បឹងកេតអង្គរត្រូវការឈ្នះប៉ូលីស ដើម្បីបញ្ចប់កី្តរំពឹងរបស់ក្រសួងការពារជាតិ

កីឡាជាតិ

បឹងកេតអង្គរត្រូវការឈ្នះប៉ូលីស ដើម្បីបញ្ចប់កី្តរំពឹងរបស់ក្រសួងការពារជាតិ

10, Sep 2016 , 3:19 pm

រូបភាព

ដោយ:

ក្រុមបឹងកេតអង្គរត្រូវការឈ្នះក្រុមអគ្គស្នងការនគរបាលជាតិ(ប៉ូលិស)ជាដាច់ខាត នាជំនួបចុងក្រោយល្ងាចនេះ ដើម្បីលើកពានលីកកំពូលកម្ពុជាឆ្នាំ២០១៦នេះ។ គួរបញ្ជាក់ថា ក្រុមក្រសួងការពារជាតិមាន៤៦ពិន្ទុ បានឡើងឈរកំពូលតារាង ខណៈក្រុមបឹងកេតអង្គរមាន៤៤ពិន្ទុ ឈនៅចំណាត់ថ្នាក់ទី២។

ក្រុមក្រសួងការពារជាតិ បានបង្កើនឱកាសប្រជែងលើកពានលីកកំពូលកម្ពុជាកាន់តែខ្លាំង តាមរយៈការបំបាក់ក្រុមអាស៊ីអឺរ៉ុបក្នុងលទ្ធផល ៤-១កាលពីម្សិលមិញ។ ជ័យជម្នះលើក្រុមអាស៊ីអឺរ៉ុបនេះបានជួយឲ្យក្រុមក្រសួងការពារជាតិឡើងទៅឈរលំដាប់លេខ១ក្នុងតារាង និងបានជួយបង្កើនក្តីសង្ឃឹមសម្រាប់ការលើកពានរដូវកាលនេះផងដែរ។

ក្រុមបឹងកេតអង្គរ ដែលនៅឈចំណាត់ថ្នាក់លេខ២ នៅមានឱកាសមួយប្រកួតចុងក្រោយក្នុងដៃ ដោយត្រូវជួបជាមួយក្រុមអគ្គស្នងការនគរបាលជាតិ(ប៉ូលិស) នៅពហុកីឡដ្ឋានជាតិនាវេលាម៉ោង៦ល្ងាចនេះ ដែលជាការប្រកួតមួយដ៏សំខាន់ក្នុងការកាត់ក្តី ស្វែងរកក្រុមជើងខ្លាំងលើកពានក្របខណ្ឌលីកកំពូលកម្ពុជាប្រចាំឆ្នាំ២០១៦។ ក្នុងជំនួបចុងក្រោយនេះ ក្រុមបឹងកេតអង្គរត្រូវតែឈ្នះជាដាច់ខាតលើក្រុមអគ្គស្នងការនគរបាលជាតិ ដើម្បីបញ្ចប់ក្តីសង្ឃឹមលើកពានរបស់ក្រុមក្រសួងការពារជាតិ ។

សូមបញ្ជាក់ថា ប្រសិនបើក្រុមបឹងកេតអង្គររក្សាលទ្ធផលស្មើ ឬចាញ់ក្រុមអគ្គស្នងការនគរបាលជាតិ នាជំនួបល្ងាចនេះ ក្រុមក្រសួងការពារជាតិនឹងក្លាយជាម្ចាស់ជើងឯកលីកកំពូលកម្ពុជា។ តែបើក្រុមបឹងកេតអង្គរអាចយកឈ្នះលើក្រុមអគ្គស្នងការនគរបាលជាតិបាន នោះក្រុមបឹងកេតអង្គរនឹងគ្រងពាន់រង្វាន់លីកកំពូលកម្ពុជា ប្រចាំរដូវកាល២០១៦នេះ។ បច្ចុប្បន្នក្រុមក្រសួងការពារជាតិមាន៤៦ពិន្ទុ រីឯក្រុមបឹងកេតអង្គរមាន៤៤ពិន្ទុ ពោលគឺចាញ់ក្រុមក្រសួងការពារជាតិ២ពិន្ទុ។

មុនជំនួបរវាងក្រុមបឹងកេតអង្គរ និងអគ្គស្នងការនគរបាលជាតិមកដល់ នឹងមានការប្រកួតពីរគូផ្សេងទៀតផងដែរ ដោយនាវេលាម៉ោង៣:៣០នាទីរសៀល ក្រុមម្ចាស់ផ្ទះវេស្ទើនភ្នំពេញជួបជាមួយក្រុមមជ្ឈមណ្ឌលកំចាត់មីនកម្ពុជានៅកីឡដ្ឋានវេស្ទើន។ ចំណែកក្រុមឈរលំដាប់លេខ៣ណាហ្គាវើលជួបប្រកួតជាមួយក្រុមខេមបូឌានថាយហ្គឺរ នៅពហុកីឡដ្ឋាន៕

*កម្មវិធីប្រកួតបញ្ចប់រដូវកាលឆ្នាំ២០១៦នាល្ងាចនេះ

- ម៉ោង៣:៣០នាទី៖ វេស្ទើនភ្នំពេញ ជួប មជ្ឈមណ្ឌលកំចាត់មីនកម្ពុជា នៅកីឡដ្ឋានវេស្ទើន

- ម៉ោង៣:៣០នាទី៖ ណាហ្គាវើល ជួប ខេមបូឌានថាយហ្គឺរ នៅពហុកីឡដ្ឋានជាតិ

- ម៉ោង១៨:០០នាទី៖ បឹងកេតអង្គរ ជួប អគ្គស្នងការនគរបាលជាតិ នៅពហុកីដ្ឋានជាតិ។