ជាតិ
នយោបាយជាតិ
កំពូល លើកពេលបើកសវនាការលើមន្ត្រីគជប និងអាដហុក ខណៈសាលាដំបូងកំពុងជំនុំជម្រះករណីលោក អ៊ុំ សំអាន
×
ភ្នំពេញ៖ នៅព្រឹកថ្ងៃទី០៥ កញ្ញានេះ តុលាការកំពូល បានសម្រេចលើកពេលបើកសវនាការលើសំណុំរឿងប្ដឹងសារទុក្ខ សុំនៅក្រៅឃុំរបស់មន្ត្រីអាដហុក និងមន្ត្រីគជប ក្រោមហេតុផលថា មេធាវីការពារក្ដីរបស់ជនជាប់ចោទដែលដាក់ពាក្យប្ដឹងសារទុក្ខនេះ មិនមានវត្តមានក្នុងសវនាការ។
បើតាមមេធាវីការពារមន្ត្រីអាដហុក លោក ឡោ ជុនធី មូលហេតុដែលតុលាការកំពូលមិនបើកសវនាការ ដោយសារតែលោក សំ សុខគង់ មេធាវីរបស់លោក នី ចរិយា ដែលបានដាក់ពាក្យប្ដឹងសារទុក្ខ ស្នើឲ្យកូនក្ដីខ្លូនសុំនៅក្រៅឃុំនោះ មិនមានវត្តមាននៅក្នុងសវនាការ ទើបបានជាតុលាការសម្រេចលើកពេលសវនាការ។ ប៉ុន្ដែតុលាការមិនបានបញ្ជាក់ពេលវេលាបើកសវនាការនៅពេលណាទេ។
សូមបញ្ជាក់ថា កាលពីថ្ងៃទី២ ខែឧសភា ឆ្នាំ២០១៦ លោក នី ចរិយា និងមន្ត្រីអាដហុកទាំង៤រូប គឺ លោក នី សុខា, លោក យី សុខសាន្ត, លោក ណៃ វង់ដា និងលោកស្រី លឹម មុន្នី ត្រូវបានតុលាការរាជធានីភ្នំពេញ សម្រេចបញ្ជូនខ្លួនទៅឃុំបណ្តោះអាសន្ន។ បើតាមការចោទប្រកាន់របស់តុលាការជាន់ទាប មន្ត្រីអាដហុកទាំង៤រូប រងបទចោទ «សូកប៉ាន់សាក្សី» ហើយលោក នី ចរិយា រងបទចោទ «សមគំនិតក្នុងរឿងសូកប៉ាន់សាក្សី»។
នៅព្រឹកនេះដែរ សាលាដំបូងរាជធានីភ្នំពេញក៏កំពុងបើកសវនាការជំនុំជម្រះករណីលោក អ៊ុំ សំអាន តំណាងរាស្ត្រគណបក្សសង្គ្រោះជាតិ ដែលលោក សំ សុខគង់ មេធាវីការពារក្ដីឲ្យលោក អ៊ុំ សំអាន កំពុងមានវត្តមាននៅក្នុងបន្ទប់សវនាការ។
សូមរម្លឹកថា តំណាងរាស្ត្រ ដែលរិះគន់រឿងព្រំដែនកម្ពុជា-វៀតណាម ដោយឥតសំចៃមាត់រូបនេះ ត្រូវបានសមត្ថកិច្ចឃាត់ខ្លួននៅខែមេសា ឆ្នាំ២០១៦ កន្លងទៅ។ បន្ទាប់មកតុលាការរាជធានីភ្នំពេញ ក៏សម្រេចបញ្ជូន លោក អ៊ុំ សំអាន ទៅឃុំខ្លួនបណ្តោះអាសន្ន ដោយចោទពី បទញុះញង់ឲ្យប្រព្រឹត្តបទឧក្រិដ្ឋជាអាទិ៍ និងញុះញង់ឲ្យមានការរើសអើង តាមមាត្រា ៤៩៥ និងមាត្រា ៤៩៦ នៃក្រមព្រហ្មទណ្ឌ ពាក់ព័ន្ធនឹងការបញ្ចេញទស្សនៈ ពីបញ្ហាព្រំដែន តាមហ្វេសប៊ុក កាលពីឆ្នាំ២០១៥។ លើសពីនេះទៀត សមាជិករដ្ឋសភា មកពីគណបក្សប្រជាជនកម្ពុជា ថែមទាំងបានបោះឆ្នោត គាំទ្រឲ្យតុលាការ និងសមត្ថកិច្ចបន្តអនុវត្តនីតិវិធី ចំពោះលោក អ៊ុំ សំអាន ទៀតផង៕
Tag:
អាដហុក
គជប
អ៊ុំ សំអាន
© រក្សាសិទ្ធិដោយ thmeythmey.com