ជាតិ
នយោបាយជាតិ
លោក អេង ឆៃអ៊ាង ចាត់ទុកការបិទផ្លូវរបស់អាជ្ញាធរជាការរំលោភលើសិទ្ធិធ្វើដំណើររបស់ពលរដ្ឋ
×
នៅព្រឹកនេះ អាជ្ញាធរ បានបិទផ្លូវជាតិលេខ ២ នៅក្បែរស្នាក់ការកណ្តាលគណបក្សសង្គ្រោះជាតិ។ លោក អេង ឆៃអ៊ាង បានសម្តែងការមិនពេញចិត្តចំពោះទង្វើរបស់អាជ្ញាធរ និងចាត់ទុកទង្វើនេះថា ជាការរំលោភលើសិទ្ធិដើរហើររបស់ប្រជាពលរដ្ឋ។
ការបិទផ្លូវរបស់អាជ្ញាធរ ធ្វើឡើងបន្ទាប់ពីគណបក្សសង្គ្រោះជាតិប្រកាសជួបជុំអ្នកគាំទ្រនៅទីស្នាក់ការកណ្តាលគណបក្ស និងគម្រោងឲ្យអ្នកតំណាងរាស្ត្រយកញត្តិទៅដាក់នៅស្ថានទូតនៃប្រទេសហត្ថលេខីនៃទីក្រុងប៉ារីស។ មន្ត្រីជាន់ខ្ពស់គណបក្សសង្គ្រោះជាតិ លោក អេង ឆៃអ៊ាង ចាត់ទុកការបិទផ្លូវនៅក្បែរស្នាក់ការគណបក្សសង្គ្រោះជាតិថា ធ្វើឡើងក្នុងគោលបំណងហាមមិនឲ្យគណបក្សសង្គ្រោះជាតិយកញត្តិទៅដាក់នៅបណ្តាស្ថានទូតនានា និងជាការរំលោភលើសិទ្ធិក្នុងការដើរហើររបស់ប្រជាពលរដ្ឋយ៉ាងធ្ងន់ធ្ងរ។
លោក ឆៃអ៊ាង បន្ថែមថា សិទ្ធិធ្វើដំណើររបស់ប្រជាពលរដ្ឋ គឺមានចែងនៅក្នុងរដ្ឋធម្មនុញ្ញរបស់កម្ពុជា។« បិទផ្លូវ ធ្វើប្រជាពលរដ្ឋខកទៅធ្វើការ។ សិស្សទៅរៀន មិនកើត។ អ្នកផ្សារទៅលក់ដូរមិនកើត។ នេះជាការរំលោភសិទ្ធិថ្មីមួយទៀត។ បើខ្លាចគណបក្សសង្គ្រោះជាតិហែញត្តិ យើងអាចនិយាយគ្នាបានតើថា តើត្រូវធ្វើទ្រង់ទ្រាយយ៉ាងណា ព្រោះយើងជាខ្មែរដូចគ្នា។ ញត្តិយើងគ្រាន់តែឲ្យតំណាងរាស្ត្រយើងដាក់ឡានទៅដាក់ក៏បានដែរ»។ លោក អេង ឆៃអ៊ាង និយាយដូច្នេះ តែលោកមិនទាន់អាចបញ្ជាក់ថា នៅម៉ោង ១០ កន្លះនេះ តំណាងរាស្ត្រគណបក្សសង្គ្រោះជាតិនឹងយកញត្តិទៅដាក់នៅបណ្តាស្ថានទូតនៃប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសនោះទេ ដោយលោក ឲ្យទៅសួរលោក សុន ឆ័យ ដែលជាអ្នកទទួលបន្ទុកផ្នែកញត្តិនេះ។ សារព័ត៌មានថ្មីៗ នៅមិនទាន់អាចទាក់ទងលោក សុន ឆ័យ បានទេនៅព្រឹកនេះ។
លោក ឃួង ស្រេង អ្នកនាំពាក្យសាលារាជធានីភ្នំពេញ បានអះអាងប្រាប់សារព័ត៌មានថ្មីៗថា ការបិទផ្លូវនេះ គឺដើម្បីការពារសន្តិសុខប្រជាពលរដ្ឋ។ លោកបបញ្ជាក់បន្តយ៉ាងនេះថា៖«ដ្បិតតែពួកគាត់ទៅធ្វើការយឺតមែន ប៉ុន្តែសុវត្ថិភាពរបស់គាត់ ត្រូវបានធានា»។
Tag:
អេង ឆៃអ៊ាង
ឃួង ស្រេង
© រក្សាសិទ្ធិដោយ thmeythmey.com