ថ្ងៃទី១១ ខែកញ្ញា ឆ្នាំ២០០១ អាគារភ្លោះនៃមជ្ឈមណ្ឌលពាណិជ្ជកម្មក្រុង New York បានដួលរលំ ដោយសារការបើកយន្តហោះបំបុកដោយក្រុមភេរវកម្មអាល់កៃដា ដែលមានអតីតមេកើយ Osama Bin Laden ជាមេគំនិត។ មនុស្សជិតបីពាន់នាក់ដែលមិនដឹងអីសោះ បានស្លាប់ក្នុងហេតុការណ៍រន្ធត់នេះ ដែលបានផ្លាស់ប្ដូររបត់នយោបាយពិភពលោកយ៉ាងខ្លាំង ជាមួយនឹងនយោបាយប្រឆាំងភេរវកម្មនិយម ដែលដឹកមុខដោយអាមេរិកផ្ទាល់។
ថ្ងៃទី១១ ខែកញ្ញា ឆ្នាំ២០១៦ គឺជាខួបលើកទី១៥ នៃការវាយប្រហារភេរកម្មដែលមានមិនធ្លាប់មានលើទឹកដីអាមេរិក។ នៅថ្ងៃទី១១ ខែកញ្ញា ឆ្នាំ២០០១ មនុស្សជិតបីពាន់នាក់ បានបាត់បង់ជីវិត នៅពេលដែលក្រុមភេរវករជ្រុលនិយមអាល់កៃដា បានប្លន់យន្តហោះដឹកនាំដំណើរចំនួនបួនគ្រឿង ហើយធ្វើសកម្មភាពបើកបំបុកអគារភ្លោះនៅក្រុង New York មន្ទីរបញ្ចកោណ ក្នុងវ៉ាស៊ីនតោន និងនៅរដ្ឋ Pennsylvania។
នេះជាការវាយប្រហារលើកទីមួយហើយ ពីសំណាក់ភេរករបរទេសលើទឹកដីអាមេរិក។ ហើយការវាយប្រហារនេះ ក៏នាំដល់ការចូលលុកលុយរបស់អាមេរិកនៅអាហ្វហ្គានីស្ថានក្នុងឆ្នាំ២០០១ និងបន្តមកដល់អ៊ីរ៉ាក់ក្នុងឆ្នាំ២០០៣។ សង្គ្រាមនៅប្រទេសទាំងនេះ ក៏រីករាលដាលកាន់តែស្មុគស្មាញ និងធ្វើឲ្យតំបន់មជ្ឈិមបូព៌ាទាំងមូល ក្លាយជាជម្រកក្រុមភេរវករជ្រុលនិយម ជាពិសេសការកើតឡើងក្រុមរដ្ឋឥស្លាម ដែលកំពុងអុលឡុកពេញពិភពលោកទៅហើយ។
យ៉ាងណាមិញ ព្រលឹងជនរងគ្រោះ អ្នករងបួស និងក្រុមគ្រួសារសាច់ញាតិរបស់គេ ប្រហែលជារំសាយទុក្ខហើយដែរ បន្ទាប់មេក្លោងនៃការវាយប្រហារនេះ ត្រូវបានទាហានអាមេរិកសម្លាប់មកនោះ។ នៅថ្ងៃទី១ ខែឧសភា ឆ្នាំ២០១១ ប្រធានាធិបតីអាមេរិក លោក បារ៉ាក់ អូបាម៉ា បានចេញមកប្រកាសពីការស្លាប់របស់មេភេរវករ Osama Bin Laden ក្នុងប្រតិបត្តិការសម្ងាត់ នៅប្រទេសប៉ាគីស្ថាន។
ដោយសារតែការវាយប្រហារភេរវកម្មនេះហើយ ទើបធ្វើឲ្យអាមេរិកបើកប្រតិបត្តិការប្រឆាំងភេរវកម្មនៅទូទាំងពិភពលោក តាមកម្ចាត់ក្រុមភេរវកម្មទាំងអស់។ មិនតែប៉ុណ្ណោះ រដ្ឋាភិបាលក្រុងវ៉ាស៊ីនតោន ក៏សហការជាមួយប្រទេសដទៃទៀតនៅជុំវិញពិភពលោក ដើម្បីបោសសម្អាតក្រុមជ្រុលនិយម។ ក្នុងមួយឆ្នាំៗ អាមេរិកបានផ្ដល់ជំនួយមិនតិចពាន់លានដុល្លារទេ ទៅឲ្យប្រទេសជាច្រើន សម្រាប់យុទ្ធនាការនេះ។
លោក អូបាម៉ា យកថ្ងៃទី១១ ខែកញ្ញា ជាទិវាអ្នកស្នេហាជាតិ និងទិវានៃការចងចាំ
ពីរថ្ងៃមុនការមកដល់ថ្ងៃទី១១ ខែកញ្ញា ប្រធានាធិបតីអាមេរិក លោក បារ៉ាក់ អូបាម៉ា បានចេញសេចក្ដីប្រកាសយកថ្ងៃទី១១ ខែកញ្ញា ឆ្នាំ២០១៦ ជាទិវាអ្នកស្នេហាជាតិ និងទិវាជាតិនៃការចងចាំ និងការបម្រើជាតិ។ តាមសេចក្ដីប្រកាសចេញថ្ងៃទី៩ ខែកញ្ញា លោក អូបាម៉ា ក៏ស្នើគ្រប់ស្ថាប័នទាំងអស់នៅទូទាំងសហរដ្ឋអាមេរិក បង្ហូតទង់ជាតិពាក់កណ្ដាលដើម្បីរម្លឹកដល់អ្នកស្លាប់ ក្នុងហេតុការណ៍ថ្ងៃទី១១ ខែកញ្ញា ឆ្នាំ២០០១។
ប្រធានាធិបតីអាមេរិករូបនេះ បានលើកសរសើរវីរភាពរបស់អ្នករស់រានមានជីវិត និងក្រុមបុគ្គលិកសង្គ្រោះបន្ទាន់ ដែលបានចូលរួមក្នុងប្រតិបត្តិជួយសង្គ្រោះ ក៏ដូចជាមនុស្សដទៃទៀត ដែលប្រឹងប្រែងរក្សាធ្វើឲ្យអាមេរិកមានសុវត្ថិភាព។ ក្នុងសន្និសីទកាសែតប្រចាំសប្ដាហ៍ លោក អូបាម៉ា និយាយថា ចាប់តាំងពីហេតុការណ៍ថ្ងៃទី១១ ខែកញ្ញា ២០០១ មក អ្វីៗជាច្រើនបានផ្លាស់ប្ដូរ តែយើងត្រូវចងចាំអ្វីដែលមិនផ្លាស់ប្ដូរ។
លោក អូបាម៉ា បន្តថា ក្រុមភេរករចង់បន្លាចប្រជាជនអាមេរិក ប៉ុន្តែប្រជាជនអាមេរិក មិនភ័ខ្លាចឡើយ។ ហើយអាមេរិក នឹងមិនរារែកក្នុការប្រយុទ្ធប្រឆាំងក្រុមភេរវជនទាំងអស់ រួមទាំងក្រុមអាល់កៃដា និងក្រុមរដ្ឋឥស្លាមឡើយ៕