ជាតិ
សេដ្ឋកិច្ច
សហជីពដាក់សំណើរប្រាក់ខែគោល ១៧៩ដុល្លារសម្រាប់កម្មករកាត់ដេរ
× នៅថ្ងៃទី២ខែកញ្ញា ភាគីសហជីព បានដាក់សំណើរទាមទារប្រាក់ខែគោលចំនួន ១៧៩,៦ ដុល្លារអាមេរិកដល់កម្មករនិយោជិតក្នុងឧស្សាហកម្មកាត់ដេរសម្លៀកបំពាក់ និងស្បែកជើង សម្រាប់ឆ្នាំ២០១៧ ខាងមុខនេះ។
លោក អាត់ ធន់ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា(CCAWDU) មានប្រសាសន៍ថា តួលេខប្រាក់ខែគោលកម្មករសម្រាប់ឆ្នាំថ្មីនេះបានពីការស្រាវជ្រាវរបស់សហជីព ជាមួយនឹងរបាយការណ៍ពីវិទ្យាស្ថានជាតិស្ថិតិ(NIS) និងមជ្ឈមណ្ឌលសិក្សាគោលនយោបាយ(CPS)ដោយផ្អែកលើស្ថានភាពសេដ្ឋកិច្ច និងសង្គម។
លោក អាត់ ធន់ ថ្លែងប្រាប់សារព័ត៌មានថ្មីៗនៅថ្ងៃទី៥ខែកញ្ញានេះថា សហជីព មិនប្រាកដពីការសម្រេចចុងក្រោយរបស់រដ្ឋាភិបាលទៅលើតួលេខ ដែលបានដាក់ស្នើនេះទេ។«តួលេខដែលយើងដាក់នេះទាបហើយ តែរឿងលទ្ធភាពរដ្ឋាភិបាល ឬក្រុមហ៊ុន អោយប៉ុន្មាន គឺអាស្រ័យការចរចា»។ នេះជាការបញ្ជាក់របស់លោក អាត់ ធន់ ។
ការប្រជុំត្រីភាគី រវាងសហជីព និយោជក និងរដ្ឋាភិបាលអំពីប្រាក់ឈ្នួលគោល នឹងត្រូវរៀបចំឡើងនៅថ្ងៃទី៩ និងទី២៦ខែកញ្ញា។
គួរបញ្ជាក់ថា នៅឆ្នាំ២០១៦នេះ កម្មករនិយោជិតទទួលបានប្រាក់ឈ្នួលគោលចំនួន ១៤០ដុល្លារ ៕
Tag:
ប្រាក់ខែគោល
កាត់ដេរ
© រក្សាសិទ្ធិដោយ thmeythmey.com