លោកស្រី ស៊ូជី នឹងនិយាយរឿងលុបទណ្ឌកម្មលើមីយ៉ាន់ម៉ាជាមួយលោក អូបាម៉ា

អន្តរជាតិ

លោកស្រី ស៊ូជី នឹងនិយាយរឿងលុបទណ្ឌកម្មលើមីយ៉ាន់ម៉ាជាមួយលោក អូបាម៉ា

11, Sep 2016 , 9:30 pm

រូបភាព

ដោយ: តន ចាន់រិទ្ធារ៉ា

មន្ត្រីក្រសួងការបរទេសមីយ៉ាន់ម៉ា បញ្ជក់ថា ការលុបចោលទណ្ឌកម្មដែលនៅសល់ គឺជារបៀបវារៈសំខាន់ នៃទស្សនកិច្ចផ្លូវការរបស់ទីប្រឹក្សារដ្ឋមីយ៉ាន់ម៉ា លោកស្រី អ៊ុងសាន ស៊ូជី ទៅកាន់អាមេរិក។ លោកស្រី អ៊ុងសាន ស៊ូជី នឹងទស្សនកិច្ចអាមេរិក តាមការអញ្ជើញរបស់ប្រធានាធិបតី បារ៉ាក់ អូបាម៉ា។

នៅសប្ដាហ៍ក្រោយនេះ លោកស្រី អ៊ុងសាន ស៊ូជី ទៅទស្សនកិច្ចនៅក្រុងវ៉ាស៊ីនតោន ហើយលោកស្រី គ្រោងជួបមេដឹកនាំអាមេរិករួមមានប្រធានាធិបតី បារ៉ាក់ អូបាម៉ា និងអនុប្រធានាធិបតី Joe Biden ផងដែរ។ ប្រធានបទនៃការលុបចោលទណ្ឌកម្មរបស់អាមេរិកដែលដាក់លើមីយ៉ាន់ម៉ា និងមិនទានលើកលែងអស់នោះ នឹងត្រូវដាក់តុពិភាក្សារវាងមេដឹកនាំប្រទេសទាំងពីរ។

មកទល់ពេលនេះ អាមេរិក នៅតែបន្តដាក់ទណ្ឌកម្មលើមីយ៉ាន់ម៉ា ដែលភាគច្រើនដាក់លើក្រុមហ៊ុនដែលគាំទ្រដោយយោធា និងក្រុមហ៊ុនក្នុងឧស្សាហកម្មត្បូងមានតម្លៃ។ យ៉ាងណាមិញ លោក U Kyaw Zaya មន្ត្រីជាន់ខ្ពស់នៃក្រសួងការបរទេសមីយ៉ាន់ម៉ា ជឿថា ទណ្ឌកម្មទាំងនោះ នឹងត្រូវលើកលែង នៅពេលដែលអាមេរិកឃើញពីការផ្លាស់ប្ដូរពិតប្រាកដនៅមីយ៉ាន់ម៉ា បន្ទាប់ពីការបោះឆ្នោតរួចមក។

បើតាមសារព័ត៌មាន Myanmar Times មន្ត្រីខាងលើបន្តថា ទណ្ឌកម្មទាំងនោះ នឹងត្រូវលុបចោលឆាប់ៗ ព្រោះមីយ៉ាន់ម៉ា កំពុងដើរលើផ្លូវត្រួវ។ ហើយការពិភាក្សាលើការលុបចោល នឹងធ្វើឡើងអំឡុងទស្សនកិច្ចរបស់លោកស្រីទីប្រឹក្សារដ្ឋ ទៅកាន់អាមេរិក។

កាលពីពាក់កណ្ដាលខែឧសភា អាមេរិកបានពង្រីកការដាក់ទណ្ឌកម្មលើក្រុមហ៊ុនរបស់មីយ៉ាន់ម៉ា តែក៏បានលុបចោលទណ្ឌកម្មលើក្រុមហ៊ុនមួយចំនួនដែរ។ មន្ត្រីអាមេរិកអះអាងថា ការសម្រេចចិត្តរបស់ខ្លួន គឺមានការផ្ដល់យោបល់ពីលោកស្រី ស៊ូជី ដ្បិតរដ្ឋាភិបាលស៊ីវិលមីយ៉ាន់ម៉ា ចង់រក្សាឥទ្ធិពលប្រឆាំងក្រុមយោធា និងក្រុមហ៊ុនពួកគេគាំទ្រ ដែលរកស៊ីមុខជំនួញធំៗរបស់ប្រទេស។

ជុំវិញការលុបទណ្ឌកម្មនេះដែរ រដ្ឋមន្ត្រីការបរទេសអាមេរិក លោក ចន ឃែរី (John Kerry) ក៏និយាយដែរថា ទណ្ឌកម្មទាំងអស់អាចលុបចោលបាន លុះត្រាតែមានការកែប្រែរដ្ឋធម្មនុញ្ញឆ្នាំ២០០៨ ដែលរារាំងលោកស្រី ស៊ូជី ធ្វើជាប្រធានាធិបតី។ លោកបញ្ជាក់ថា ចំណុចសំខាន់ដែលឈានដល់ការលុបទណ្ឌកម្ម គឺដំណើរការពិតប្រាកដរបស់មីយ៉ាន់ម៉ា ឆ្ពោះទៅប្រជាធិបតេយ្យពិតប្រាកដដែរ។