កីឡាជាតិ
ជាតិ
ចាន់ វឌ្ឍនាកា ឈ្នះស្បែកជើងមាស២ឆ្នាំជាប់គ្នា និងជាកីឡាករឆ្នើម៣ឆ្នាំជាប់គ្នា ចាន់ វឌ្ឍនាកា (លើកដៃ) អបអរជ័យជម្នះ ២-១ របស់បឹងកេតលើប៉ូលិស
× ខ្សែប្រយុទ្ធ ចាន់ វឌ្ឍនាកា នៃក្លិបបឹងកេតអង្គរ នៅតែរក្សាភាពអស្ចារ្យរបស់ខ្លួនក្នុងឆ្នាំនេះ ដោយរូបគេបានឈ្នះរង្វាន់ស្បែកជើងមាស (Golden Boot) និងរង្វាន់កីឡាករឆ្នើមប្រចាំរដូវកាល (Most Valuable Player) នៃក្របខណ្ឌមិត្តហ្វូនខេមបូឌានលីកឆ្នាំ២០១៦ បើទោះបីជារូបគេបានអវត្តមានក្នុងការប្រកួតជាមួយអគ្គស្នងការដ្ឋាននគរបាលជាតិក៏ដោយ។
វឌ្ឍនាកា បានអវត្តមាននាជ័យជម្នះ ២-១ របស់បឹងកេតលើនគរបាលជាតិ ដោយសារតែគេទទួលបានកាតលឿងកាលពីការប្រកួតពីរលើកមុន។ ទោះបីជាយ៉ាងណាក៏ដោយ ការស៊ុតបាល់បញ្ចូលទីសរុប២២គ្រាប់ នាំឲ្យគេទទួលបានស្បែកជើងមាសនៃពានរង្វាន់ក្របខណ្ឌកំពូលពីររដូវកាលជាប់គ្នា។ សម្រាប់រង្វាន់ កីឡាករឆ្នើម (Most Valuable Player) វឌ្ឍនាកា ទទួលបានបីលើកជាប់គ្នា។
ចាប់ វឌ្ឍនាកា វ័យ២២ឆ្នាំ គឺជាកីឡាករតែម្នាក់គត់របស់កម្ពុជា ដែលទទួលបានរង្វាន់ជាលក្ខណៈឯកត្តជន៥ឆ្នាំជាប់គ្នា។ នៅឆ្នាំ២០១២ គេជាប់ជាអត្តពលិកវ័យក្មេងឆ្នើមប្រចាំឆ្នាំរបស់គណៈកម្មាធិការជាតិអូឡាំពិកកម្ពុជា។ ឆ្នាំ២០១៣ វឌ្ឍនាកា ឈ្នះស្បែកមាសក្នុងពានរង្វាន់សម្តេច ហ៊ុន សែន។ ពីឆ្នាំ២០១៤ ដល់ឆ្នាំ២០១៦ ឈ្នះរង្វាន់កីឡាករឆ្នើមប្រចាំរដូវកាល ហើយពីរឆ្នាំចុងក្រោយនេះ ឈ្នះស្បែកជើងមាសប្រចាំរដូវកាល។ កាលពីឆ្នាំ២០១៥ ផងដែរ វឌ្ឍនាកា ជាប់ជាកីឡាករឆ្នើមប្រចាំព្រឹត្តិការណ៍ Mekong Club Championship។
រង្វាន់ទាំងពីរ Golden Boot និង MVP នាំឲ្យវឌ្ឍនាកា បានប្រាក់រង្វាន់សរុប៣លានរៀល៕
Tag:
Cambodian League
បាល់ទាត់
ចាន់ វឌ្ឍនាកា
© រក្សាសិទ្ធិដោយ thmeythmey.com