សហព័ន្ធកីឡាបាល់ទាត់កម្ពុជាកាលពីថ្ងៃទី១១ ខែកញ្ញា បានបង្ហាញបញ្ជីឈ្មោះក្រុមកីឡាករជម្រើសជាតិកម្ពុជាទាំង២៧នាក់ ដែលត្រូវចេញទៅប្រមូលផ្តុំហ្វឹកហាត់នៅប្រទេសសិង្ហបុរី ដើម្បីប្រកួតវគ្គជម្រុះ Suzuki Cup 2016។ ក្នុងបញ្ជីឈ្មោះក្រុមកីឡាករជម្រើសជាតិទាំងនោះ កីឡាករមកពីក្លិបព្រះខ័នរាជស្វាយរៀងមានច្រើនជាងគេ។
ក្នុងចំណោមកីឡាករទាំង២៧នាក់ដែលមកពីក្លិបធំៗនៅកម្ពុជាចំនួន៦ គឺមានតែកីឡាករមកពីព្រះខ័នរាជស្វាយរៀងដែលជាប់ក្នុងបញ្ជីឈ្មោះក្រុមជម្រើសជាតិកម្ពុជាច្រើនជាងគេ ពោលគឺមានរហូតដល់៨នាក់។ ក្រៅពីនោះក្រសួងការពារជាតិមាន៧នាក់, បឹងកេតអង្គរ៤នាក់, ណាហ្គាវើល៣នាក់, ភ្នំពេញក្រោន៣នាក់ និងអគ្គស្នងការនគរបាលជាតិចំនួន២នាក់។
កីឡាករទាំង៨នាក់របស់ព្រះខ័នរាជស្វាយរៀងរួមមានកីឡាករ ប្រាក់ មុន្នីឧត្តម, សុខ សំណាង, ណុប តុលា, ហួយ ផល្លីន, រស់ គង់សំរេច, សំអឿន ពិដោរ, នេន សុធារដ្ឋ និងកីឡាករ សឿយ វិសាល។ ឬឯក្រសួងការពារជាតិមានកីឡាករ ច្រឹង ពលរដ្ឋ, ឈិន ឈឿន, ស ពិសិដ្ឋ, អ៊ុំ សេរីរ័ត្ន, អ៊ុំ វិចិត្រ, រ៉ឹង ប៊ុនហៀង និង ខែក ខេមរិន្ទ។
ចំណែកកីឡាកររបស់បឹងកេតអង្គរមានកីឡាករ ស៊ូ យ៉ាទី, ចាន់ វឌ្ឍនាកា, រស់ សំអឿន និង សុខ សុវណ្ណ ខណៈភ្នំពេញក្រោន កែវ សុខផេង, កែវ សុខសិលា និងកីឡាករ ប៊ីន ចន្ថាធារី។ ឬឯណាហ្គាវើលមានកីឡាករ សុះ ស៊ូហាណា, ឆេង ម៉េង និង សារី ម៉ាត់ណូរ៉ូទីន។ ចំណែកប៉ូលិសមាន ទិត្យ ឌីណា និង ស៊ុន វណ្ណដេត។
ក្រុមកីឡាករជម្រើសជាតិកម្ពុជាដែលដឹកនាំដោយ លោក Lee Tae Hoon ទាំងនេះនឹងធ្វើការបោះជំរំប្រមូលផ្តុំហ្វឹកហាត់ ដើម្បីពង្រឹងបច្ចេកទេស និងសមត្ថភាពនៅប្រទេសសិង្ហបុរី ដើម្បីត្រៀមប្រកួតវគ្គជម្រុះពានរង្វាន់បាល់ទាត់អាស៊ានប្រចាំឆ្នាំ២០១៦ (AFF Suzuki Cup 2016)។ ការហ្វឹកហាត់ និងត្រៀមប្រកួតនេះដោយគ្រោងធ្វើឡើងចាប់ថ្ងៃទី១២ ខែកញ្ញា នេះ រហូតដល់ថ្ងៃទី២២ ខែតុលា ខាងមុខនេះ៕