ដំណើរទស្សនកិច្ចទៅគុយបា៖ លោក អាបេ គ្រោងនិយាយបញ្ហាកូរ៉េខាងជើង ឲ្យគុយបាបានដឹងខ្លះ

អន្តរជាតិ

ដំណើរទស្សនកិច្ចទៅគុយបា៖ លោក អាបេ គ្រោងនិយាយបញ្ហាកូរ៉េខាងជើង ឲ្យគុយបាបានដឹងខ្លះ

18, Sep 2016 , 8:19 pm

រូបភាព

លោកនាយករដ្ឋមន្ត្រីជប៉ុន Shinzo Abe

ដោយ:

លោកនាយករដ្ឋមន្ត្រីជប៉ុន ស៊ិនហ្សូ អាបេ នឹងបំពេញទស្សនកិច្ចជាលើកដំបូងទៅកាន់ប្រទេសគុយបានៅថ្ងៃទី២២ដល់២៤ខែកញ្ញា សប្តាហ៍ក្រោយនេះ ។ ក្នុងនាមជានាយករដ្ឋមន្ត្រីជប៉ុនទីមួយដែលបំពេញទស្សនកិច្ចទៅកាន់គុយបា លោក អាបេ នឹងជួបជាមួយនឹងប្រធានាធិបតីគុយបាលោក រ៉ាអ៊ូល កាស្ត្រូ (Raul Castro) ដើម្បីជជែកពីបញ្ហាកូរ៉េខាងជើង ក៏ដូចជាការពង្រីកកិច្ចសហប្រតិបត្តិការសេដ្ឋកិច្ចផងដែរ។

មន្ត្រីជាន់ខ្ពស់រដ្ឋាភិបាលជប៉ុន Yoshihide Suga បានបញ្ជាក់នៅដើមសបា្តហ៍នេះថា «រដ្ឋាភិបាលក្រុងតូក្យូ នឹងព្យាយាមស្វែងរកការយោគយល់ និងសហប្រតិបត្តិការពីរដ្ឋាភិបាលឡាហាវ៉ាន ដែលជាសម្ព័ន្ធមិត្តប្រែប្រួលរបស់រដ្ឋាភិបាលក្រុងព្យុងយ៉ាងលើដំណោះស្រាយពាក់ព័ន្ធបញ្ហាវិវត្តចុងក្រោយរបស់កូរ៉េខាងជើង ដូចជាអាវុធនុយក្លេអ៊ែរ និងមីស៊ីលជាដើម»។ នេះបើយោងតាមការចុះផ្សាយរបស់សារព័ត៌មាន Japan Times។

តាមប្រភពព័ត៌មានដដែល នាដំណើរទស្សនកិច្ចនោះ មិនខុសពីមហាអំណាចអាមេរិក ចិន និងសហភាពអឺរ៉ុប លោកនាយករដ្ឋមន្ត្រីជប៉ុន ក៏សំឡឹងឃើញពីឱកាសសេដ្ឋកិច្ចនៅទីនោះផងដែរ។ ជប៉ុន ក៏គ្រោងនឹងលុបបំណុលប្រមាណជិតពីរពាន់លានដុល្លារដែលគុយបាបានជំពាក់ផងដែរ។ ជាងនេះទៅទៀត លោក អាបេ ក៏គ្រោងនឹងប្រកាសផ្តល់ជំនួយអភិវឌ្ឍន៍ផ្លូវការប្រមាណជិត១០លានដុល្លារទៀតផង។

អ្វីគួរកត់សម្គាល់នោះ ដំណើរទស្សនកិច្ចរបស់នាយករដ្ឋមន្ត្រីជប៉ុនទៅកាន់គុយបា ត្រូវបានមើលឃើញថា ធ្វើឡើងក្រោយពីប្រធានាធិបតីអាមេរិកលោក បារ៉ាក់ អូបាម៉ាដែលជាសម្ព័ន្ធមិត្តចាក់ទឹកមិនលិចរបស់ខ្លួន បានទៅដល់កាលពីដើមឆ្នាំកន្លងទៅ។ និយាយឲ្យខ្លីទៅ វត្តមានរបស់លោក ធ្វើឡើងស្របទៅតាមទំនោរសកលរបស់មហាអំណាច អាមេរិក និងចិន ដែលបាននិងកំពុងតែផ្តោតគោលនយោបាយការបរទេសសំខាន់នៅនោះ។

ងាកមកចាប់អារម្មណ៍របៀបវារៈបញ្ហាកូវ៉េខាងជើងដែលលោកអាបេ គ្រោងនឹងនិយាយជាមួយនឹងប្រមុខគុយបាវិញម្តង! កាលពីពេលថ្មីៗនេះ កូរ៉េខាងជើង បានបាញ់សាកល្បងអាវុធនុយក្លេអ៊ែរខ្នាតធំជាលើកទីប្រាំរបស់ខ្លួន ដោយបានគំរាមកំហែងដល់ប្រទេសជិតខាងរួមទាំងជប៉ុនផងដែរនោះ។ ជាពិសេសនោះ កូរ៉េខាងជើង បានបំពានទៅនឹងបម្រាបសហគមន៍អន្តរជាតិ ដែលបានហាមប្រាម និងថែមទាំងមានទណ្ឌកម្មជាបន្តបន្ទាប់។

ហើយការណ៍ដែលលោកអាបេ គ្រោងលើកបញ្ហានៃការអភិវឌ្ឍអាវុធនុយក្លេអ៊ែរបស់កូរ៉េខាងជើងទៅជជែកជាមួយនឹងគុយបា ក៏ព្រោះតែគុយបា គឺជាសម្ព័ន្ធមិត្តដែលមិនប្រែប្រួលរបស់កូរ៉េខាងជើងតាំងពីសម័យសង្គ្រាមត្រជាក់មកម្ល៉េះ។ ទោះនិន្នាការនយោបាយសកលស្ថិតនៅក្នុងដំណាក់កាលណាក៏ដោយ កូរ៉េខាងជើង និងគុយបា បាននិងកំពុងតែមានទំនាក់ទំនងសេដ្ឋកិច្ច និងពាណិជ្ជកម្មរួមទាំងការលក់អាវុធជាមួយគ្នាដោយមិនមានការប្រែប្រួលឡើយ។ និយាយរួមទៅ បើជប៉ុនអាចបញ្ចុះបញ្ចូលគុយបាបាន តិចឬច្រើន គុយបា យកបញ្ហានោះទៅជជែកជាមួយនឹងកូរ៉េខាងជើងដើម្បីថមថយសកម្មភាពផ្គើនសហគមន៍អន្តរជាតិខ្លះដែរ៕