កាលពីព្រឹកថ្ងៃទី៩ ខែកញ្ញា នៅទីស្នាក់ការគណៈកម្មាធិការជាតិអូឡាំពិកកម្ពុជា(NOCC) សហព័ន្ធកីឡាសូហ្វតិន្នីសកម្ពុជាបានប្រកាសតែងតាំងប្រធាន និងអនុប្រធានដឹកនាំថ្មីជំនួសប្រធាន និងអនុប្រធានចាស់ដែលបានទទួលមរណភាព។ ការតែងតាំងធ្វើឡើងស្របពេលដែលសហព័ន្ធនេះទទួលបានការចុះកិច្ចព្រមព្រៀងសាងសង់ទីលានថ្មីលើទីលានចាស់ខាងត្បូងអាងហែលទឹកក្នុងពហុកីឡដ្ឋានជាតិជាមួយភាគីកូរ៉េ។
លោក ឯម សំអាន រដ្ឋលេខាធិការក្រសួងមហាផ្ទៃត្រូវបានតែងតាំងជាប្រធានសហព័ន្ធកីឡាសូហ្វតិន្នីសកម្ពុជាក្នុងការដឹកនាំអាណត្តិថ្មីជំនួស លោក ឈឹម ជួន ដែលបានទទួលមរណភាពកាលពីខែសីហា ឆ្នាំ២០១៦កន្លងទៅ។ ចំណែក លោក ម៉ក់ សំអុល ទីប្រឹក្សាសម្តេចនាយករដ្ឋមន្ត្រី ហ៊ុន សែន ត្រូវបានតែងតាំងជាអនុប្រធានសហព័ន្ធជំនួសលោកព្រឹទ្ធាចារ្យ ហែម ថុន ដែលបានទទួលមរណភាពដូចគ្នា។
ការតែងតាំងនេះធ្វើឡើងតាមរយៈការបោះឆ្នោតដោយការលើកដៃពីសំណាក់សមាជិក-សមាជិការប្រតិបត្តិដែលចូលរួមប្រមាណជាជិត៥០នាក់ ក្នុងអង្គសន្និបាតវិសាមញ្ញរបស់សហព័ន្ធកីឡាសូហ្វតិន្នីសកម្ពុជាកាលពីព្រឹកថ្ងៃទី៩ ខែកញ្ញា នៅទីស្នាក់ការគណៈកម្មាធិការជាតិអូឡាំពិកកម្ពុជា។
ជាមួយគ្នានោះ សហព័ន្ធកីឡាសូហ្វតិន្នីសកម្ពុជាទទួលបានការចុះកិច្ចព្រមព្រៀងក្នុងការសាងសង់ទីលានថ្មីដែលមានតម្លៃប្រមាណជាជាង៣៦ម៉ឺនដុល្លារជាមួយសមាគមវាយកូនបាល់ស្ម័គ្រចិត្តកូរ៉េខាងត្បូងថែមទៀតផង។ ការចុះកិច្ចព្រមព្រៀងនៃការយោគយល់នេះធ្វើឡើងក្រោមវត្តមានរបស់ លោក ម៉ក់ សំអុល អនុប្រធានសហព័ន្ធកីឡាការសូហ្វតិន្នីសកម្ពុជាដែលទើបតែងតាំងថ្មី និងលោក Cha Jeong Joo ប្រធានសមាគមវាយកូនបាល់ស្ម័គ្រចិត្តកូរ៉េ។
បើយោងតាម លោក ជា ប៊ុនហេង អគ្គលេខាធិការសហព័ន្ធកីឡាសូហ្វតិន្នីសកម្ពុជា ទីលានដែលគ្រោងនឹងសាងសង់នេះមានទំហំ ៣,២០០ម៉ែត្រការ៉េ, មានកម្ពស់១៣ម៉ែត្រ និងដំបូលទំហំ ៤,២០០ ម៉ែត្រការ៉េ។ ហើយនៅចំកណ្តាលទីលាននឹងមានការសាងសង់អគារការិយាល័យ២ជាន់ ដោយមានទទឹង៩ម៉ែត្រ និងបណ្តោយ៤០ម៉ែត្រ។
