ទោះមិនទាន់ប្រកួតក៏ដោយ តែ វ៉ាន់ វ៉ុន រីករាយដែលបានហ្វឹកហាត់ជាមួយកីឡាករល្បីៗនៅប្រេស៊ីល

កីឡាជាតិ

ជាតិ

ទោះមិនទាន់ប្រកួតក៏ដោយ តែ វ៉ាន់ វ៉ុន រីករាយដែលបានហ្វឹកហាត់ជាមួយកីឡាករល្បីៗនៅប្រេស៊ីល

07, Sep 2016 , 2:51 pm

រូបភាព

រូបភាពពី៖ ហ្វេសប៊ុក Npc Cambodia

ដោយ:

កីឡាករ វ៉ាន់ វ៉ុន បេក្ខភាពប៉ារ៉ាឡាំពិកតំណាងកម្ពុជាក្នុងព្រឹត្តិការណ៍កីឡាប៉ារ៉ាឡាំពិកនៅទីក្រុង Rio ប្រទេសប្រេស៊ីល កាលពីម្សិលមិញបានចាប់ផ្តើមហ្វឹកហាត់កំដៅសាច់ដុំ ក៏ដូចជាពង្រឹងបច្ចេកទេស និងសមត្ថភាពរបស់ខ្លួនហើយ។ សម្រាប់ការហ្វឹកហាត់នៅប្រទេសប្រេស៊ីលលើកដំបូងនេះ វ៉ាន់ វ៉ុន ចាត់ទុកថា វាមានការខុសប្លែកពីការហ្វឹកហាត់នៅកម្ពុជា។

ដោយសារមានការចូលរួមហ្វឹកហាត់រួមគ្នាពីសំណាក់កីឡាករប៉ារ៉ាឡាំពិកមកពីបណ្តាប្រទេសជាច្រើននៅលើពិភពលោក បានធ្វើឲ្យកីឡាករប៉ារ៉ាឡាពិកកម្ពុជា វ៉ាន់ វ៉ុន សម្តែងអារម្មណ៍សប្បាយរីករាយ និងយល់ឃើញថា មានការខុសប្លែកពីការហ្វឹកហាត់របស់ខ្លួននៅកម្ពុជា ដែលមានតែកីឡាករកម្ពុជាដូចគ្នាចូលរួម។

កីឡាករ វ៉ាន់ វ៉ុន ដែលបានចាប់ផ្តើមហ្វឹកហាត់កំដៅសាច់ដុំនៅប្រទេសប្រេស៊ីលកាលពីម្សិលមិញបានបញ្ជាក់ដូច្នេះថា៖«ខ្ញុំសប្បាយចិត្តយ៉ាងខ្លាំង ព្រោះកាលនៅប្រទេសកម្ពុជា ខ្ញុំមានកីឡាករចូលរួមហ្វឹកហាត់តែ៤ទៅ៥នាក់តែប៉ុណ្ណោះ ណាមួយសុទ្ធតែជាកីឡាករកម្ពុជាដូចគ្នា។ ប៉ុន្តែការហ្វឹកហាត់នៅប្រទេសប្រេស៊ីលនេះគឺខុសគ្នា ដោយសារ ខ្ញុំបានជួបសុទ្ធតែកីឡាករពិភពលោកល្បីៗ»។

ទោះបីវាជាការហ្វឹកហាត់លើកដំបូងនិងមានរយៈពេលខ្លីក៏ដោយ ប៉ុន្តែវាជាការហ្វឹកហាត់មួយដ៏សំខាន់សម្រាប់កីឡាករប៉ារ៉ាឡាំពិកកម្ពុជាក្នុងដកស្រង់បច្ចេកទេស និងបទពិសោធន៍ពីកីឡាករកម្រិតពិភពលោកទាំងនោះ ដើម្បីយកមកអភិវឌ្ឍន៍សមត្ថភាពរបស់ខ្លួនឲ្យកាន់តែរីកចម្រើន និងចែករំលែកទៅកាន់កីឡាករកម្ពុជាដទៃទៀត។

ធ្លាប់តែឃើញតាមរយៈកញ្ចក់ទូរទស្សន៍ និងហ្វេកប៊ុកពីសមត្ថភាពគូប្រកួតរបស់ខ្លួន តែសម្រាប់ការហ្វឹកហាត់កំដៅសាច់ដុំ និងពង្រឹងសមត្ថភាពត្រៀមនៅប្រទេសប្រេស៊ីលកាលពីម្សិលមិញ បានធ្វើឲ្យកីឡាករ វ៉ាន់ វ៉ុន ឃើញពីសមត្ថភាព ក៏ដូចជាបច្ចេកទេសគូប្រកួតរបស់ខ្លួនផ្ទាល់ភ្នែក។

គួរបញ្ជាក់ថា សម្រាប់ព្រឹត្តិការណ៍កីឡាប៉ារ៉ាឡាំពិកនៅទីក្រុង Rio ប្រទេសប្រេស៊ីល បេក្ខភាពកីឡាប៉ារ៉ាឡាំពិកកម្ពុជា វ៉ាន់ វ៉ុន នឹងប្រកួតលើវិញ្ញា១០០ម៉ែត្រក្នុងកម្រិតពិការ T54។ ការប្រកួតនេះនឹងចាប់ផ្តើមពីថ្ងៃទី៧ ខែកញ្ញា នេះ រហូតដល់ថ្ងៃទី១៨ ខែកញ្ញា។ ប៉ុន្តែកីឡាករ វ៉ាន់ វ៉ុន មិនទាន់ដឹងថាត្រូវប្រកួតនៅថ្ងៃណានៅឡើយទេ៕