ក្រោយបញ្ចប់ជំនួបត្រីភាគី អាមេរិក-ជប៉ុន-កូរ៉េខាងត្បូង នៅមិនទាន់មានវិធានក្តៅប្រឆាំងកូរ៉េខាងជើងឡើយ

អន្តរជាតិ

ក្រោយបញ្ចប់ជំនួបត្រីភាគី អាមេរិក-ជប៉ុន-កូរ៉េខាងត្បូង នៅមិនទាន់មានវិធានក្តៅប្រឆាំងកូរ៉េខាងជើងឡើយ

19, Sep 2016 , 5:19 pm

រូបភាព

ដោយ:

ការបាញ់សាកល្បងអាវុធនុយក្លេអ៊ែរខ្នាតធំលើកទី៥របស់កូរ៉េខាងជើង បានជំរុញឲ្យសម្ព័ន្ធមិត្តចាក់ទឹកមិនលិចបីប្រទេសអាមេរិក ជប៉ុន និងកូរ៉េខាងត្បូង ត្រូវប្រជុំគ្នាជាថ្មីដើម្បីរិះរកយុទ្ធសាស្ត្រ និងផែនការដើម្បីតទល់ទៅនឹងសកម្មភាពដែលពួកគេចាត់ទុកថាជាការបង្កហេតុ និងព្រហើនទៅនឹងបម្រាមសហគមន៍អន្តរជាតិរបស់ក្រុងព្យុងយ៉ាង។ តាមរយៈជំនួបដែលមានការចូលរួមពីប្រមុខការទូតត្រីភាគីនេះ ក្រុងវ៉ាស៊ីនតោន ប្តេជា្ញ ថា អាមេរិក បន្តសហប្រតិបត្តិការស៊ីជម្រៅជាមួយនឹងសម្ព័ន្ធមិត្តដើម្បីតទល់ជាមួយនឹងកូរ៉េខាងជើងតាមគ្រប់មធ្យោបាយ។

នាជំនួបប្រមុខការទូតត្រីភាគីក្នុងក្រុងញូវយ៉កនៅថ្ងៃទី១៨ ខែកញ្ញា លោករដ្ឋមន្ត្រីការបរទេសជប៉ុន Fumio Kishida បានសម្តែងការព្រួយខ្លាំងពីសកម្មភាពចុងក្រោយរបស់កូរ៉េខាងជើង ដោយលោក បានទទូចឲ្យសហគមន៍អន្តរជាតិ ត្រូវមានវិធានថ្មីផ្សេងទៀតដើម្បីឆ្លើយតបឲ្យបានទាន់ពេល។ លោករដ្ឋមន្ត្រី ក៏បានលើកឡើងដែរថា អាមរិក កូរ៉េខាងត្បូង និងជប៉ុន ត្រូវតែចេញមុខក្នុងចាប់ផ្តើមពិភាក្សាជាលក្ខណៈអន្តរជាតិដើម្បីឲ្យកូរ៉េខាងជើងបានដឹងថា កម្មវិធីបង្កហេតុដដែលៗនោះ នឹងធ្វើឲ្យខ្លួនកាន់តែឯកាពីគេឯង និងជាពិសេសនោះគ្មានអនាគតល្អប្រសើរឡើយ។

មិនខុសពីរដ្ឋមន្ត្រីការបរទេសជប៉ុន លោករដ្ឋមន្ត្រីការបរទេសកូរ៉េខាងត្បូង Yun Byung-se ក៏ត្អូញត្អែរ និងព្រួយបារម្ភខ្លាំងណាស់ដែរពីសកម្មភាពរបស់បងប្អូនកូរ៉េដូចគ្នានោះ។ លោក បានប្រាប់សមភាគីទាំងពីរថា ការបាញ់សាកល្បងអាវុធនុយក្លេអ៊ែររបស់កូរ៉េខាងជើងលើកទីប្រាំកាលពីពេលថ្មីៗនេះ គឺជាខ្លាំងជាងពេលមុនៗច្រើនឆ្ញាយណាស់។ លោករដ្ឋមន្ត្រី ថែមទាំងបញ្ជាក់ថាការអភិវឌ្ឍអាវុធនុយក្លេអ៊ែរកូរ៉េខាងជើង បានដល់ដំណាក់កាលចុងក្រោយហើយ ជាពិសេសនោះ កូរ៉េខាងជើង មិនត្រឹមតែមានសមត្ថភាពបង្កើតនោះទេ តែ កូរ៉េខាងជើង បានបង្ហាញអាវុធទាំងនោះជាសាធារណៈរួចទៅហើយ។

