ជាតិ
សុខភាព
×![]()
ភ្នំពេញ៖ នាយកដ្ឋានប្រយុទ្ធនឹងជំងឺឆ្លង (CDC) នៃក្រសួងសុខាភិបាល បានចេញសេចក្ដីប្រកាសស្ដីពីការបង្ការជំងឺឆ្លងបណ្ដាលមកពីវីរុសហ្ស៊ីកា សម្រាប់ស្ត្រីមានផ្ទៃពោះ និងប្រជាពលរដ្ឋទូទៅ។ ជំងឺហ្ស៊ីកា មានរោគសញ្ញាស្រដៀងនឹងជំងឺគ្រុនឈាមដែរ។ នេះបើតាមសេចក្ដីប្រកាសព័ត៌មានរបស់CDC។
បើផ្អែកតាម CDC ចាប់ពីឆ្នាំ២០០៧ ដល់២០១០ កម្ពុជាបានរកឃើញជំងឺហ្ស៊ីកាចំនួន៧ករណី ដែលបានព្យាបាលជាសះស្បើយ និងពុំរកឃើញមានករណីកុមារក្បាលតូចទេ។ ជំងឺហ្ស៊ីកានេះ ឆ្លងតាមមូសខ្លាខាំ និងតាមការរួមភេទ ព្រោះវីរុសនេះ មាននៅក្នុងទឹកកាម ឈាម ទឹកនោម ទឹកភ្លោះ ទឹកមាត់ ព្រមទាំងសារធាតុរាវក្នុងសារពាង្គកាយផងដែរ។ ជំងឺនេះ មានរោគសញ្ញាដូចជា គ្រុនក្ដៅ ឈឺក្បាល កន្ទួលក្រហមលើស្បែក ក្រហមភ្នែក និងឈឺសន្លាក់ហើយជំងឺនេះ ជាសះស្បើយក្នុងអំឡុងពេលពី២ ទៅ៧ថ្ងៃ។ ដោយឡែក ជំងឺនេះមានអត្រាស្លាប់កម្រិតតិចតួចណាស់។
ដើម្បីការពារល្អបំផុតពីជំងឺហ្ស៊ីកា គឺត្រូវអនុវត្តន៍កិច្ចការពារដូចជំងឺគ្រុនឈាមដែរ រួមមានការពារខ្លួនកុំឲ្យមូសខ្លាខាំ។ ចំណែកស្ត្រីដែលមានផ្ទៃពោះ និងដៃគូរួមភេទរឹតតែត្រូវមានការប្រុងប្រយ័ត្នបន្ថែមទៀត ដើម្បីការពារខ្លួនពីមូសខ្លាដែលមានផ្ទុកវីរុសហ្ស៊ីកា និងការចម្លងតាមការរួមភេទ។
ការបង្ការជំងឺហ្ស៊ីការួមមាន ត្រូវបំបាត់ជម្រកមូសខ្លា ដោយធ្វើអនាម័យសំអាតជុំវិញលំនៅដ្ឋាន និងការពារកុំឲ្យមានទឹកដក់ នៅក្នុងសម្ភារផ្សេងៗ។ ការស្លៀកពាក់ខោអាវវែងៗ ដែលជាសំលៀកបំពាក់មានពណ៌ភ្លឺ និងប្រើថ្នាំបាញ់ ឬលាប កុំឲ្យមូសមកជិត ព្រោះថ្នាំនេះ ស្ត្រីមានផ្ទៃពោះអាចប្រើបាន ដោយមានសុវត្ថិភាព មិនមានផលប៉ះពាល់សុខភាពនោះទេ។ ម្យ៉ាងទៀត ត្រូវសម្រាន្តក្នុងមុង ព្រមទាំងបើកបង្អួចឲ្យធំ ដើម្បីឲ្យពន្លឺថ្ងៃនិងខ្យល់ចេញចូលបានល្អ ។
ចំណែកស្ត្រីមានផ្ទៃពោះ និងដៃគូដែលមានគម្រោងចង់មានផ្ទៃពោះ មិនគួរធ្វើដំណើរទៅតំបន់មានផ្ទុះជំងឺហ្ស៊ីកានោះទេ ហើយត្រូវមានការពារឲ្យបានត្រឹមត្រូវ និងខ្ជាប់ខ្ជួន។ ដោយឡែក បុរសស្ត្រីដែលធ្វើដំណើរមកពីតំបន់ផ្ទុះជំងឺហ្ស៊ីកា ត្រូវអនុវត្តការរួមភេទឲ្យបានត្រឹមត្រូវ ដោយប្រើស្រោមអនាម័យ ដើម្បីការពារការឆ្លងវីរុសហ្ស៊ីកាតាមការរួមភេទ។ ចំពោះស្ត្រីមានផ្ទៃពោះដែលមានរោគសញ្ញានៃការឆ្លងវីរុសហ្ស៊ីកា ត្រូវមកពិនិត្យផ្ទៃពោះឲ្យបានញឹកញាប់ ជាមួយគ្រូពេទ្យជំនាញនៅតាមមូលដ្ឋានសុខាភិបាលសាធារណៈ។
សូមបញ្ជាក់ថា វីរុសហ្ស៊ីកានេះ រកឃើញដំបូងនៅលើសត្វស្វាក្នុងឆ្នាំ១៩៤៧ និងលើមនុស្ស ក្នុងឆ្នាំ១៩៥២ នៅប្រទេស Uganda នៃទ្វីបអាហ្វ្រិក។ វីរុសZika រាតត្បាតខ្លាំងឡើងបន្ទាប់ពីការទាត់បាល់ពិភពលោកនៅប្រទេសប្រេស៊ីល ឆ្នាំ២០១៤ ហើយធ្លាប់បានផ្ទុះឡើងនៅទ្វីបអាហ្វ្រិក អាមេរិក និងអាស៊ីប៉ាស៊ីហ្វិកផងដែរ៕
Tag:
សុខភាព
© រក្សាសិទ្ធិដោយ thmeythmey.com
