ជាតិ
នយោបាយជាតិ
×![]()
ដោយ: ថ្មីៗ
ដូចការគ្រោងទុកតំណាងរាស្ត្រគណបក្សសង្គ្រោះជាតិ បាននាំគ្នាដើរដាក់ញត្តិនៅតាមបណ្ដាស្ថានទូតមួយចំនួនប្រចាំប្រទេសកម្ពុជា ដើម្បីស្នើទៅប្រទេសមហាអំណាច និងប្រទេសជាហត្ថលេខីនៃកិច្ចព្រមព្រៀងទីក្រុងប៉ារីស ២៣ តុលា ឆ្នាំ១៩៩១ ឲ្យជួយការពារសិទ្ធិមនុស្សនិងការពារលិទ្ធិប្រជាធិបតេយ្យនៅកម្ពុជា។
តំណាងរាស្ត្រគណបក្សសង្គ្រោះជាតិ រួមមានលោកស្រី មួរ សុខហួរ លោក ហូ វ៉ាន់ និងលោក ឡុង ប៊ូតា ដែលបានដើរដាក់ញត្តិនៅតាមស្ថានទូត អូស្ត្រាលី រុស្ស៊ី បារាំង អង់គ្លេស អាមេរិក សិង្ហបុរី ជាដើម ។ បើតាមលោកស្រី មួ សុខហួរ ខាងមន្ត្រីតាមស្ថានទូតទាំងនោះបានចេញមកទទួលញត្តិនេះរួចរាល់ហើយ ។ ក្រុមតំណាងរាស្ត្រគណបក្សសង្គ្រោះជាតិ កំពុងដើរដាក់ញត្តិតាមបណ្ដាស្ថានទូតនានា តាមគម្រោងបន្តទៀត។
ការដាក់ញត្តិរបស់តំណាងរាស្ត្រទាំងនេះ ស្របពេលដែលអាជ្ញាធរកំពុងបិទកំណាត់ផ្លូវជាតិលេខ២ ជិតទីស្នាក់ការគណបក្សសង្គ្រោះជាតិ តាំងពីព្រឹកព្រលឹមថ្ងៃទី០៥ កញ្ញានេះ ដែលបានបង្កឲ្យមានការកកស្ទះចរាចរណ៍យ៉ាងខ្លាំងនៅចំណុចស្ពានអាកាសក្បាលថ្នល់ និងស្ពានព្រះមុនីវង្ស(ច្បារអំពៅ)។ ការបិទផ្លូវដោយគ្មានការជូនដំណឹងពីអាជ្ញាធររាជធានីភ្នំពេញនេះ គឺបន្ទាប់ពីគណបក្សសង្គ្រោះជាតិ បានប្រកាសដង្ហែញត្តិទៅដាក់នៅស្ថានទូតនៃប្រទេសមហាអំណាច ជាពិសេសប្រទេសដែលជាហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស។ តែមកដល់ម៉ោង១១ ព្រឹកនេះ អាជ្ញាធរបានបើកផ្លូវឲ្យពលរដ្ឋធ្វើដំណើរជាធម្មតាវិញហើយ។
លោក អេង ឆៃអ៊ាង ដែលបានថ្លែងប្រាប់អ្នកគាំទ្រខ្លួននៅស្នាក់ការគណបក្សនៅថ្ងៃទី ៤ ខែកញ្ញាថា ខ្លឹមសារនៃញត្តិនោះ គឺគណបក្សសង្គ្រោះជាតិចង់ប្រាប់ប្រទេសទាំងនោះថា រដ្ឋាភិបាលបច្ចុប្បន្នកំពុងរំលោភលើស្មារតីនៃកិច្ចព្រមព្រៀងទីក្រុងប៉ារីស រដ្ឋធម្មនុញ្ញ និងគោលការណ៍លទ្ធិប្រជាធិបតេយ្យ។ បើតាមលោក អេង ឆៃអ៊ាង គណបក្សសង្គ្រោះជាតិ ចង់ឲ្យប្រទេសទាំងនោះ ដាក់សម្ពាធមកលើរដ្ឋាភិបាលឲ្យគោរពកិច្ចព្រមព្រៀង និងធានាឲ្យការបោះឆ្នោតប្រព្រឹត្តទៅដោយសេរីត្រឹមត្រូវ និងយុត្តិធម៌ ជាពិសេសមេដឹកនាំទាំងពីររបស់គណបក្សសង្គ្រោះជាតិ អាចចូលរួមប្រកួតប្រជែងដោយស្មើភាពជាមួយបក្សកាន់អំណាច៕
Tag:
CNRP
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
4 ម៉ោង