ប្រមុខការទូតកូរ៉េខាងត្បូង ក៏បានរម្លឹកពីក្តីរបស់របស់ប្រធានាធិបតីកូរ៉េខាងត្បូងលោកស្រី Park Geun-hye យ៉ាងដូច្នេះថា «អ្វីដែលយើងឃើញពីព្យុះដែលកំពុងបក់បោកយ៉ាងខ្លាំងនោះ(សកម្មភាពកូរ៉ខាងជើង) មិនមែនវាយប្រហារទៅលើភាគឥសាន្តរបស់អាស៊ីនោះទេ តែ វា ក៏នឹងបក់បោកទៅលើពិភពលោកផងដែរ។ ហើយហេតុផលនេះហើយ ដែលលោកស្រីប្រធានាធិបតី បានព្រមានក្នុងពេលកិច្ចប្រជុំអាស៊ីបូព៌ាកន្លងមកថា ប្រសិន យើង មិនអាចបញ្ឈប់មហិច្ឆតានុយក្លេអ៊ែររបស់ក្រុងព្យុងយ៉ាងថ្ងៃនេះទេ នោះថ្ងៃស្អែកយើងនឹងមានការសោកស្តាយហើយ»។

ជុំវិញបញ្ហានេះ លោករដ្ឋមន្ត្រីការបរទេសអាមេរិក Jonh Kerry ដែលជាម្ចាស់ផ្ទះនៃកិច្ចប្រជុំនោះ បានពណ៌នា និងហៅសកម្មភាពរបស់ប្រមុខកំពូលកូរ៉េខាងជើងលោក គីម ជុងអ៊ុន ថា ជាសកម្មភាពព្រហើនរបស់មេដឹកនាំផ្តាច់ការ។ លោកប្រមុខការទូត ក៏បានប្តេជ្ញាបន្តអនុវត្តតួនាទីក្នុងនាមសម្ព័ន្ធមិត្តតាមសន្ធិសញ្ញា, តាមរយៈកាតព្វកិច្ចការពារជាតិរួម និងតទល់ជាមួយនឹងឥរិយោបថព្រហើនរបស់កូរ៉េខាងជើងផងដែរ។

អ្វីគួរកត់សម្គាល់នោះ មិនខុសពីពេលមុនៗនោះ លោករដ្ឋមន្ត្រី មិនទាន់មានវិធានធ្ងន់ធ្ងររហូតដល់ការប្រឈមមុខផ្នែកយោធា ឬវិធានការបង្ខំអ្វីឡើយ ដោយ ត្រឹមបញ្ជាក់ថា អាមេរិក បានត្រៀមខ្លួនរួចជាស្រេចហើយក្នុងការចរចាជាមួយនឹងកូរ៉េខាងជើងដើម្បីដោះស្រាយបញ្ហានៅឧបទ្វីបកូរ៉េ ,ដោយមិនប្រើហិង្សា, ដោយមានការចូលរួមពីសហគមន៍អន្តរជាតិ ,ដោយមានការបញ្ចូលជាមួយនឹងជំនួយ និងការអភិវឌ្ឍសេដ្ឋកិច្ចជាដើម។

សូមជម្រាបផងដែរ កាលពីដើមឆ្នាំ២០១៦នេះ ក្រុមប្រឹក្សាសន្តិសុខអង្គការសហប្រជាជាតិ បានអនុម័តជាឯកច្ឆន្ទលើទណ្ឌកម្មថ្មីប្រឆាំងទៅនឹងកូរ៉េខាងជើងក្នុងការសាកល្បងអាវុធនុយក្លេអ៊ែរ។ យ៉ាងណាក៏ដោយ ទណ្ឌកម្មនេះ ហាក់ដូចជាមិនមានប្រសិទ្ធភាពអ្វីឡើយ ដ្បិតកូរ៉េខាងជើង នៅតែបន្តសាកល្បងទាំងការបាញ់មីស៊ីល និងអាវុធនុយក្លេអ៊ែរ ដែលកូរ៉េខាងត្បូង បានចាត់ទុកថា អាវុធនុយក្លេអ៊ែរនោះ បានឈានដល់ដំណាក់កាលចុងក្រោយហើយនោះ។

បើទោះជាក្នុងជំនួបត្រីភាគីនៃសម្ព័ន្ធមិត្តទាំងបី មិនបានបញ្ជាក់ពីវិធានក្តៅប្រឆាំងកូរ៉េខាងជើងក៏ដោយ អាមេរិក និងកូរ៉េខាងត្បូង បានត្រៀមការពារ និងតទល់ជាមួយនឹងកូរ៉េខាងជើងតាមរយៈការអនុញ្ញាតឲ្យអាមេរិកអាចដំឡើងប្រព័ន្ធការពារមីស៊ីលនៅក្នុងទឹកដីកូរ៉េខាងត្បូងរូចទៅហើយ៕