ពីនេះ ពីនោះ
បញ្ហាកើតឡើង៖ ពលរដ្ឋជួយអ្នកជំនាញ ឬអ្នកជំនាញត្រូវបានពលរដ្ឋរំខានការងារ? រូបភាពពលរដ្ឋចោមរោមមើលកន្លែងគប់គ្រាប់បែកនៅបឹងកេងកង៣ យប់ថ្ងៃទី៦ ខែកញ្ញាឆ្នាំ២០១៦
× ភ្នំពេញ៖ បញ្ហាគ្រោះថ្នាក់ចរាចរណ៍, បញ្ហាអគ្គីភ័យ, រឿងឃាតកម្ម ឬបញ្ហាអ្វីមួយកើតឡើង ហើយប្រជាពលរដ្ឋនាំគ្នាចោមរោមដើម្បីមើលព្រឹត្តិការណ៍ទាំងនោះ ក្នុងគោលបំណងតាមមើលរឿងរ៉ាវ។ ប៉ុន្តែសួរថា រូបភាពបែបនេះបង្ហាញថា ពលរដ្ឋជួយអ្នកជំនាញ ឬអ្នកជំនាញត្រូវបានពលរដ្ឋរំខានការងារ?
នៅពេលដែលឃើញមានបញ្ហានានាបានកើតឡើង ដូចជាបញ្ហាគ្រោះថ្នាក់ចរាចរណ៍ បញ្ហាឃាតកម្ម បញ្ហាអគ្គីភ័យ និងបញ្ហាដែលកើតមានជាច្រើនផ្សេងៗទៀត ត្រូវបានគេសង្កេតឃើញថា មានការចោមរោមតាមមើលហេតុការណ៍ ពីប្រជាពលរដ្ឋយ៉ាងសកម្ម។ ការបង្ហាញវត្តមានរបស់ប្រជាពលរដ្ឋនៅកន្លែងកើតហេតុនេះ គឺបានផ្ដល់ប្រយោជន៍យ៉ាងសំខាន់ ព្រោះពួកគាត់អាចក្លាយជាភស្ដុតាងរស់ និងជាតម្រុយសម្រាប់អ្នកជំនាញធ្វើការសិក្សាស្រាវជ្រាវ។
ចំណែកមួយផ្នែកទៀត អាចនិយាយបានថា ពលរដ្ឋលោកបានតាមដានចំណាត់ការរបស់មន្ត្រីជំនាញ ឬអ្នកមានសមត្ថកិច្ចលើកកិច្ចការទាំងនោះ ដោយផ្ទាល់ ហើយជាអ្នកតាមដានមើលពីសមត្ថភាពរបស់មន្ត្រីជំនាញ ថាអាចមានចំណាត់ការល្អបែបណា ដើម្បីដោះស្រាយរឿងរ៉ាវដែលបានកើតឡើង ឲ្យមានប្រសិទ្ធភាព នឹងជឿទុកចិត្តបាន។
ប៉ុន្តែ មានសំណួរមួយចំនួនសួរថា នៅពេលដែលមានបញ្ហាមួយកើតឡើង ហើយពលរដ្ឋសម្រុកនាំគ្នាទៅហ៊ុំព័ទ្ធកន្លែងកើតហេតុ តើពួកគាត់អាចទទួលបានព័ត៌មានពិតទេ? បើបញ្ហាកើតឡើងភ្លាម ពលរដ្ឋនាំគ្នាចូលទៅ តើអ្នកបង្កអាចនឹងត្រលប់មកធ្វើម្ដងទៀតទេ? តើពលរដ្ឋ មានជំនាញក្នុងការតាមដានរឿងទេ? ឬមួយនាំគ្នា ទៅចោមរោមដែលនាំឲ្យពិបាកការពារ និងរៀបចំសណ្ដាប់ធ្នាប់? បើមនុស្សណែនកន្លែងកើតហេតុ តើមន្ត្រីជំនាញធ្វើការដោយវិធីណា? បើមន្ត្រីជំនាញពិបាកធ្វើការ ហើយប្រើពាក្យមិនពិរោះស្ដាប់ តើអាចនាំឲ្យមានបញ្ហាមួយជាន់បន្ថែមទៀតទេ? បើមនុស្សកាន់តែច្រើន តើអ្នកណាដែលពិបាកធ្វើការងារជាងគេ? បើមានបញ្ហាបន្ទាប់ តើអ្នកណាជាអ្នកចូលរួមខុស?
