ពីនេះ ពីនោះ
កុំចូលចិត្តគិតអវិជ្ជមាន ព្រោះវានាំឲ្យខួរក្បាលផ្ទុកដោយគំនិតអាក្រក់ នាំសង្គមជួបបញ្ហា
× ភ្នំពេញ៖ គិតក្នុងផ្លូវអវិជ្ជមាន មើលអ្នកដទៃក្នុងផ្លូវអវិជ្ជមាន រិះគន់អ្នកដទៃក្នុងផ្លូវអវិជ្ជមាន ដោយខ្វះមូលដ្ឋានហេតុផល គឺជាកំហុសរបស់មនុស្សម្នាក់ៗ ដែលមិនបានផ្ដល់ផលចំណេញអ្វីទាំងអស់។ មនុស្សដែលចូលចិត្តគិតតែចំណុចអវិជ្ជមាន មិនត្រឹមតែធ្វើឲ្យអ្នកផ្សេងមិនស្រឡាញ់ចូលចិត្តប៉ុណ្ណោះទេ អាចនាំឲ្យជាតិមានបញ្ហា បុគ្គលខ្លួនឯងក៏ប្រឈមជាមួយបញ្ហាផ្នែកគំនិត។
ក្នុងដំណើរជីវិត របស់មនុស្សម្នាក់ៗអ្នកណាក៏មានរឿងល្អ និងអាក្រក់ចំពោះខ្លួនឯង។ រឿងរ៉ាវនៅក្នុងសង្គម តែងតែមានរូបភាពល្អ និងអាក្រក់ដែលកើតមាន។ នៅក្នុងការគ្រប់គ្រងដឹកនាំសង្គម តែងតែភ័យខ្លាចបញ្ហាអាក្រក់កើតឡើង ហើយសប្បាយចិត្តជាមួយរឿងល្អដែលកើតមាន។ ប៉ុន្តែភ្នាក់ងារគិតគឺមនុស្ស អ្នកមានការព្រួយបារម្ភគឺមនុស្ស អ្នកភ័យខ្លាចគឺមនុស្ស អ្នកវិនាសក៏ចាប់ពីមនុស្ស។
តាមការពិតទៅ មានរឿងច្រើនដែលមនុស្ស ទាំងយុវជន ក៏ដូចជាយុវចាស់ ត្រូវផ្ដើមកែប្រែខ្លួនឯងឡើងវិញ ក្នុងការប្រើប្រាស់ខួរក្បាល ដើម្បីគិតលើបញ្ហាអ្វីមួយដោយកុំព្យាយាមចាប់យកតែផ្លូវអវិជ្ជមានជាមុន ហើយបោះចោលគំនិតត្រជាក់ផ្នែកវិជ្ជមាន។
ឧទាហរណ៍៖ ជាបុគ្គលនៅពេលមានអារម្មណ៍ថាខ្លួនដុនដាប ជីវិតកើតមកនឿយហត់ លំបាក ឈឺចាប់ គួរកុំចាត់ទុកថាវាជាវាសនាអាក្រក់សម្រាប់ជីវិតខ្លួនឯង។ ព្រោះរឿងគ្រប់យ៉ាងមនុស្សជាអ្នកច្នៃ និងកែប្រែ ហើយលិទ្ធផលទៅជាយ៉ាងណា គឺស្ថិតទៅលើសកម្មភាពនៃទង្វើ។ នៅពេល ដែលអ្នកចង់ធ្វើអ្វីមួយ កុំរារែក ត្រូវគិតក្នុងផ្លូវវិជ្ជមានជានិច្ច។ កុំព្យាយាមមើលអ្នកដទៃ តែផ្លូវអាក្រក់, កុំច្រណែននឹងភាពជោគជ័យរបស់អ្នកដទៃ, កុំដេកចាំភ័ព្វសំណាង ព្រោះទង្វើនៃការគិតទាំងនេះ វានាំឲ្យគំនិតច្របូកច្របល់ ព្រោះគិតសុទ្ធតែផ្លូវអវិជ្ជមាន គ្មានបានការ និងមិនអាចកើតមាន ដែលរឹតតែធ្វើបាបផ្លូវចិត្តខ្លួនឯង។
ខាងលើនេះ និយាយពីបុគ្គល ប៉ុន្តែចុះបើនិយាយពីអ្នកគ្រប់គ្រង អ្នកដឹកនាំ វិញ តើនឹងមានអ្វីកើតឡើងចំពោះ បុគ្គល និងសង្គមជាតិទាំងមូល? ការគិតអវិជ្ជមានទាំងអស់ បាននាំឲ្យបុគ្គលចេះតែភ័យខ្លាច ហើយឆ្លើយតបជាមួយរឿងរ៉ាវមួយចំនួន គឺតែងតែផ្ដើមជាមួយរឿងអវិជ្ជមានដូចគ្នា។ ការគិតអវិជ្ជមាននេះ បើគិតតែខ្លួនឯង ហើយប៉ះពាល់តែខ្លួនឯង នោះវាជាលទ្ធផលរបស់បុគ្គល។ ប៉ុន្តែខ្លួនឯងអ្នកគិតប៉ុន្តែនាំគ្រួសារ នាំសង្គម នាំប្រជាជន ឲ្យមានបញ្ហាទៅតាមទំហំនៃគិត និងសម្រេចចិត្តរបស់ខ្លួនទៅវិញ។ នេះជាកំហុសដ៏ធ្ងន់ធ្ងររបស់មនុស្ស។ កុំធ្វើជាមនុស្សដែលមើល ឃើញបញ្ហាគ្រប់ឱកាស ប៉ុន្តែត្រូវធ្វើជាមនុស្សដែលមើលឃើញឱកាសគ្រប់បញ្ហា៕
© រក្សាសិទ្ធិដោយ thmeythmey.com