបក្សសង្គ្រោះជាតិ បានប្រកាសគម្រោងតវ៉ានៅស្នាក់ការកណ្តាលគណបក្ស ក៏ដូចជាការតវ៉ានៅមុខបរិវេណតុលាការដំបូងរាជធានីភ្នំពេញតាមបណ្តោយផ្លូវព្រះមុន្នីរ៉េត។
តាមរយៈទំព័រហ្វេសប៊ុក ស្ថានទូតអាមេរិកប្រាប់ប្រជាពលរដ្ឋខ្លួនទៀតថា បើទោះបីជាការតវ៉ាដោយសន្តិវិធីក្តី តែការប្រឈមមុខដាក់គ្នា និងអំពើហិង្សាអាចនឹងកើតមានឡើង។
ដើម្បីសុវត្ថិភាព ទូតមហាអំណាចមួយនេះ ប្រាប់ឲ្យប្រជាពលរដ្ឋខ្លួនកុំឲ្យទៅកន្លែងបាតុកម្ម ឬកន្លែងជួបជុំទាំងនោះ និងត្រូវតាមដានសេចក្តីជូនដំណឹងរបស់ស្ថានទូតអាមេរិកប្រចាំនៅកម្ពុជាជាបន្តបន្ទាប់។
សូមបញ្ជាក់ថា នៅព្រឹកថ្ងៃចន្ទទី ៥ ខែកញ្ញា តំណាងរាស្ត្រគណបក្សសង្គ្រោះជាតិ មានគម្រោងយកញត្តិទៅដាក់នៅស្ថានទូតនៃប្រទេសមហាអំណាច ជាពិសេសប្រទេសដែលជាហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសថ្ងៃទី ២៣ ខែតុលា ឆ្នាំ ១៩៩១ ។ មន្ត្រីជាន់ខ្ពស់គណបក្សសង្គ្រោះជាតិ លោក អេង ឆៃអ៊ាង ថ្លែងប្រាប់អ្នកគាំទ្រខ្លួននៅស្នាក់ការគណបក្សនៅថ្ងៃទី ៤ ខែកញ្ញា ថា ខ្លឹមសារនៃញត្តិនោះ គណបក្សសង្គ្រោះជាតិចង់ប្រាប់ប្រទេសទាំងនោះថា រដ្ឋាភិបាលបច្ចុប្បន្នកំពុងរំលោភលើស្មារតីនៃកិច្ចព្រមព្រៀងទីក្រុងប៉ារីស រដ្ឋធម្មនុញ្ញ និងគោលការណ៍លទ្ធិប្រជាធិបតេយ្យ។ លោក អេង ឆៃអ៊ាង
បានអំពាវនាវឲ្យពលរដ្ឋមកជួបជុំគ្នានៅទីស្នាក់ការគណបក្សសង្គ្រោះជាតិ ឲ្យបានច្រើន ហើយនៅម៉ោង ១០ កន្លះ ព្រឹកថ្ងៃទី ៥ ខែកញ្ញា សមាជិកសភាគណបក្សសង្គ្រោះជាតិ នឹងយកញត្តិទៅដាក់នៅបណ្តាស្ថានទូតនៃប្រទេសហត្ថលេខីទាំងនោះ៕
© រក្សាសិទ្ធិដោយ thmeythmey.com