សំណួរទាំងនេះ គឺសុទ្ធតែឆ្លើយតបទៅលើឥរិយាបថមួយចំនួនរបស់ពលរដ្ឋ ឲ្យលោកពិចារណា ថាគួរនៅកន្លែងណា នៅពេលមានបញ្ហាអ្វីមួយកើតឡើង? ព្រោះថា ក្នុងរូបភាពជាក់ស្ដែង នៅពេលមានអគ្គីសភ័យកើតឡើង ពលរដ្ឋតែងនាំគ្នានៅជុំ ជួនកាលរកតែផ្លូវសម្រាប់ឡានពន្លត់អគ្គីសភ័យចូលក៏មិនបាន។ បើបែបនេះគួរបន្ទោសអ្នកណា?
នៅពេលមានគ្រោះថ្នាក់ចររាចរណ៍កើតឡើងម្ដងៗ ពលរដ្ឋនាំគ្នាឈប់យានយន្ត ឈប់ម៉ូតូ នាំគ្នាឈរមើលពេញកន្លែងកើតហេតុ បង្កឲ្យកកស្ទះ ចំណែកអ្នកជំនាញក៏មិនអាចធ្វើការបានស្រួល។ តើគួរបន្ទោសអ្នកណា?
ជាកស្ដែងដូចករណីថ្មីៗនេះ មានការគប់គ្រាប់បែកនៅយប់ថ្ងៃទី៦ ខែកញ្ញា នៅបឹងកេងកង៣នេះ ពលរដ្ឋនាំគ្នាទៅមើលកន្លែងកើតហេតុជាច្រើនរយនាក់។ ប៉ុន្តែតើមានបានគិតទេថា បើសិនជាអ្នកបង្កហេតុមកបន្តសកម្មភាពគេវិញ តើនឹងមានមនុស្សប៉ុន្មានអ្នកជួបបញ្ហាមិនល្អចំពោះជីវិត?
ជាការពិត ពេលមានហេតុការណ៍អ្វីមួយកើតឡើង ហើយពលរដ្ឋចង់ដឹងរឿងរ៉ាវ គឺមិនមែនជារឿងដែលខុសនោះទេ។ ប៉ុន្តែពេលខ្លះ វាក្លាយជាចំណុចអវិជ្ជមានមួយចំពោះមន្ត្រីជំនាញ ដើម្បីធ្វើកិច្ចការទៅវិញក៏ថាបាន។
វាជារឿងទូទៅហើយ ដែលគេនិយាយថា ទាំងអាជ្ញាធរ អ្នកជំនាញ និងប្រជាពលរដ្ឋត្រូវសហការគ្នា ដើម្បីដោះស្រាយ ប៉ុន្តែមិនអាចបណ្ដោយឲ្យរឿង កើតមានពីមួយរឿង ទៅពីររឿងបានទេ។ ក្នុងន័យនេះ គឺមានន័យថា ពលរដ្ឋត្រូវសម្រួលឲ្យមន្ត្រីជំនាញអនុវត្តការងារ ចំណែកមន្ត្រីជំនាញត្រូវចេះរៀបចំពលរដ្ឋឲ្យទៅកន្លែងសុវត្ថិភាព ការពារបញ្ហាបន្តមានដែលមិនអាចស្មានដឹង។
ត្រង់ចំណុចទាំងនេះហើយ ដែលពលរដ្ឋគ្រប់រូប ពេលខ្លះត្រូវតែគិតផងដែរ ពីសុវត្ថិភាពផ្ទាល់ខ្លួន។ ចំណែក ការទៅចោមរោមកន្លែងកើតហេតុ តើអាចផ្ដល់ផលចំណេញ ឬរឹតតែក្លាយជាបន្ទុកសម្រាប់អ្នកជំនាញ និងអ្នកការពារសណ្ដាប់ធ្នាប់? ចំណែកអាជ្ញាធរ អ្នកជំនាញក៏ត្រូវសិក្សាផងដែរ ពីហេតុការណ៍ដែលនឹងអាចកើតមានបន្ទាប់ ព្រោះពេលខ្លះអាចថាពលរដ្ឋមិនបានគិតដល់ ប៉ុន្តែអ្នកជំនាញគឺចាំបាច់ណាស់គិតឲ្យលឿនចំពោះបញ្ហាបែបនេះ៕
© រក្សាសិទ្ធិដោយ thmeythmey.com