ពីនេះ ពីនោះ
យុវជនគិតចង់ធ្វើធំ តែគ្មានសមត្ថភាព ប្រយ័ត្នមានបញ្ហាផ្នែកគំនិត
× ភ្នំពេញ៖ ខួរក្បាលរបស់មនុស្សម្នាក់ៗមានទំហំ និងទម្ងន់លើសខ្វះគ្នា បន្តិចបន្ទួចតែប៉ុណ្ណោះ។ ប៉ុន្តែមនុស្សមានសិទ្ធិផ្ទាល់ខ្លួនក្នុងការប្រើខួរក្បាល គិតពិចារណា ដើម្បីរៀបចំគោលដៅជីវិតខ្លួនឯង។ តែក៏មិនអាចបណ្ដោយឲ្យក្បាលចេះតែគិត ប៉ុន្តែមិនធ្វើសកម្មភាព ហើយរឹតតែមិនអាចទៀត គឺធ្វើសកម្មភាពដោយមិនបានគិតពិចារណា។
យុវជនមួយចំនួនបច្ចុប្បន្ន មិនសូវចេះ តែចង់ធ្វើធំ សួរថាតើអាចទៅដឹកនាំអ្នកផ្សេងបានដោយរបៀបណា? ចំណែកសុភាសិតខ្មែរលោកក៏បានលើឡើងថា «បើខ្លួនល្ងង់កុំធ្វើចេះ បើខ្លួនគ្មានចំណេះកុំចង់ធ្វើធំ» នោះគឺមិនមែនជារឿងគ្មានមូលដ្ឋានគិតនោះឡើយ។ ចាស់បុរាណលោកមានការគិតពិចារណា និងឲ្យតម្លៃខ្ពស់ចំពោះសមត្ថភាពរបស់អ្នកដឹកនាំ។ ហើយក៏មិនមែនការយក ចំណេះ មកប្រើដើម្បីប្រកួតប្រជែងយកឋានៈ បុណ្យស័ក្តិ ឬលាភសក្ការនោះដែរ។
ហេតុនេះ គ្រប់យ៉ាងស្ទើរតែជារឿងដែលសាមញ្ញ ទៅហើយដែលយុវជនត្រូវដឹងថា តំណែង តួនាទី កាន់តែធំ ភាពទទួលខុសត្រូវកាន់តែខ្ពស់ សមត្ថភាពក៏ពង្រីកឲ្យកាន់តែខ្លាំង និងទូលាយ ទើបអាចធ្វើឲ្យការងារមានប្រសិទ្ធភាព។ មិនមែនងាយស្រួលដូចការគិតនោះទេ។ ដូច្នេះ កុំព្យាយាមអង្គុយស្រមៃថាខ្លួនបានធ្វើធំ ទាំងមិនបានគិតគូរពង្រឹងសមត្ថភាពខ្លួនឯង ព្រោះនៅពេលចេះតែគិត តែលទ្ធផលមិនបានសម្រេច នោះអាចឈានទៅរកការមានបញ្ហាខួរក្បាល។
© រក្សាសិទ្ធិដោយ thmeythmey.com