អន្តរជាតិ
កូរ៉េខាងត្បូងប្រាប់ចិនថា កម្មវិធីនុយក្លអ៊ែរកូរ៉េខាងជើងប៉ះពាល់ទំនាក់ទំនងប្រទេសទាំងពីរ ប្រធានាធិបតីចិន ស៊ី ជិនពីង ស្វាគមន៍ប្រធានាធិបតីកូរ៉េខាងត្បូង ប៉ាក ហ្គឺនហេ (Xinhua)
× នាពេលចុងក្រោយនេះ ទំនាក់ទំនងរវាងចិន និងកូរ៉េខាងត្បូង កំពុងរង្គោះរង្គើ លើការពង្រាយប្រព័ន្ធមីស៊ីលការពារអាកាស ដោយសារការសាកល្បងនុយក្លេអ៊ែរ និងការបាញ់មីស៊ីលជាបន្តបន្ទាប់ពីសំណាក់កូរ៉េខាងជើង។ ឆ្លៀតពេលជំនួបក្នុងក្រុងហាងចូវ ប្រធានាធិបតីកូរ៉េខាងត្បូង បាននិយាយដោយត្រង់ទៅកាន់សមភាគីចិនថា ទំនាក់ទំនងប្រទេសទាំងពីរធ្លាក់ចុះ ព្រោះតែកម្មវិធីនុយក្លេអ៊ែររបស់កូរ៉េខាងជើងទៅវិញទេ ហើយប្រមុខរដ្ឋចិន ក៏ប្រាប់វិញថា ចិន ប្រឆាំងដាច់ខាតនឹងការពង្រាយខែលការពារ THAAD។
ប្រធានាធិបតីចិន លោក ស៊ី ជិនពីង (Xi Jinping) បានជាមួយប្រធានាធិបតីកូរ៉េខាងត្បូង លោកស្រី ប៉ាក ហ្គឺនហេ (Park Geun-hye) នៅក្រៅជំនួបកំពូល G-20 នៅក្នុងហាងចូវ។ បញ្ហាល្អក់កករនៃទំនាក់ទំនងប្រទេសទាំងពីរ និងការពង្រាយប្រព័ន្ធការពារនៅកូរ៉េខាងត្បូង ត្រូវបានលើកមកពិភាក្សាក្នុងជំនួបកំពូលនេះ ហើយមេដឹកនាំប្រទេសទាំងពីរ ក៏បានបង្ហាញជំហរដាច់ខាតរៀងៗខ្លួនដែរ។
ក្នុងជំនួបនៅថ្ងៃទី៥ ខែកញ្ញា ប្រធានាធិបតីកូរ៉េខាងត្បូង និយាយថា ការសាកល្បងនុយក្លេអ៊ែរ និងការបាញ់មីស៊ីលរបស់កូរ៉េខាងជើង គឺជាគំរាមកំហែងដល់ទំនាក់ទំនងប្រទេសទាំងពីរ។ ហើយសកម្មភាពប្រហើនទាំងនេះ ក៏ជាបានប៉ះពាល់សន្តិសុខ និងស្ថិរភាពក្នុងឧបទ្វីបកូរ៉េ និងតំបន់អាស៊ីបូព៌ាផងដែរ។
រដ្ឋកុម្មុយនីស្តកូរ៉េខាងជើង តែងតែធ្វើសកម្មភាពផ្គើននឹងការសម្រេចរបស់ក្រុមប្រឹក្សាសន្តិសុខម្ដងហើយម្ដងទៀត។ កូរ៉េខាងជើង បានសាកល្បងគ្រាប់នុយក្លេអ៊ែរផង បាញ់មីស៊ីលបាលីស្ទិកផង ដោយមិនខ្វល់ពីការគំរាមរបស់អន្តរជាតិឡើយ។ ដោយសារតែបញ្ហានេះ ទើបអាមេរិក និងកូរ៉េខាងត្បូង ឯកភាពគ្នាពង្រាយខែលការពារមីស៊ីល (THAAD) ដែលរឿងនេះ ធ្វើឲ្យចិនក្ដៅចិត្តខ្លាំង និងទាមទារឲ្យលុបចោលគម្រោងនេះ។
នៅជំនួបក្នុងក្រុងហាងចូវ ប្រធានាធិបតីចិន ស៊ី ជិនពីង ក៏បានប្រាប់ដោយផ្ទាល់ទៅលោកស្រីប្រធានាធិបតីកូរ៉េខាងត្បូង ថា ខ្លួនប្រឆាំងដាច់ខាតការពង្រាយខែលការពារនៅកូរ៉េខាងត្បូង។ យោងតាមទីភ្នាក់ងារព័ត៌មានរដ្ឋ Xinhua ប្រមុខរដ្ឋចិនបានបន្តថា ដំណោះស្រាយបញ្ហាដោយមិនសមស្រប នឹងមិនអាចជួយអ្វីដល់ស្ថិរភាពតំបន់ឡើយ ហើយថែមទាំងធ្វើឲ្យស្ថានការណ៍កាន់តែតានតឹងផង ហើយចិននៅតែប្ដេជ្ញាចិត្ត ក្នុងការធ្វើឲ្យឧបទ្វីបកូរ៉េ ជាតំបន់គ្មាននុយក្លេអ៊ែរផងដែរ។
កន្លងមក ក្រុងប៉េកាំង តែងបារម្ភចំពោះការដាក់តាំងប្រព័ន្ធការពារមីស៊ីលនេះ ដោយចាត់ទុកជាការគំរាមកំហែងមកលើសន្តិសុខខ្លួន បើទោះជាក្រុងសេអ៊ូល និងក្រុងវ៉ាស៊ីនតោនអះអាងថា ខែលការពារនេះសំដៅលើកូរ៉េខាងជើងក៏ដោយចុះ។ ក្រៅពីនេះ ចិន ក៏មិនទុកចិត្តសម្ព័ន្ធមិត្តអាមេរិក និងកូរ៉េខាងត្បូងដែរ ព្រោះប្រព័ន្ធការពារមីស៊ីលនេះ ក៏អាចតាមដានការចល័តកងកម្លាំងយោធាចិនថែមទៀតផង។
ទីភ្នាក់ងារព័ត៌មាន Yonhap ផ្សាយថា បន្ទាប់ពីជំនួបរវាងលោក ស៊ី ជិនពីង និងលោកស្រី ប៉ាក ហ្គឺនហេ បញ្ចប់ទៅ កូរ៉េខាងជើងឯណោះ ក៏បានបាញ់មីស៊ីលចំនួនបីគ្រាប់ចេញពីភាគខាងកើត។ គេមិនទាន់ដឹងពីប្រភេទនៃមីស៊ីលដែលបានបាញ់ឡើយ ប៉ុន្តែនេះគឺច្បាស់ណាស់ថា កូរ៉េខាងជើង មិនសប្បាយចិត្តនឹងជំនួបរវាងប្រមុខរដ្ឋចិន និងកូរ៉េខាងត្បូង ដែលលើកយកបញ្ហាកូរ៉េខាងជើងមកជជែកគ្នានោះ៕
Tag:
ចិន
កូរ៉េខាងត្បូង
កូរ៉េខាងជើង
© រក្សាសិទ្ធិដោយ thmeythmey.com