ទីលានកម្រិតស្តង់ដាអន្តរជាតិនេះសាងសង់ឡើងក្នុងគោលបំណង ដើម្បីផ្តល់ជាកន្លែងហ្វឹកហាត់ពង្រឹងសមត្ថភាព និងបច្ចេកទេសដល់កីឡាករកីឡាការិនីជម្រើស និងយុវជនថ្នាលកម្ពុជា។ ម្យ៉ាងទៀត ដើម្បីផ្តល់ជាកន្លែងសម្រាប់ប្រកួតជើងឯកថ្នាក់ជាតិ និងអន្តរជាតិ។ ជាពិសេសសម្រាប់ត្រៀមធ្វើជាម្ចាស់ផ្ទះការប្រកួតកីឡាសូហ្វតិន្នីសជើងឯកអាស៊ានឆ្នាំ២០១៨ និងការធ្វើជាម្ចាស់ផ្ទះស៊ីហ្គេមឆ្នាំ២០២៣ ខាងមុខនេះ។
ទីលានសូហ្វតិន្នីសថ្មី ដែលគ្រោងនឹងសាងសង់នៅលើទីលានចាស់ខាងត្បូងអាងហែលទឹកក្នុងពហុកីឡដ្ឋានជាតិនេះ បានជាប់គាំងអស់រយៈពេលជាច្រើនខែកន្លងមកហើយ ដោយសារខ្លឹមសារនៃកិច្ចព្រមព្រៀងមិនចុះសម្រុងជាមួយភាគីកូរ៉េ។ ម្យ៉ាងទៀត ដោយសារគម្រោងនៃការចំណាយមានការកើនឡើងខ្ពស់ ព្រោះសហព័ន្ធចង់បានសំណង់អគារដែលមានគុណភាពបែបស្តង់ដាអន្តរជាតិ។
បើយោងតាមរបាយការណ៍នៃការអភិវឌ្ឍទីលានកម្រិតស្តង់ដារអន្តរជាតិដែលមានតម្លៃប្រមាណជាជាង៣៦ម៉ឺនដុល្លារនេះ ក្នុងនោះមានថវិកាសមេ្តច ស ខេង រដ្ឋមន្ត្រីសក្រសួងមហាផ្ទៃប្រមាណជាជាង១០ម៉ឺនដុល្លារ ក្រៅពីនោះជាថវិការបស់សមាគមវាយកូនបាល់ស្ម័គ្រចិត្តកូរ៉េ។
តាមរបាយការណ៍នៃការចំណាយថវិវការទាំងនេះ គ្រោងនឹងចំណាយទៅលើដំបូលទីលានកម្ពស់១៣ម៉ែត្រប្រមាណជាជាង១១ម៉ឺនដុល្លារ, ក្រាលកម្រាលថ្មីលើទីលានវាយកូនបាល់ស្តង់ដារអាមេរិកប្រមាណជា៦៤,០០០ដុល្លារ និងអគារកម្ពស់ពីរជាន់ប្រមាណជាជិត១៩ម៉ឺនដុល្លារ។ ទីលានសូហ្វតិន្នីសថ្មីនេះនឹងចាប់ផ្តើមកសាងក្នុងពេលឆាប់ៗខាងមុខនេះ ហើយគ្រោងនឹងបញ្ចប់ការសាងសង់ក្នុងខែមីនា ឆ្នាំ២០១៧ ខាងមុខនេះ។
គួរបញ្ជាក់ថា សហព័ន្ធកីឡាសូហ្វតិន្នីសកម្ពុជាដែលបានបង្កើតឡើងក្នុងខែវិច្ឆិកា ឆ្នាំ២០១៤ ក្រោមការផ្តួចផ្តើមរបស់លោក ឈឹម ជួន អតីតប្រធានសហព័ន្ធ បច្ចុប្បន្នមានសមាជិកសមាជិការប្រតិបត្តិទាំងអស់ចំនួន១៥នាក់។ ក្នុងនោះ លោក ឯម សំអាន ប្រធាន, លោក ប្រាក់ ផល្លា អនុប្រធានទី១, លោក ម៉ក់ សំអុល អនុប្រធានទី២, លោក ជា ប៊ុនហេង អគ្គលេខាធិការ ព្រមទាំងសមាជិកសមាជិការជាច្រើនរូបទៀត៕