កីឡាជាតិ
ជាតិ
លើសទ័ព១ពិន្ទុប៉ុណ្ណោះ បឹងកេតក្លាយជាជើងឯក និងមានឱកាសដ៏ច្រើនក្នុងព្រឹត្តិការណ៍អន្តរជាតិ ក្លិបបឹងកេតអង្គរឈ្នះពានខេមបូឌានលីកជាលើកទីពីរបន្ទាប់ពីឆ្នាំ២០១២។ រូបថត សឿន វណ្ណឌេត
× ក្របខណ្ឌមិត្តហ្វូនខេមបូឌានឆ្នាំ២០១៦ បង្ហាញឲ្យឃើញថា ការប្រកួតនីមួយៗពិតជាមានសារសំខាន់ខ្លាំងណាស់។ បឹងកេតអង្គរក្លាយជាម្ចាស់ជើងឯកលើកទី២ បន្ទាប់ពីឆ្នាំ២០១២ ក្រោយឈ្នះអគ្គស្នងការដ្ឋាននគរបាលជាតិ ២-១ នាជំនួបចុងក្រោយ កាលពីល្ងាចថ្ងៃសៅរ៍។ ជោគជ័យនេះ នាំឲ្យបឹងកេតមានពិន្ទុលើសគូប្រជែងក្រសួងការពារជាតិ តែមួយពិន្ទុប៉ុណ្ណោះ។
នាការប្រកួតចំនួន១៨លើកប្រចាំរដូវកាល២០១៥-១៦ បឹងកេតទទួលបាន៤៧ពិន្ទុដើម្បីទទួលបានពានមិត្តហ្វូនខេមបូឌានលីកជាលើកទីពីរ ដោយលើសក្រសួងការពារជាតិតែ១ពិន្ទុប៉ុណ្ណោះ។ គ្រូបង្វឹកបឹងកេត លោក ប្រាក់ សុវណ្ណារ៉ា ដែលធ្លាប់មានប្រវត្តិដឹកនាំភ្នំពេញក្រោន ព្រះខ័នរាជ និងណាហ្គាវើល ទើបតែទទួលពានខេមបូឌានលីកជាលើកដំបូងប៉ុណ្ណោះក្នុងអាជីពជាគ្រូបង្វឹករបស់ខ្លួន។
បឹងកេតទទួលបានប្រាក់រង្វាន់ ៦០លានរៀល ខណៈខ្សែប្រយុទ្ធឆ្នើម ចាន់ វឌ្ឍនាកា ទទួលបានស្បែកមាស តាមរយៈការស៊ុតបាល់បញ្ចូលទី២២គ្រាប់ និងជាប់ជាកីឡាករឆ្នើមប្រចាំព្រឹត្តិការណ៍ ដោយបានប្រាក់រង្វាន់សរុបចំនួន៣លានរៀល។
ក្នុងនាមជាម្ចាស់ជើងឯកក្របខណ្ឌមិត្តហ្វូនខេមបូឌានលីក បឹងកេតអង្គរ នឹងតំណាងឲ្យកម្ពុជាក្នុងការប្រកួតជម្រុះពានរង្វាន់ AFC Cup ឆ្នាំ២០១៨ ។ បន្ថែមពីលើនេះ បឹងកេតមានឱកាសបង្ហាញខ្លួនសារជាថ្មីក្នុងព្រឹត្តិការណ៍ Mekong Toyota Club Championships ដោយពួកគេនៅរង់ចាំវគ្គពាក់កណ្តាលផ្តាច់ព្រ័ត្រនៅចុងខែធ្នូ ដែលប្រព្រឹត្តទៅនៅពហុកីឡដ្ឋានជាតិអូឡាំពិក។
ការទទួលបានកៅអីនៅវគ្គពាក់កណ្តាលផ្តាច់ព្រ័ត្រក្នុងព្រឹត្តិការណ៍ Mekong Toyota Club Championships នេះ គឺដោយសារតែបឹងកេតអង្គរទទួលបានជើងឯករងកាលពីរដូវកាលមុន ដោយចាញ់ក្រុមថៃ Buriram United ១-០ ដោយគ្រាប់បាល់ប៉េណាល់ទីនៅវគ្គផ្តាច់ព្រ័ត្រ។ ក្រុមជើងឯកពីវៀតណាម ឡាវ និងមីយ៉ាន់ម៉ា [Yadanardon] ត្រូវឆ្លងកាត់ការប្រកួតជម្រុះ រីឯក្លិបដែលទទួលបានជើងឯក Thai League Cup នឹងរង់ចាំនៅវគ្គផ្តាច់ព្រ័ត្រ៕
Tag:
Cambodian League
បាល់ទាត់
បឹងកេតអង្គរ
© រក្សាសិទ្ធិដោយ thmeythmey.com