កីឡាជាតិ
ជាតិ
កីឡាករ វ៉ា់ន់ វ៉ុន រំពឹងកើនឡើងកម្រិតបច្ចេកទេសក្រោយដកពិសោធន៍ពីកីឡាករល្បីៗលំដាប់ពិភពលោក
×
សម្រាប់ការចូលរួមប្រកួតក្នុងព្រឹត្តិការណ៍កីឡាប៉ារ៉ាឡាំពិកនៅទីក្រុង Rio ប្រទេសប្រេស៊ីល កីឡាករប៉ារ៉ាឡាំពិកកម្ពុជា វ៉ាន់ វ៉ុន មានកី្តរំពឹងថា ក្រោយការចូលរួម និងការហ្វឹកហាត់ដោយដកស្រង់បទពិសោធន៍ពីកីឡាជើងខ្លាំងលំដាប់ពិភពលោក កម្រិតបច្ចេកទេសរបស់ខ្លួននឹងមានការកើនឡើងកាន់តែខ្លាំងថែមទៀត។
អត្ថពលិកប៉ារ៉ាឡាំពិកកម្ពុជា វ៉ាន់ វ៉ុន ទោះបីវាជាការបង្ហាញវត្តមានលើកដំបូងរបស់ខ្លួនក្នុងព្រឹត្តិការណ៍កីឡាប៉ារ៉ាឡាំពិកនៅ Rio ប្រទេសប្រេស៊ីលក៏ដោយ។ ប៉ុន្តែកីឡាកររូបនេះមានក្តីសង្ឃឹមជឿជាក់យ៉ាងមុតមាំថា តាមរយៈការសិក្សា និងក៏ដូចជាដកស្រង់បច្ចេកទេសពីកីឡាករជើងខ្លាំងលំដាប់ពិភពលោក រូបគេនឹងទទួលបានបច្ចេកទេស និងបទពិសោធន៍ល្អៗ ដើម្បីអភិវឌ្ឍន៍សមត្ថភាពឲ្យកាន់តែរីកចម្រើន។
បេក្ខភាពប៉ារ៉ាឡាំពិកតំណាងកម្ពុជារូបនេះបានបញ្ជាក់ថា៖«នេះជាបទពិសោធន៍លើកទី១ ព្រោះនាពេលកន្លងខ្ញុំមិនដែលបានចូលរួមព្រឹត្តិការណ៍លំដាប់ពិភពលោកនេះទេ ហើយក៏មិនដែលបានជួបកីឡាករខ្លាំងៗដែរ។ ប៉ុន្តែខ្ញុំសង្ឃឹមថា ក្នុងរយៈពេលហ្វឹកហាត់ និងប្រកួតនៅប្រទេសប្រេស៊ីលនេះ កម្រិតបច្ចេកទេសរបស់ខ្ញុំនឹងកើនឡើងជាងនៅកម្ពុជា ដោយសារខ្ញុំបានដកស្រង់បច្ចេកទេសពីឡាករខ្លាំងៗលំដាប់ពិភពលោក»។
ទោះបីជាយ៉ាងនេះក្តីកីឡាករកម្ពុជារូបនេះមិនហ៊ានរំពឹងក្នុងការឈានដល់ដណ្តើមបានមេដាយពីព្រឹត្តិការណ៍នេះឡើយ ដោយសាររូបគេយល់ថា សមត្ថភាពនៅមានកម្រិតទាបបើប្រៀបធៀបទៅនឹងសមត្ថភាពកីឡាករជើងឯកប្រចាំព្រឹត្តិការណ៍លំដាប់ពិភពលោកមួយនេះ។
កីឡាកររូបនេះបានបញ្ជាក់ថា៖«ខ្ញុំមិនហ៊ាននិយាយថា ខ្លួនខ្ញុំអាចដណ្តើមបានមេដាយឬអត់នោះទេ ដោយសារខ្ញុំគិតថា កំណត់ត្រារបស់ខ្ញុំ និងកំណត់ត្រាពិភពលោកខ្ញុំនៅចាញ់គេ។ ដូច្នេះទាល់តែមានការប្រកួតទើបខ្ញុំហ៊ាននិយាយព្រោះអីវាជាលើកទី១ តែបើតាមការចូលរួមនាពេលកន្លងមកបើខ្ញុំហ៊ាននិយាយ គឺខ្ញុំហ៊ានធ្វើ»។
គួរបញ្ជាក់ថា កីឡាករ វ៉ាន់ វ៉ុន ជាបេក្ខភាពកម្ពុជាម្នាក់គត់ដែលទទួលបានសិទ្ធអនុគ្រោះពីគណៈកម្មាធិការជាតិប៉ារ៉ាឡាំពិកពិភពលោក និងត្រូវបានគណៈកម្មាធិការជាតិប៉ារ៉ាឡាំពិកកម្ពុជាបញ្ជូនឲ្យចូលរួមប្រកួតក្នុងព្រឹត្តិការណ៍កីឡាប៉ារ៉ាឡាំពិកនៅទីក្រុង Rio ប្រទេសប្រេស៊ីល៕
Tag:
វ៉ាន់ វ៉ុន
Rio Paralympic 2016
© រក្សាសិទ្ធិដោយ thmeythmey.com